ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا «كەش» قويىلىمىنىڭ ارنايى كورسەتىلىمى ءوتتى. تۋىندى اۆتورى – الەكسەي دۋدارەۆ. قازاق تىلىنە اۋدارعان – فاريزا وڭعارسىنوۆا. رەجيسسەرى – قازاقستاننىڭ ەڭبەك سىڭىرگەن قايراتكەرى بولات ۇزاقوۆ.
سپەكتاكلدە باستى ءرولدى تەاتردىڭ نەگىزىن قالاۋشىلاردىڭ ءبىرى, قازاقستاننىڭ ەڭبەك سىڭىرگەن ءارتىسى, 83 جاستاعى اق سامايلى اكتريسا رىمكەش ومارحانوۆا سومدايدى.
درامانىڭ پرەمەراسى 2009 جىلى 5 ناۋرىز كۇنى ءوتتى. سودان بەرى رەپەرتۋاردان تۇسپەي كەلە جاتىر. اقىن فاريزا وڭعارسىنوۆا اۋدارما اۆتورى رەتىندە سپەكتاكلدىڭ دايىندىقتارىندا بولىپ, پرەمەراسىنا قاتىستى. «كەش» 2010 جىلى تاراز قالاسىندا وتكەن قازاقستان دراما تەاترلارىنىڭ حVIII رەسپۋبليكالىق فەستيۆالىندە گران-پري يەلەندى.
بۇل قويىلىمدا بار بولعانى 3-اق اكتەر ءوز ونەرلەرىن ورتاعا سالادى. قاللەكي تەاترىنىڭ نەگىزىن قالاۋشىلاردىڭ ءبىرى, قازاقستاننىڭ ەڭبەك سىڭىرگەن ءارتىسى رىمكەش ومارحانوۆا «كەش» سپەكتاكلىندەگى باستى كەيىپكەر گاننا ءرولىن ەڭ العاش 70 جاسىندا سومدادى. بۇگىندە 83 جاسقا تولعان اق سامايلى اكتريسا گاننا ءرولىن ءوز دەڭگەيىندە سومداپ ءجۇر.
ۆاسيلي (مۋلتيك) ءرولىن ەكى قۇرامدا قازاقستاننىڭ ەڭبەك سىڭىرگەن قايراتكەرلەرى اقىش ومار مەن بولات ىبىراەۆ سومدايدى. نيكيتا (گاستريت) ءرولىن ءبىر عانا قۇرامدا قازاقستاننىڭ ەڭبەك سىڭىرگەن قايراتكەرى مەيرام قايسانوۆ سومداپ كەلەدى. گاننا ءرولىن ەكىنشى قۇرامدا قازاقستاننىڭ ەڭبەك سىڭىرگەن قايراتكەرى كۇليا قوجاحمەتوۆا كەيىپتەيدى.
رەپەرتۋارداعى كورەرمەن سۇرانىسىنا يە «كەش» دراماسى – فيلوسوفيالىق ماعىناسى تەرەڭ شىعارما. سپەكتاكلدىڭ نەگىزگى ايتار ويى: «اتا-انامىزعا مەيلىنشە قامقورلىق كورسەتىپ, پارىزىمىزدى وتەۋدەن كەش قالمايىق».
