دوستىق پەن تاتۋلىق, كەلىسىم مەن بىرلىك سياقتى ادام سىيلاستىعىن بىلدىرەتىن سوزدەر قۇلاققا جاتتاندى ەستىلگەنىمەن, شىن مانىندە, ورنىقتى قوعامنىڭ بەرىك نەگىزىن قالايتىن ماڭىزدى فاكتور ەكەنىنە كوزىمىز جەتىپ وتىر. ءبىزدىڭ مەملەكەتتىڭ قول جەتكىزگەن جەتىستىكتەرىنىڭ باستاۋىندا بۇكىل قازاقستاندىقتاردىڭ ءوزارا دوستىعى مەن ىنتىماعى كورنەكى جەردەن ورىن الۋىنىڭ باستى سەبەبى دە وسىندا. ءاربىر ازاماتتىڭ تەڭ قۇقىلىعىن ەتنوسارالىق قارىم-قاتىناستىڭ نەگىزگى قاعيداتى سانايتىن مەملەكەت ساياساتى العاش رەت 1995 جىلى 30 تامىزدا وتكىزىلگەن رەسپۋبليكالىق رەفەرەندۋمدا قابىلدانعان اتا زاڭىمىزدا جازىلدى. وندا «تەگىنە, الەۋمەتتىك, لاۋازىمدىق جانە مۇلىكتىك جاعدايىنا, جىنىسىنا, ناسىلىنە, ۇلتىنا, تىلىنە, دىنگە كوزقاراسىنا, نانىمىنا, تۇرعىلىقتى جەرىنە بايلانىستى نەمەسە كەز كەلگەن جاعداياتتار بويىنشا ەشكىمدى ەشقانداي كەمسىتۋگە بولمايدى» دەپ, ەتنوستار مەن كونفەسسيالار اراسىنداعى كەلىسىمنىڭ جاڭا ۇلگىسىن جاريا ەتتى.
اتا زاڭىمىزدىڭ تاعى ءبىر ارتىقشىلىعى – تيتۋلدى جانە تيتۋلدى ەمەس حالىق دەپ قازاقستاندىقتاردىڭ اراسىن اشقان جوق. قازاق ءتىلى – مەملەكەتتىك ءتىل, ورىس ءتىلى رەسمي تۇردە قازاق تىلمەن تەڭ قولدانىلادى. بۇل وزگە ەتنوس اراسىندا قولداۋ تاۋىپ, ولاردىڭ جاۋاپكەرشىلىگىن ارتتىردى. جاڭا زاڭ قابىلدانعان كۇننەن باستاپ ەتنوستاردىڭ ءوز مادەنيەتى مەن ءتىلىن, تاريحىن زەردەلەۋگە بارلىق مۇمكىندىك جاسالدى. «ارتۇرلىلىك ارقىلى – بىرلىككە» دەگەن بىرىكتىرۋشى قاعيدات جاڭا ءمان-ماعىناسىمەن تولىقتى.
بىزدەر, ءارتۇرلى ەتنوستاردىڭ وكىلدەرى, وسكەلەڭ ۇرپاقتىڭ بولاشاعىنا الاڭدامايمىز. ەلىمىزدەگى حالىقتار اراسىنداعى دوستىق پەن بىرلىكتىڭ, تاعاتتىلىق پەن توزىمدىلىكتىڭ, ءوزارا قۇرمەتتىڭ سالتانات قۇراتىنىنا سەنىمدىمىز. سەبەبى, بۇعان ءبىزدىڭ كونستيتۋتسيامىز كەپىلدىك بەرگەن.
سالمان گەروەۆ,
«ۆايناح» شەشەن-ينگۋش
ەتنومادەني ورتالىعىنىڭ جەتەكشىسى
