قازاقستان حالقى اسسامبلەياسىنىڭ قورى استانا قالاسىنىڭ قارتتار مەن مۇگەدەكتەرگە ارنالعان مەديتسينالىق-الەۋمەتتىك مەكەمەسىندە «شىن جۇرەكتەن» اتتى قايىرىمدىلىق اكتسياسىن وتكىزدى. تاۋەلسىزدىكتىڭ 25 جىلدىعىنا وراي ۇيىمداستىرىلعان شاراعا قاريالار, ۇلى وتان سوعىسىنىڭ ارداگەرلەرى, مۇمكىندىگى شەكتەۋلى جاندار جانە ونەرپاز جاستار قاتىستى.
– بۇگىن وسىنداي جايماشۋاق كۇنى اتا-اجەلەردىڭ كوڭىلىن كوتەرمەك نيەتپەن شاعىن توي جاساپ بەرمەكشى بولدىق. قازاقتىڭ باۋىرساعىن, وزبەكتىڭ پالاۋىن ءپىسىرىپ, ورىستىڭ ساماۋرىنىن قايناتتىق. بۇل ۇيدە 16 ءتۇرلى ۇلت وكىلى تۇرادى ەكەن. ولاردىڭ دا ءبىر اۋىق ءان-كۇي تىڭداپ, جاستارمەن ارالاسقىسى كەلەدى عوي. اسسامبلەيا جانىنداعى «جاراسىم» جاستار قاناتىنىڭ, ەۋرازيا ۇلتتىق ۋنيۆەرسيتەتىنىڭ, قازاق ۇلتتىق ونەر ۋنيۆەرسيتەتىنىڭ بايانشى, ساكسوفونشى, دومبىراشىلارىن جيىپ, الىپ كەلدىك, – دەدى اتالمىش قور جەتەكشىسى تالعات بالپىشەۆ. كوڭىلدى دۋمان بارىسىندا ءماجىلىس دەپۋتاتتارى نارينە ميكالەيان, سنەجاننا يماشەۆا, شاكير حاحازوۆ تا ءسوز سويلەپ, اق تىلەگىن جەتكىزدى.
