قالالىق تەمىرجول ۆوكزالى مەن ساپارجاي اۋماعىندا «جاستاردى جۇمىسقا ورنالاستىرۋ پۋنكتى» قاناتقاقتى جوباسى ءوز جۇمىسىن باستادى.
كىم-كىمدى دە تولعاندىراتىن وزەكتى ماسەلەلەردىڭ ءبىرى – وقۋ اياقتاعان سوڭ, كاسىبي مامان يەسى بولۋ. كۇن سايىن جۇمىس تابۋ قامىمەن نەمەسە ءوز كاسىبىن جەتىلدىرۋ ءۇشىن قالامىزعا كەلۋشىلەر قاراسى كوپ. ولاردى, ەڭ الدىمەن, ەلوردانىڭ ەڭبەك نارىعى جونىندەگى اقپارات قىزىقتىرادى. قالا ءىشىن جەتە بىلمەيتىن جاننىڭ بوسقا ساندالىپ ءجۇرىپ قالاتىنى, الدە كەزدەيسوق جۇمىسقا ارانداپ قالاتىنى جاسىرىن ەمەس. وسىعان وراي استانا قالاسى اكىمدىگى مەن جاستار ساياساتى ماسەلەلەرى باسقارماسى جاستاردى اقپاراتتاندىرۋ جانە جۇمىسپەن قامتۋ ماسەلەسىن شەشۋدى قالانىڭ قاقپاسىنان باستاۋدى ءجون كورىپتى. ۆوكزال اۋماعىندا اشىق كەڭەستەر جۇرگىزىلسە, ساپارجاي مەن جولاۋشىلار پويىزدارىندا اقپاراتتىق ستەندتەر ورناتىلىپ, كىتاپشالار تاراتىلۋدا. «مەن بۇل كىتاپشانى بالام ءۇشىن الىپ وتىرمىن. ول – ستۋدەنت. وسى اقپاراتتار ارقىلى جۇمىس تاۋىپ كەتەدى دەگەن ۇمىتتەمىن» دەيدى شىعىس قازاقستان وبلىسىنان كەلگەن بايان قايىربەكوۆا. بۇل ءىس-شارا جاستارعا قالاداعى بوس جۇمىس ورىندارىن جىلدام تابۋعا, تاجىريبەدەن وتۋگە جانە تۇلەكتەرگە ەلوردادا سۇرانىسقا يە بولاشاق ماماندىقتاردى تاڭداۋعا مۇمكىندىك بەرەدى. جاستار جۇمىس بەرۋشىلەردىڭ ساۋالدامالارىن تولتىرىپ, كەلىسسوزدەر بارىسىندا قىسقا پسيحولوگيالىق كەڭەستەر الىپ, قۇجاتتاردى دۇرىس راسىمدەۋدى ۇيرەنەدى. «ءبىز جۇمىس بەرۋشى مەكەمەلەرگە بارىپ, قانداي قىزمەتكەرلەر, ماماندىقتار قاجەت ەكەندىگىن سۇراستىرىپ, الدىن الا كەلىسەمىز. كەيىن اقپاراتتاردى جاستارعا تاراتىپ, تۇيىندەمەلەرىن الىپ, ەكىجاقتى كەلىسىم ورناتۋعا تىرىسامىز» دەيدى «استانا جاستارى» ۇيىمىنىڭ جەتەكشىسى قايىربولات ساحمەتوۆ. جۇمىسقا ورنالاستىرۋ پۋنكتتەرى جاز بويى اشىق تۇرادى. العاش رەت جۇرگىزىلىپ جاتقان بۇل جوبا وڭ ناتيجە كورسەتىپ جاتسا, ۇيىمداستىرۋشىلار ونى جىل بويى جالعاستىرۋعا دا قارسى ەمەس ەكەن.
ساپارعالي قانات
