بالالاردىڭ ومىرىنە, قاۋىپسىزدىگىنە قاتىستى ماسەلە قاشاندا وزەكتى. قوعامدا سابيلەر, جاسوسپىرىمدەر قاي جاعىنان دا ەرەسەكتەر تاراپىنان قورعاۋعا ءزارۋ ەكەنى ايتپاسا دا تۇسىنىكتى. وتكەن جولى گازەتىمىزدە ەلەكتروندى تەمەكىلەردىڭ زيانى جونىندە جازعان بولاتىنبىز. تاعى ءبىر كۇردەلى ماسەلە كاليان بولىپ وتىرعانى شىندىق. ەرەسەكتەر قولداناتىن, ەرەسەكتەر كورسەتكەن تەرىس تاربيە – كاليانعا جەتكىنشەكتەردىڭ تارتىلۋى.
كاليان تەمەكى ءتۇتىنى سۋ ارقىلى سالقىنداتىلىپ, تازارتىلاتىن شىعىس تەمەكى شەگەتىن قۇرىلعىسى ەكەنى ءمالىم. وكىنىشكە قاراي, كوپتەگەن ادام ونىڭ قۇرامىندا تەمەكى جوق جانە دەنساۋلىققا زيان تيگىزبەيدى دەپ سانايدى. الايدا تەمەكى جاپىراقتارىنىڭ 95 پايىزى, 8 ميلليگرامنان استام نيكوتين, سونىمەن قاتار E. coli جانە كوپتەگەن قوزدىرعىش بار ەكەنىن ماماندار ناقتى ايتىپ وتىر.
كالياندا Pseudomonas aeruginosa, Staphylococcus aureus, اشىتقى, ساڭىراۋقۇلاقتار جانە ۋلى ەلەمەنتتەردىڭ جوعارى مولشەرى بار. مامانداردىڭ ايتۋىنشا, كاليان تارتۋ ارقىلى ادام كوپتەگەن اۋرۋدان قۇتىلعانداي بولعانمەن, ول دەرت جاسىرۋلى كۇيىندە قالادى.
دەنساۋلىق ساقتاۋ مينيسترلىگىنىڭ مالىمەتىنشە, قازاقستاندىق كافە-بارلار قوعامدىق ورىنداردا كاليان شەگۋگە تىيىم سالۋدى بۇزىپ وتىر. ولاردىڭ ايتۋىنشا, ەلدىڭ باس سانيتارلىق دارىگەرىنىڭ قاۋلىسىنا قاراماستان, كاليان ونەركاسىبى – بۇگىنگى تاڭدا تانىمال سالانىڭ ءبىرى. بۇل شارتتار مەكەمەدە كاليانعا قىزمەت كورسەتۋ قۇقىعىنا ليتسەنزيا الۋعا قويىلاتىن تالاپتارعا ەنگىزىلگەن. تالاپتارعا ساي ويىن-ساۋىق مەكەمەلەرىندە – مەيرامحانا نەمەسە كافەدە, ەڭ الدىمەن, كالياندى پايدالانۋعا رۇقسات بەرەتىن ليتسەنزياسى بولۋى شارت. كاليان شەگۋگە بولىنگەن اۋماق مەكەمەنىڭ بۇكىل اۋماعىنىڭ جارتىسىنان اسپاۋى كەرەك. ال تەمەكى شەگۋ ورىندارى قورشالىپ, وندا بالالار جۇرمەۋى ءتيىس. جانە تاعى ءبىر شارت – مەكەمەلەردىڭ ەسىگى كىرىپ-شىعۋدان باسقا كەزدە ۇنەمى جابىق تۇرۋى قاجەت. بۇل شەكتەۋلەر بىزگە دەنى ساۋ ۇرپاق ءوسىرۋ ءۇشىن ءالى دە از بولىپ كورىنەدى. بۇل رەتتە ناقتى ۇسىنىستار مەن زاڭدىق كۇشى بار زاڭنامالىق قادامدار قاجەت. شەتتەن كەلگەن قاڭسىقتى تاڭسىققا اينالدىرۋدىڭ قاجەتى جوق, بۇعان تۇبەگەيلى توسقاۋىل قويۋ كەرەك. ايتپەسە قولى بوس كەزدە وقۋشىلارىمىز كلۋب كەزىپ, كاليان تارتىپ كەتپەس ەدى.
استانا قالالىق پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ دەرەكتەرىنە سۇيەنسەك, 2022 جىلى اكىمشىلىك قۇقىق بۇزۋشىلىق تۋرالى كودەكستىڭ 441-بابىنا سايكەس 2521 قۇقىق بۇزۋشى اكىمشىلىك جاۋاپكەرشىلىككە تارتىلعان. ال 2021 جىلى 2488 قۇقىق بۇزۋشى جاۋاپكەرشىلىككە تارتىلعانىن ەسكەرسەك, ويىن-ساۋىق ورىندارى, كافەلەر سياقتى كوپشىلىك كوپ باراتىن قوعامدىق ورىنداردا ەلوردالىقتار تاراپىنان زاڭدى بۇزۋ كوبەيگەنىن كورسەتەدى. بۇل قالايدا وسى ماسەلەگە قاتىستى زاڭدى قاتاڭداتۋ كەرەگىن بىلدىرەدى.
مىسالى, مىسىردا وقۋ ورىندارىنان, مەشىتتەردەن جانە باسقا دا قاسيەتتى عيماراتتاردان, سونداي-اق جانارماي قۇيۋ بەكەتتەرىنەن ءبىر شاقىرىمنان استام قاشىقتىقتا ورنالاسقان جەرلەردە كاليان ۇسىنۋعا تىيىم سالىنعان زاڭ كۇشىنە ەنگەنىن جۋرناليستەر جارىسا جازىپ جاتتى. بىزدە ازىرشە قازاننان قاقپاق كەتىپ, اسىمىز ارام جولمەن بايىعاندار قولىندا كەتىپ جاتىر… بۇگىن قيمىلداماسا, ەرتەڭ تىم كەش بولارى انىق.
