بالا قۇقىقتارى تالقىلاندى
كەشە استانا قالاسىنىڭ ىشكى ىستەر دەپارتامەنتىندە بالا قۇقىقتارىن قورعاۋ ماسەلەلەرىنە قاتىستى جاڭالىقتار ءتۇسىندىرىلدى.
ءىس-شاراعا اتالمىش ۆەدومستۆوعا قاراستى جەرگىلىكتى پوليتسيا قىزمەتى باسشىسىنىڭ ورىنباسارى عوسمان جاكين, يۋۆەنالدى پوليتسيا باسشىسى باقىتگۇل ىسقاقوۆا جانە ءبىلىم باسقارماسىنىڭ باس مامانى توقتاش جۇماباي قاتىستى. ولار اعىمداعى جىلى 9 ساۋىردە پرەزيدەنت قول قويعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بالانىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى تانىستىردى. بۇل زاڭ كامەلەتكە تولماعانداردىڭ جىنىستىق تيىسپەۋشىلىگىنە قارسى قىلمىستاردى جاساعانى ءۇشىن ىلىنەتىن جاۋاپكەرشىلىكتى قاتاڭداتۋعا باعىتتالعان.
دالىرەك ايتساق, ەندىگى ۋاقىتتا كامەلەتكە تولماعانداردىڭ جىنىستىق تيىسپەۋشىلىگىنە قارسى قىلمىستاردى جاساعان ادامدارعا حيميالىق كاستراتسيا جازاسى قولدانىلادى. سونىمەن قاتار, جوعارىداعىداي قۇقىق بۇزۋشىلىقتارعا جول بەرگەندەر ءۇشىن شارتتى تۇردە سوتتاۋ, شىنايى وكىنۋىنە بايلانىستى قىلمىستىق جاۋاپتىلىقتان بوساتۋ, پروتسەستىك كەلىسىمنىڭ تالاپتارى ورىندالعان كەزدە قىلمىستىق جاۋاپتىلىقتان بوساتۋ, تاتۋلاسۋعا بايلانىستى قىلمىستىق جاۋاپتىلىقتان بوساتۋ, جازانىڭ وتەلمەگەن بولىگىن نەعۇرلىم جەڭىل جازا تۇرىمەن اۋىستىرۋ, اۋىر ءمان-جايلاردىڭ توعىسۋى سالدارىنان جازادان بوساتۋ سەكىلدى شارالار الىنىپ تاستالدى. بۇدان بولەك, ازاماتتىڭ بويىندا انىقتالعان پسيحيكالىق اۋىتقۋ جانە سەكسۋالدىق زورلىق-زومبىلىققا بەيىمدىلىگى تۋرالى اقپارات دارىگەرلىك قۇپياعا جاتقىزىلمايتىن
بولادى.
بوتاگوز ماراتقىزى