ەلوردانى دامىتۋدىڭ باسىم مىندەتتەرىنىڭ ءبىرى – شەت ايماقتاردى اباتتاندىرۋ. ءبىزدىڭ ءتىلشىمىز باس قالادان سىرتقارىراق ورنالاسقان وسىنداي تۇرعىن الاپتاردىڭ ءبىرى – ۇركەر ەلدى مەكەنىنە بارىپ, ونداعى تۇرعىنداردىڭ تىنىس-تىرشىلىگىمەن تانىسىپ قايتقان ەدى. جيىرما جىل بۇرىن, اتالمىش ەلدى مەكەندە العاشقى ۇيلەر پايدا بولعان كەزدە, بۇل تۇرعىن الاپ «شىعىس يلينكا» دەپ اتالدى. تەك وتكەن 2021 جىلدىڭ باسىندا ءماسليحاتتىڭ شەشىمىمەن بۇل جەر ۇركەر تۇرعىن الابى دەگەن ادەمى اتاۋعا يە بولدى.
ءبارىن باسىنان باستاساق
ستاتيستيكاعا سايكەس, قالا حالقىنىڭ تورتتەن ءبىر بولىگى, قالا ماڭىندا تۇراتىنىن ەسكەرسەك, ۇركەر تۇرعىن الابىندا بۇگىنگى تاڭدا 30 مىڭعا جۋىق ازامات ءومىر سۇرەدى. ونىڭ 9 000-عا جۋىعى – مەكتەپ جاسىنداعى بالالار.
تۇرعىن الاپتىڭ ينسپەكتورى جارقىن ايتجانوۆتىڭ ايتۋىنشا, ۇركەر تۇرعىن الابىنىڭ جالپى اۋدانى 800 گەكتاردى قۇرايدى. اتالمىش ەلدى مەكەندە 14 كوپقاباتتى ءۇي, 4000-عا جۋىق جەكە ءۇي, 1 مەكتەپ جانە 3 بالاباقشا بار. 3600 وقۋشىعا ارنالعان № 69 جالعىز جەرگىلىكتى مەكتەپ-گيمنازيادا وسى ەلدى مەكەننىڭ بالالارىنىڭ دەنى ءبىلىم الۋدا. قالعان وقۋشىلار كۇن سايىن ءۇش مارشرۋتقا اۋىسىپ ءمىنۋ ارقىلى استاناعا قاتىناپ, ەلوردا مەكتەپتەرىنە بارۋعا ءماجبۇر.
ۇركەر تۇرعىن الابىندا بارلىعى 144 كوشە بار, ونىڭ 136-سىندا جارىقتاندىرۋ جۇمىس ىستەيدى, قالعاندارى بويىنشا جارىقتاندىرۋدى قوسۋ جۇمىستارى جۇرگىزىلۋدە. بۇل ماڭنىڭ تۇرعىندارىنا №12 قالالىق ەمحانا مەديتسينالىق قىزمەت كورسەتەدى. وعان 23700 ادام تىركەلگەن. ەسىل اۋدانى اكىمدىگىنىڭ اپپاراتى قىزمەتكەرلەرىنىڭ مالىمەتىنشە, مۇندا بەلگىلى ءبىر سالاعا ماماندانعان دارىگەرلەر جەتىسپەيدى. بۇل ماسەلە قازىر قالالىق قوعامدىق دەنساۋلىق ساقتاۋ باسقارماسىمەن كەلىسىلىپ, شەشىلۋ ۇستىندە.
گاز ماسەلەسى قازىر يلينكا مەن ۇركەر تۇرعىن الابى تۇرعىندارىن ەرەكشە الاڭداتىپ وتىر. بۇگىندە يلينكا مەن ۇركەر تۇرعىن الاپتارىن گازداندىرۋ جوسپارعا ساي تولىق قوسىلعان, جوبالىق-سمەتالىق قۇجاتتارى دايىندالىپ جاتىر. ەكى اۋداندا دا گاز تارتۋ جۇمىستارىن 2022-2023 جىلدارى تولىعىمەن اياقتاۋ كوزدەلىپ وتىر.
بۇل جەردە تۇرعىنداردى ەرەكشە تولعاندىرعان ماسەلەنىڭ ءبىرى ينتەرنەت بولاتىن. جاۋاپتى تۇلعالار ماسەلەنى ءوز كوزدەرىمەن كورۋى ءۇشىن تۇرعىن الاپ ينسپەكتورى سوناۋ ءبىر جىلى قالالىق ءماسليحات دەپۋتاتتارىنىڭ قولداۋىمەن تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ قىزمەتكەرلەرى مەن ۇيالى بايلانىس وپەراتورلارىن شاقىرىپ, ناتيجەسىندە ۇركەردە قوسىمشا انتەننا-دىڭگەك قۇرىلىستارى ورناتىلدى. وسى جىلدىڭ سوڭىنا دەيىن مۇنداي ءتورت ادق پايدا بولادى.
تۇرعىن الاپ پەن قالا اراسى تىم شالعاي بولماعانىمەن, ەلوردا ورتالىعىنا جەتۋ دە وتە قيىن بولدى. بۇل رەتتە سity Transportation systems باسشىلىعى قولداۋ ءبىلدىرىپ, ۇركەر ەلدى مەكەنىنە قوسىمشا №45 اۆتوبۋس باعىتى قوسىلدى.
سونداي-اق تۇرعىن الاپتا «سەرگەك» كامەرالارىن ورناتۋ جانە سىرتقى جارىقتاندىرۋ ماسەلەلەرى شەشىلىپ, ازاماتتاردىڭ ءوتىنىشى بويىنشا حالىققا قىزمەت كورسەتۋ ورتالىعىنىڭ فيليالى اشىلدى.
اۋلالار اباتتاندىرىلۋدا
سوڭعى جىلدارى قالا اكىمى التاي كولگىنوۆتىڭ تىكەلەي تاپسىرماسى بويىنشا, سيقى كەتكەن ساياباقتار قايتا اجارىن تاپسا, قالاداعى جانە قالا شەتىندەگى قاراۋسىز قالعان جەرلەردە اباتتاندىرۋ جۇمىستارى جۇرگىزىلىپ, تۇرعىندارعا قولايلى تىنىمباقتارعا اينالدى. اۋلا اۋماقتارىن اباتتاندىرۋدا بارلىق زاماناۋي ستاندارتتار ەسكەرىلگەن. قولدانىلاتىن ماتەريالدار سەرتيفيكاتتالعان. سپورت الاڭدارىندا قاۋىپسىز رەزەڭكە توسەمدەر, جاتتىعۋ كەشەندەرى ورناتىلدى. سونداي-اق اۋماعى بويىنشا سايكەس كەلەتىن اۋلالاردىڭ بارلىعىنا فۋتبول, ۆولەيبول جانە باسكەتبول الاڭدارى سالىندى.
اباتتاندىرۋ جۇمىسىن جۇرگىزۋدە «بيۋدجەتكە قاتىسۋ» باعدارلاماسى ىسكە قوسىلدى. ياعني قاي اۋلانى اباتتاندىرۋ كەرەك جانە بالالار الاڭىندا نەنى كورگىسى كەلەتىنىن تۇرعىنداردىڭ وزدەرى شەشەدى. ەسىل اۋدانىندا بيىل 20 جاڭا اۋلا سالىنىپ, 5 قوعامدىق كەڭىستىكتى اباتتاندىرۋ جوسپارلانعان. قازىر وسى جوسپاردىڭ دەنى ساتىمەن ورىندالىپ, پايدالانۋعا بەرىلدى. سونىڭ ءبىرى – ۇركەر ەلدى مەكەنىندە سالىنعان ەكى زاماناۋي قوعامدىق كەڭىستىك.
– جاڭادان سالىنعان بالالار الاڭى تۇرعىندارعا وتە قولايلى بولدى. قاۋىپسىز ءارى ىڭعايلى. بۇرىن بالالار ءۇي-ءۇيدىڭ بۇرىشىندا شاڭ-شاڭ بولىپ ويناپ جۇرەتىن ەدى. شاعىن الاڭقاي سالىنعالى سول جەرگە بارىپ وينايدى. ۇلكەندەرگە دە قولايلى. سوڭعى كەزدەرى باس قالانى اباتتاندىرۋ جۇمىستارى وتە قارقىندى ءجۇرىپ جاتىر. مەن وسىعان ءدان ريزامىن, – دەدى ۇركەرلىك تۇرعىن ايجان اسىلبەكقىزى.
ۇركەر ەلدى مەكەنىندەگى بوس جەرلەردىڭ ورنىندا ەكى زاماناۋي قوعامدىق كەڭىستىك اباتتاندىرىلىپ, رەسمي پايدالانۋعا بەرىلدى. قاۋىپسىز رەزەڭكە جابىنى, سەرتيفيكاتتالعان شاعىن ساۋلەت نىساندارى قولدانىلىپ, ورىن كوگالداندىرىلدى. الاڭدار بالالارعا دا, ەرەسەكتەرگە دە ارنالعان.
