ەلىمىزدە رۋحى بيىك, ىسكەر ءارى دارىندى جاستار كوپ. ولاردى مەملەكەتتىك قىزمەتكە تارتۋدا مەملەكەت باسشىسى قاسىم-جومارت توقاەۆتىڭ باستاماسىمەن قولعا الىنعان «پرەزيدەنتتىك جاستار كادر رەزەرۆى» جوباسى ءوز تيىمدىلىگىن كورسەتىپ وتىر. العاش رەت باستالعان جىلى رەزەرۆكە ۇزىن-سانى 300-گە جەتەتىن بىلىكتى جاس ىرىكتەلىنىپ الىندى. ال ودان كەيىنگى 2021 جىلعى ەكىنشى كەزەڭدە 35 جاسقا دەيىنگى 50 مامان پرەزيدەنتتىڭ كادرلىق قورىن تولىقتىردى. بىلتىر جىل سوڭىندا ىرىكتەۋدىڭ ءۇشىنشى كەزەڭى اياقتالىپ, جوبانى ۇيلەستىرۋشىلەر 50 جاس ماماندى كادرلىق رەزەرۆكە قابىلدادى.
پرەزيدەنتتىك جاستار كادر رەزەرۆى – ەلىمىزدىڭ دامۋىنا سۇبەلى ۇلەس قوسامىن دەپ تالپىنعان جاستارعا مۇمكىندىك بەرەتىن بىرەگەي جوبا. مەملەكەت باسشىسى قاسىم-جومارت توقاەۆتىڭ باستاماسى وسى – ءبىلىم-بىلىگى مول, قولىنان ءىس كەلەتىن جاستار ءۇشىن اشىق ءارى ءتيىمدى الەۋمەتتىك ساتى قۇرۋ. تيىسىنشە, بۇل جوبا بارىنشا دايارلانعان جانە تاجىريبەلى جاستار ءۇشىن مەملەكەتتىك باسقارۋ جانە كۆازيمەملەكەتتىك سەكتور جۇيەسىندە باسشىلىق قىزمەتكە ورنالاسۋعا مۇمكىندىك بەرۋگە باعىتتالىپ وتىر. ناقتىراق ايتار بولساق, اكىمشىلىك نەمەسە باسقا دا ساياسي لاۋازىمدارعا بوس ورىن پايدا بولعان جاعدايدا, وسى پرەزيدەنتتىك جاستار كادرلىق رەزەرۆىنە ەنگەن ازاماتتاردىڭ كانديداتۋراسى قارالادى. ءوز كەزەگىندە, بۇل جوبا جىل سايىن استانا قالاسىندا قارقىندى ىسكە اسىرىلىپ, رەزەرۆكە ەنۋگە قىزىعۋشىلىق تانىتقان ازاماتتار سانى كوبەيىپ كەلەدى. پرەزيدەنتتىڭ جاستار كادرلىق رەزەرۆى جوباسى اكادەميالىق سالادا, جەكە سەكتوردا, ءتۇرلى قۇرىلىمدا جۇرگەن ەلوردانىڭ جاستارى اراسىندا زور قىزىعۋشىلىق تۋدىردى. قوعامعا قوزعاۋ سالىپ, ەلگە قىزمەت ەتۋدى كوزدەيتىن جاستاردىڭ كوپشىلىگى وسى جوباعا قاتىسىپ, باق سىناۋعا ۇمتىلۋدا.
كادرلىق رەزەرۆتە بولۋ مەرزىمى 3 جىلدى قامتيدى. ءسوزسىز, كادرلىق رەزەرۆ جاستاردىڭ مەملەكەتتىك قىزمەتتىڭ «ا» جانە «ۆ» كاتەگورياسىنا, ءتىپتى ساياسي لاۋازىمعا دەيىن وسۋىنە العىشارت جاسايدى. بوس ورىن بولعان جاعدايدا ءتيىستى قىزمەتتەرگە جاستار كادر رەزەرۆى بويىنشا ۇلتتىق كوميسسيا رەزەرۆتەگى ازاماتتاردى ۇسىنادى.
مەملەكەتتىك اپپاراتتىڭ سالالىق كادرلارعا قاجەتتىلىگىن ەسكەرە وتىرىپ, ماقساتتى ىرىكتەۋ جۇرگىزۋ – كەزەكتى ءۇشىنشى ىرىكتەۋدىڭ باستى ەرەكشەلىگى بولدى. وسىلايشا, ىرىكتەۋ 6 نەگىزگى سالا بويىنشا جۇزەگە اسىرىلدى. ولار: 1) ينفراقۇرىلىمدى, ونەركاسىپتى دامىتۋ جانە ساۋدا ساياساتى; 2) اگروونەركاسىپتىك كەشەن جانە قورشاعان ورتانى قورعاۋ; 3) سىرتقى ساياسات جانە ينۆەستيتسيالار; 4) ەكونوميكالىق جانە قارجىلىق ساياسات; 5) تسيفرلاندىرۋ; 6) الەۋمەتتىك ساياسات جانە ازاماتتىق قوعام.
مەملەكەتتىك قىزمەت ىستەرى اگەنتتىگىنىڭ بەرگەن مالىمەتىنە سايكەس, رەزەرۆكە بارلىعى 400 ادام قابىلداندى (2019 جىلى – 300; 2021 جىلى – 50, 2023 جىلى – 50).
«2019 جىلى مەملەكەت باسشىسىنىڭ باستاماسىمەن پرەزيدەنتتىك جاستار كادر رەزەرۆى ىسكە قوسىلدى. ونىڭ نەگىزگى ماقساتى – باسقارۋدىڭ جاڭا مادەنيەتىن قالىپتاستىرۋ جانە باستاماشىل, كرەاتيۆتى ويلايتىن جاستاردى تارتۋ. جوباعا قاتىسۋ ءۇشىن رەزەرۆ پلاتفورماسىندا 60 مىڭنان استام ادام (2019 جىلى – 13 مىڭ ادام, 2021 جىلى – 22 مىڭ ادام, 2023 جىلى 31 مىڭ ادام) تىركەلگەن.
بۇگىنگى تاڭدا رەزەرۆشىلەر ەكونوميكانىڭ ءتۇرلى سالالارىندا ەلىمىزدىڭ دامۋىنا ءوز ۇلەستەرىن قوسۋدا. 282 رەزەرۆشى نەمەسە 70,5% لاۋازىمدارعا تاعايىندالدى. ورتالىق مەملەكەتتىك ورگاندارعا – 141, جەرگىلىكتى مەملەكەتتىك ورگاندارعا – 37, ۇلتتىق كومپانيالارعا – 60, وزگە دە ۇيىمدارعا 46 رەزەرۆشى تاعايىندالدى. ولاردىڭ ىشىندە 34 رەزەرۆشى ساياسي لاۋازىمدارعا, 3 رەزەرۆشى «ا» كورپۋسىنىڭ لاۋازىمدارىنا تاعايىندالسا, ەكى رەزەرۆشى پارلامەنت ءماجىلىسى جانە 1 ءماسليحات دەپۋتاتى بولىپ قىزمەت اتقارۋدا. 282 رەزەرۆشىنىڭ 109-ى مانساپتىق جوعارىلاۋعا يە بولدى.
سونداي-اق رەزەرۆشىلەر مەملەكەتتىك ورگاندار جانىنداعى كونسۋلتاتيۆتىك-كەڭەسشى ورگاندار مەن قوعامدىق كەڭەستەردىڭ جۇمىسىنا بەلسەندى قاتىسادى» دەدى مەملەكەتتىك قىزمەت ىستەرى اگەنتتىگىنىڭ ءباسپاسوز قىزمەتى.
پرەزيدەنتتىك جاستار كادرلىق رەزەرۆىنە ۇمىتكەرلەردىڭ باستى ماقساتى جەكە مانساپتىق امبيتسيالارعا ەمەس, ەڭ الدىمەن, قوعامدىق مۇددەلەرگە نەگىزدەلۋى كەرەك. كادرلىق رەزەرۆكە ەنۋدىڭ ءمانى – ەل يگىلىگى ءۇشىن قىزمەت اتقارۋ. وسىنداي ۇستانىممەن مەملەكەتتىك قىزمەت ىستەرى اگەنتتىگىنىڭ بويىنشا استانا قالاسىنىڭ دەپارتامەنتىنە قاراستى قالالىق باسقارمالاردان ەلوردادان ءۇشىنشى ىرىكتەۋ كەزىندە 3 رەزەرۆشى ءوتىپ, پرەزيدەنتتىك جاستار كادرلىق رەزەرۆىنە قابىلداندى.
مەيرامبەك اشىربەكوۆ, استانا قالاسىنىڭ تسيفرلاندىرۋ جانە مەملەكەتتىك قىزمەت باسقارماسىنىڭ باسشىسى:
– «قىزمەتتىك جولىمدا ءار جىلدارى تسيفرلاندىرۋ سالاسىنا قاتىستى «Design, and Development Software» جشس, «قورعاس-شىعىس قاقپاسى» ارنايى ەكونوميكالىق ايماعىنىڭ باسقارۋشى كومپانياسى» اق, «TEQ WORLD» جشس, «Click Intellect» جشس جانە «DDP biz» جشس سەكىلدى مەكەمەلەردە قىزمەت ەتتىم. 10 جىلدان اسا ۋاقىت ىشىندە ءارتۇرلى سالالاردا تسيفرلىق قۇرالداردى ازىرلەۋمەن جانە ەنگىزۋمەن اينالىستىم. تسيفرلاندىرۋ باعىتىن تاڭداۋداعى سەبەبىم, بۇگىندە تسيفرلىق تەحنولوگيالار الەمدى وزگەرتىپ, ادامداردىڭ ءومىر ءسۇرۋ ساپاسىن ەداۋىر جاقسارتا الاتىنىنا سەنىمدىمىن. جاساندى ينتەللەكت جانە big-data سالاسىنداعى مۇمكىندىكتەردەن شابىت الامىن جانە زاماناۋي ماسەلەلەردى شەشۋدىڭ يننوۆاتسيالىق شەشىمدەرىن ازىرلەۋگە ۇلەس قوسقىم كەلەدى. وسىلايشا ءبىزدىڭ قوعامدى بولاشاقتا تۇراقتى جانە باسەكەگە قابىلەتتى ەتۋ مۇمكىندىگى بولادى.
پرەزيدەنتتىك جاستار كادر رەزەرۆى – جاس كوشباسشىلاردى قولداپ, ولاردىڭ دامۋىنا باعىتتالعان نەگىزگى باستاما. جاستاردىڭ كوشباسشىلىق قابىلەتىن دامىتۋعا, قوعامدىق جانە مەملەكەتتىك ومىرگە اتسالىسۋعا, سونداي-اق ەلدىڭ بولاشاعىن قالىپتاستىرۋعا مۇمكىندىك بەرەدى. بۇل بىلىكتى كادرلىق الەۋەتتى قۇرۋعا ىقپال ەتەدى جانە قوعامنىڭ تۇراقتىلىعى مەن وركەندەۋىن قامتاماسىز ەتەدى».
جاناسىل شاۋكەنتاەۆ, استانا قالاسى اكىمى اپپاراتى باسشىسىنىڭ ورىنباسارى:
– ەل پرەزيدەنتى قاسىم-جومارت توقاەۆتىڭ سايلاۋالدى باعدارلاماسى اياسىندا «پرەزيدەنتتىك جاستار كادرلىق رەزەرۆى» جوباسى ىسكە قوسىلاتىنىن ەستىگەندە بىردەن قىزىعۋشىلىق تانىتتىم. اتاۋىنىڭ ءوزى ەرەكشە بولدى جانە ەلدەگى ساياسي رەفورمالار اياسىندا تۇبەگەيلى وزگەرىستەر قاجەت ەكەنىن ءتۇسىندىم. 2022 جىلدان باستاپ قازىرگى ۋاقىتقا دەيىن قالالىق اكىمدىك اپپاراتىندا قىزمەت ىستەيمىن. ءار جىلدارى ەلوردانىڭ جەر قاتىناستارى, مەملەكەتتىك ساۋلەت-قۇرىلىس باقىلاۋ باسقارماسى مەن قالالىق اكىمدىك اپپاراتىنداعى مەملەكەتتىك-قۇقىقتىق بولىمىندە تاجىريبە جيناپ, جۇمىس ىستەدىم. جەرگىلىكتى اتقارۋشى ورگانداعى جۇمىسىم مەن ءۇشىن ۇلكەن تاجىريبە بولدى.
پرەزيدەنتتىك جاستار كادرلىق رەزەرۆى – جاس مەملەكەتتىك قىزمەتشىلەر ءۇشىن ۇلكەن دودا. باسەكەلەس ورتا ارقىلى ءوزىن سىناپ, شىڭداۋعا مۇمكىندىك بەرەتىن بىرەگەي الاڭ. توپتىق جۇمىستار بارىسىندا ءوزىڭدى جاقسى قىرىنان كورسەتۋ ارقىلى كوزگە تۇسەسىڭ. ءۇشىنشى ىرىكتەۋ ءادىل جانە وتە قىزىق بولدى. ءبىر قىزىعى, ىرىكتەۋگە الدىن الا دايىندالۋ مۇمكىن ەمەس. قابىلەتىڭىزگە قاراي باعالانادى جانە قورىتىندىسى بويىنشا وسال جەرلەرىڭىزدى سۋرەتتەپ بەرەدى. بۇل جوبانىڭ باستى يدەياسى – تالانتتى جاستار ءۇشىن «الەۋمەتتىك ليفت» قۇرۋ. وسىنداي مۇمكىندىكتى قولدانۋ ءۇشىن دە جوباعا قاتىستىم. بۇل جەردە ەسكەرەتىنى پرەزيدەنتتىك جاستار كادرلىق رەزەرۆىنە ءوتتىم ەكەن دەپ, جوعارى لاۋازىمدارعا تاعايىنداۋدى كۇتۋ – قاتە پىكىر. ارينە, ءار مامان ءۇشىن ونىڭ ارتىقشىلىقتارى بار, جاۋاپكەرشىلىك جۇكتەيدى. بىراق قىزمەتتىك جولدا ءوسۋ – ءار ماماننىڭ وزىنە بايلانىستى. مەن ءۇشىن باستىسى – ادال قىزمەت ەتۋ, حالقىمىزدىڭ ءال-اۋقاتىنىڭ وسۋىنە سەپتىگىمدى تيگىزۋ».
يسلامبەك بايمانوۆ, استانا قالاسى الماتى اۋدانى ىشكى ساياسات ءبولىمىنىڭ باسشىسى:
– مەملەكەتتىك قىزمەتتەگى جولىمدا 2021 جىلى ارالىعىندا استانا قالاسى سارىارقا اۋدانىنىڭ ىشكى ساياسات ءبولىمىنىڭ باس مامانى جانە ءبولىم باسشىسىنىڭ مىندەت اتقارۋشىسى بولىپ جۇمىس ىستەدىم. ال 2022 جىلدان باستاپ الماتى اۋدانىنىڭ ىشكى ساياسات ءبولىمىنىڭ باسشىسى لاۋازىمىندا قىزمەت اتقارامىن. مەملەكەتتىك قىزمەتشى رەتىندەگى بىلىكتىلىگىمدى ارتتىرۋ ماقساتىمەن پرەزيدەنت جاستار كادر رەزەرۆىنە قاتىستىم. ارينە, ءار ىرىكتەۋ كەزەڭى قيىن دا قىزىقتى بولدى. جالپى 7 كەزەڭنەن تۇراتىن بىلتىرعى ىرىكتەۋ بارىسىندا ءار ۇمىتكەردىڭ قۇزىرەتتىلىكتەرىن كورسەتۋگە ەرەكشە كوڭىل ءبولىندى. مەن ءۇشىن 4-كەزەڭ, «قۇزىرەتتەردى باقىلاۋ» اسسەسسمەنت-ورتالىعىندا وتكەن ىرىكتەۋ قيىن بولدى. ەكى بلوكتان وتكەن بۇل كەزەڭ ءبىرىنشى كەزەكتە ادىلەتتى ءوتتى. بايقاۋعا قاتىسار الدىندا «مەن ءوز ءومىرىمدى قوعامعا ارناۋعا دايىنمىن با؟» دەگەن سۇراقتى وزىمە قويىپ ەدىم. مەن «ءيا» دەپ جاۋاپ بەردىم. سەبەبى مەملەكەتتىك قىزمەتتە جۇمىس ىستەي وتىرىپ, ءاربىر مەملەكەتتىك قىزمەتشىنىڭ ماقساتى – ءوز جۇمىسىندا بارىنشا تيىمدىلىك كورسەتۋ ەكەنىن ءتۇسىندىم. پرەزيدەنتتىك جاستار كادرلىق رەزەرۆى – بارلىق جاس پاتريوتتار ءۇشىن مەملەكەتتىك كادر ساياساتىن جۇزەگە اسىرۋدا كاسىبي جارامدىلىعىن دالەلدەۋدىڭ تاماشا مۇمكىندىگى. مەن ءۇشىن دە بۇل ەڭبەك جولىندا العان ءبىلىمىمدى سىناۋ بولدى.
مەملەكەتتىك قىزمەتتىڭ قالىپتاسقان پوستۋلاتتارىنا جاڭاشا كوزقاراستى ەنگىزە وتىرىپ, كادر ساياساتىنىڭ ساباقتاستىعى مەحانيزمى رەتىندە بۇل جوبا قاجەت. وسى سالاعا ادالدىق, اشىقتىق, ادىلدىكتى نىعايتقىم كەلەدى. كادرلىق رەزەرۆ ءارتۇرلى سالالارداعى مەملەكەتتىك باسقارۋشىلاردى انىقتاۋ بويىنشا تىڭ رەفورمالىق جوباعا اينالدى. كەز كەلگەن ەلدە وسىنداي جوبانىڭ انالوگتارى بولا بەرمەيدى. مەملەكەت باسشىسىنىڭ بۇل جوبانى 2019 جىلى ىسكە قوسقانى ءبىزدىڭ ەلىمىزدە بارلىعىنىڭ مەملەكەتكە پايدا اكەلۋگە تەڭ مۇمكىندىكتەرى بار ەكەنىن دالەلدەيدى».
P.S: قازىرگى جاستاردىڭ جۇمىسقا ورنالاسقاندا مانساپتا ءوسۋ, جالاقىدان بۇرىن مەكەمەدەگى قۇندىلىقتار مەن جۇمىس پرينتسيپتەرىنە باسا ءمان بەرەتىنىن بايقاۋعا بولادى. سوندىقتان جاستاردىڭ قىزمەتكە دەگەن تالعامى دا وزگەرىپ كەلەدى. بۇگىنگى جاستار قوعاممەن قارىم-قاتىناستى ادىلەتتى, اشىق, قولجەتىمدى قىلاتىن ماشىقتاردى بويىنا جيناقتاعان. سوعان سايكەس مەملەكەتتىك قىزمەت تە ادامعا قىزمەت ەتۋگە, سەرۆيستىك ۇلگىگە قاراي اۋىسىپ كەلەدى.
