«نۇر وتان» پارتياسىنىڭ استانا قالالىق فيليالى كوشپەلى قوعامدىق قابىلداۋ وتكىزدى. قابىلداۋدا بولعان ازاماتتار ءبىلىم, دەنساۋلىق, جۇمىسپەن قامتۋ, باسپانا, زەينەتاقى سەكىلدى شەشىمىن تاپپاي كەلە جاتقان الەۋمەتتىك ماسەلەلەرگە كومەك كورسەتۋىن سۇرادى.
«ازاماتتاردىڭ پارتيامىزعا دەگەن سەنىمى جىلدان-جىلعا ۇلعايىپ كەلە جاتىر. مۇنى قابىلداۋعا كەلىپ جاتقان ءوتىنىشتەردەن-اق بايقاۋعا بولادى. تەك وسى جىلدىڭ ءۇش ايىنىڭ وزىندە عانا «نۇر وتان» پارتياسىنىڭ استانا قالالىق فيليالىنا ءتورت جارىم مىڭنان استام ادام وتىنىشپەن كەلدى. ءبىرى ومىرىنە اراشا ىزدەسە, ءبىرى «بارماعان جەرىم, اشپاعان ەسىگىم قالمادى, ەشكىم جۇمىسقا العىسى كەلمەيدى» دەپ مۇڭ-مۇقتاجدارىن ايتىپ كەلىپ جاتادى. ەڭ قۋانىشتىسى, بۇل ارىز-شاعىمداردىڭ باسىم بولىگى وڭ شەشىمىن تابۋدا. بۇگىنگى كوشپەلى قابىلداۋدىڭ وزىنە جۇزدەن استام كەلدى. ولارعا 24 ءتۇرلى مەملەكەتتىك ورگان وكىلدەرى ءبىلىم, دەنساۋلىق, قۇقىق قورعاۋ سىندى الەۋمەتتىك ماسەلەلەر بويىنشا ءتۇسىندىرۋ جۇمىستارىن جۇرگىزىپ, قۇقىقتىق كەڭەس بەردى» دەيدى «نۇر وتان» پارتياسى استانا قالالىق فيليالى توراعاسىنىڭ ءبىرىنشى ورىنباسارى ەدىل مامىتبەكوۆ.
قابىلداۋدا بولعانداردىڭ ءبىرى – ۆاسيلي گروموۆ ەسىمدى قاريا. «قابىلداۋعا كوممۋنالدىق ماسەلە بويىنشا كىرگەن ەدىم. بىردەن پارتيا وكىلدەرى «استانا سۋ ارناسىنىڭ» ماماندارىنا جولىقتىردى. ولار سول جەردە وتىرىپ ماسەلەمدى ءاپ-ساتتە شەشىپ بەردى» دەيدى ول.
ارينە, قوعام بولعان سوڭ حالىق اراسىندا الەۋمەتتىك ءماسەلەلەردىڭ كەزدەسىپ قالۋى – زاڭدى قۇبىلىس. بىراق ولاردىڭ بارلىعى ءارتۇرلى سەبەپتەرمەن شەشىمىن تاپپاي قالىپ جاتادى. استانانىڭ مەملەكەتتىك ورگاندارى قالانىڭ ءار شەتىندە ورنالاسقاندىقتان ولارعا جەتەم دەگەنشە كەمى جارتى كۇن وتەدى. كوبىندە ۇزىن-سونار كەزەك تە بولادى. وسىنداي سەبەپتەرمەن كوپتەگەن ازاماتتاردىڭ, اسىرەسە, مۇمكىندىگى شەكتەۋلى قاريالاردىڭ ماسەلەلەرى شەشىمىن تاپپاي قالىپ جاتادى. ونىڭ ۇستىنە قاراپايىم ادامداردىڭ مەملەكەتتىك جانە جەكەمەنشىك ۇيىمداردىڭ باسشىلارىنا وتىنىشتەرىن تىكەلەي جەتكىزۋ مۇمكىندىگى بولا بەرمەيدى. «وسى ولقىلىقتى شەشۋ ماقساتىندا ازاماتتاردى كەڭسەدە ەمەس, اۋداندارعا بارىپ, تىپتەن, كوشەلەرگە شىعىپ قابىلداۋلار وتكىزىپ تۇرامىز. مەملەكەتتىك مەكەمەلەردىڭ ءبىرىنشى, ەكىنشى باسشىلارى دا
وسىندا. كەلگەن ازاماتتارعا پروكۋراتۋرادان باستاپ جەرگىلىكتى اكىمشىلىك ماماندارى كەڭەس بەرىپ جاتىر. بۇل – حالىق ءۇشىن وتە پايدالى شارا. جينالعان شاعىمدار بويىنشا ۇلكەن مونيتورينگ جاسالادى. اكىمشىلىكپەن بىرلەسىپ شارا قولدانىلادى. كوشپەلى قوعامدىق قابىلداۋ الداعى ۋاقىتتا ءداستۇرلى تۇردە جالعاسىن تابادى» دەپ اتاپ ءوتتى استانا قالالىق ءماسليحاتىنىڭ دەپۋتاتى اسحات ورالوۆ.
بۇركىت نۇراتاي
