ەرتەڭ, 22 ماۋسىم كۇنى كونگرەسس-حولدا استانا قالاسى مەملەكەتتىك اكادەميالىق فيلارمونياسىنىڭ كورنەكتى كومپوزيتورى, بەلگىلى مۋزىكاتانۋشى احمەت جۇبانوۆتى ەسكە الۋعا ارنالعان «عاسىرلار پەرنەسى» اتتى كونتسەرتى وتەدى. قازاقستان رەسپۋبليكاسى تاۋەلسىزدىگىنىڭ 25 جىلدىعى اياسىندا وتەتىن كەشتە ايگىلى كومپوزيتوردىڭ شىعارمالارى ورىندالادى.
قازاق كسرو-نىڭ حالىق ءارتىسى, اكادەميك احمەت جۇبانوۆ ۇلتىمىزدىڭ مۋزىكا ونەرىن, كەشە وتكەن سال-سەرىلەرىمىزدىڭ مۇرالارىن ءبىر جۇيەگە كەلتىرۋ جاعىنان مول ەڭبەك ءسىڭىردى. باسقاسىن ايتپاعاندا, ونىڭ ەسىمى قازاقتىڭ تۇڭعىش كاسىبي حالىق اسپاپتارى وركەسترىنىڭ (قازىرگى قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترى) قۇرىلۋىنىڭ باسىندا تۇر. ول حالىق كۇيلەرىن وركەسترگە لايىقتاپ, نوتاعا ءتۇسىردى جانە قازاق مۋزىكاسىن كۇردەلى اسپاپتىق سيمفونيالىق شىعارمالارمەن بايىتتى. سونداي شىعارمالاردىڭ قاتارىندا «تاجىك ءبيى», «قازاق بيلەرى», «تولەگەن توقتاروۆ», «اريا», «ۆوكالدىق سيۋيتاسى», «اباي سيۋيتاسى», ت.ب. تۋىندىلار بار.
بۇعان قوسا, اكادەميكتىڭ «عاسىرلار پەرنەسى», «زامانا بۇلبۇلدارى», «قۇرمانعازى», «قازاق حالىق كومپوزيتورلارىنىڭ ءومىرى مەن شىعارماشىلىعى», «قازاق حالقىنىڭ مۋزىكالىق مادەنيەتى», «ءان-كۇي ساپارى» سياقتى ەڭبەكتەرى ۇلتتىق ونەرتانۋ عىلىمىنا سۇبەلى ۇلەس بولىپ قوسىلدى.
كومپوزيتور رەتىندە قازىر ەل اۋزىندا جۇرگەن «قارلىعاش» سياقتى كوپتەگەن ءان مەن كۇي, رومانستاردىڭ, حورلار مەن اسپاپتىق سيمفونيالىق جانە ۆوكالدىق شىعارمالاردىڭ اۆتورى اتاندى. لاتيف حاميديمەن بىرگە «اباي» (1944) جانە «تولەگەن توقتاروۆ» (1947) وپەرالارىن جازدى. «قۇرمانعازى» وپەراسىن باستاپ, ونى كەيىننەن قىزى عازيزا جۇبانوۆا اياقتادى.
كونتسەرتتە كومپوزيتوردىڭ شىعارمالارىن استانالىق فيلارمونيانىڭ قازاق وركەسترى (كوركەمدىك جەتەكشىسى جانە باس ديريجەرى, پروفەسسور, قر ەڭبەك سىڭىرگەن قايراتكەرى ايتقالي جايىموۆ, ديريجەرى, قر مادەنيەت قايراتكەرى نۇرلان بەكەنوۆ) ورىندايدى. ەندەشە, تاماشا كەشتەن قالىپ قويمايىق, اعايىن!
امانعالي قالجانوۆ
