ەلباسىنىڭ «قازاقستان-2050» ستراتەگياسى: قالىپتاسقان مەملەكەتتىڭ جاڭا ساياسي باعىتى» اتتى قازاقستان حالقىنا جولداۋىندا ءبىلىم بەرۋ سالاسىنا زور كوڭىل بولگەنى قۋانتادى.
ەلباسى اسىرەسە جاستارعا ءتاربيە بەرۋ جۇمىسىن كۇشەيتۋدى تالاپ ەتتى. وسىعان وراي, بارلىق ءبىلىم مەكەمەلەرى مامان دايارلاۋمەن قاتار ونىڭ سەگىز قىرلى, ءبىر سىرلى, ەرىك-جىگەرى مىعىم, ەلىن, جەرىن قاستەرلەيتىن, الدا تۇرعان اسۋلاردى قينالماي الۋعا قابىلەتتى ادام ءتاربيەلەۋگە مىندەتتى. سوندىقتان, ءبىزدىڭ الدىمىزدا تاربيە جۇمىسىن ءتۇبىرىنەن قايتا قۇرۋ مىندەتى تۇر.
«سەنىڭ ەلدىگىڭ تاريحىڭدى زەرتتەۋدەن باستالادى» دەپ قادىر مىرزاليەۆ ايتقانداي, شاكىرتتەرىمىزدى تاريحي سانالى, قۇقىقتىق تاربيەلى ازامات ەتىپ تاربيەلەۋ, شىعارماشىلىققا شىڭداۋ ماقساتىندا وقۋشى بويىنداعى تابيعات بەرگەن قابىلەتتى دامىتۋعا, دارىندىلىقتىڭ كوزىن اشۋعا بارىنشا كۇش سالىپ كەلەمىز.
بۇگىنگى ۋاقىت تالابى – مادەني دەڭگەيى مەن شىعارماشىلىق قابىلەتى جوعارى شاكىرت ازىرلەۋ. سوندىقتان دا شاكىرتتەرىمىزدىڭ ىشكى سىرىن جاسىرىن ۇستايتىنىن ەسكەرسەك, ولاردىڭ ىسكەرلىك داعدىلارىن جانە ءبىلىمقۇمارلىق تالاپ-جىگەرلەرىن جەتىلدىرۋىمىز قاجەت. سەبەبى, ادامگەرشىلىگى مول, يماندى, تاربيەلى وقۋشى – كەز كەلگەن مەملەكەتتىڭ بايلىعى.
عىلىمي زەرتتەۋلەرگە قاراعاندا, ەرەكشە قابىلەتتى, تالانتتى بالالاردىڭ بيوحيميالىق, ەلەكترلىك بەلسەندىلىگى جوعارى كەلەدى. ولاردىڭ ميى قابىلداعان ءمالىمەتتەردى قورىتۋعا قابىلەتتى. دەمەك, ەرەكشە قابىلەتتىلىك – بالا بويىندا ءتاربيەمەن العان بىلىمىنە بايلانىستى قالىپتاساتىن قاسيەت.
مىرجاقىپ دۋلاتوۆ قازاق اراسىندا كوبىنە كوزگە تۇسپەي, تۇسسە دە ەلەنبەي جۇرگەن عىلىم-بىلىمگە, ءونەرگە زەرەك, دارىندى بالالاردى وقىتىپ ءتاربيەلەۋدىڭ ءمانى جايىندا ءسوز ەتە كەلىپ, دارىندىلىقتىڭ كەيبىر پسيحولوگيالىق استارىنا ءۇڭىلەدى. ونىڭ ايتۋىنشا: «تۋماسىندا قانشا زەرەكتىك بولسا دا – عىلىمسىز, ءتاربيەسىز كەمەلىنە جەتپەيدى».
جاس جەتكىنشەكتىڭ بويىنداعى تابيعات بەرگەن ەرەكشە قابىلەتتى, دارىندىلىقتى تاني ءبىلۋ, ونىڭ ودان ءارى دامۋىنا باعىت-باعدار بەرە ءبىلۋ – ەرەكشە قيىن ءىس. دەمەك, وقۋشىلاردىڭ عىلىمي-زەرتتەۋ جۇمىستارىنا قىزىعۋشىلىعىن قالىپتاستىرۋ, شىعارماشىلىق قاسيەتىن دامىتۋ, قازىرگى تەحنيكانى پايدالانۋ ءمادەنيەتىنە تاربيەلەۋ – ۇستازداردىڭ باستى مىندەتى.
وسى رەتتە مەكتەبىمىزدە «الاش جاستارى» اتتى كلۋب جۇمىس ىستەيدى. بۇل ۇيىم جەتكىنشەكتەردىڭ بويىندا شەشەندىك ونەردى, كوشباسشىلىق قاسيەتتەردى, ۇيىمداستىرۋ قابىلەتىن دامىتۋ ماقساتىندا قۇرىلعان. ونىڭ نەگىزگى ماقساتى – مەكتەبىمىزدەگى دارىندى, قابىلەتتى وقۋشىلاردىڭ باسىن قوسا وتىرىپ, جوعارىدا اتالعان كونفەرەنتسياعا, كەزدەسۋلەرگە, عىلىمي جوبالارعا, دەباتتىق تۋرنيرلەرگە, قوعامدىق ءىس-شارالارعا دايىنداۋ, وقۋشىلاردى بەيىمدەۋ. قازىرگى كەزدە كلۋب قۇرامىندا 10-سىنىپ وقۋشىلارى بار. ولار قازاقستان رەسپۋبليكاسىنىڭ تۇڭعىش پرەزيدەنت مۋزەيى ۇيىمداستىرعان دەبات تۋرنيرىندە ءجۇلدەلى ەكىنشى ورىنعا يە بولدى. سونىمەن قاتار, كلۋب مۇشەلەرى «حابار» تەلەارناسىنداعى «سونىمەن, سولاي دەيىك» باعدارلاماسىنا قاتىسىپ, كەلەلى تاقىرىپتارعا ءوز وي-ءپىكىرلەرىن ءبىلدىردى. قازىرگى كەزەڭدە كلۋب ءمۇشەلەرى – «جاس وتان» جاستار قاناتىنىڭ استانا قالالىق فيليالىنىڭ بەلسەندى ءمۇشەلەرى. مۇشەلىككە ەنە وتىرىپ, وقۋشىلارىمىز قالالىق دەڭگەيدە ءىس-شارالارعا قاتىسىپ, كەلەلى تاقىرىپتاردا ەركىن پىكىر ءبىلدىرىپ, ءدوڭگەلەك ۇستەلدەرگە قاتىسىپ, ءوز دارىندىلىقتارىن ارتتىرۋدا.
ماقسات مومىنوۆ,
استانا قالاسى №51
مەكتەپ-گيمنازياسىنىڭ مۇعالىمى