ەلورداداعى ورتالىقتاندىرىلعان كىتاپحانالار جۇيەسىنە قاراستى ورتالىق بالالار جانە جاسوسپىرىمدەر كىتاپحاناسىندا اۋعانستاننان كەڭەس اسكەرلەرى شىعارىلۋىنىڭ 35 جىلدىعىنا وراي بارد اسقار ساعىناەۆپەن كەزدەسۋ ءوتتى.
كورنەكتى اقىن ولجاس سۇلەيمەنوۆتىڭ باتاسىن العان اسقار ساعىناەۆ – اۋعانستان سوعىسى ارداگەرلەرى ۇيىمىنىڭ قۇرمەتتى مۇشەسى. وتان الدىنداعى بورىشىن باسقا جەردە وتەپ, وت پەن وق كورمەسە دە, وسى ۇيىممەن تىعىز قارىم-قاتىناس ورناتىپ, ۇزاق ۋاقىت اسكەري-پاتريوتتىق جۇمىسپەن اينالىستى. اتاپ ايتقاندا, مەكتەپتەرگە, باسقا دا ءبىلىم وشاقتارىنا بارىپ وتانشىلدىق رۋحتاعى اندەردى سالدى. ونىڭ ورىس تىلىندە «سترەلا اللاحا» اتتى جىر جيناعى, اسكەري تاقىرىپتاعى ولەڭدەر مەن اندەر ديسكىسى جارىق كوردى. «اۋە دەسانتتى اسكەر-2012 جىل. اسكەري داڭق جولىمەن» حالىقارالىق اۆتوجورىققا قاتىستى. بارد رەسەيدە جانە بەلارۋس رەسپۋبليكاسىندا وتكەن «اۆتومات پەن گيتارا» حالىقارالىق كونكۋرسىنىڭ ديپلومانتى, «ۆيۆات, قازاقستان!» رەسپۋبليكالىق بايقاۋىنىڭ لاۋرەاتى.
باردپەن كەزدەسۋگە اۋعانستان سوعىسىنىڭ ارداگەرلەرى قاتىسىپ, اسقار ساعىناەۆ وسى سوعىسقا قاتىسقاندار مەن ونى كورمەگەندەر اراسىندا كوپىر ورناتقانىن اتاپ ءوتتى. وسى سوعىستان قايتپاعانداردى ەسكە الدى.
