كەشە استانا قالاسىنىڭ اكىمى يمانعالي تاسماعامبەتوۆ رەسەيدىڭ كۋرسك وبلىسىنىڭ گۋبەرناتورى الەكساندر ميحايلوۆ باستاعان دەلەگاتسيانى قابىلدادى. ەلورداعا ساپارى بارىسىندا رەسەيلىك گۋبەرناتور كۋرسك شايقاسىنا 70 جىل تولۋىنا وراي 16 مايدانگەرگە ەستەلىك توسبەلگى تاپسىردى.
سالتاناتتى ءراسىمدى اشقان قالا اكىمى يمانعالي تاسماعامبەتوۆ كۋرسك قارقىندى دامىپ كەلە جاتقان وبلىس ەكەندىگىن, ەكى شاھار اراسىنداعى ساۋدا-ەكونوميكالىق, مادەني بايلانىستار بۇدان ءارى نىعايا تۇسەتىنىن اتاپ ءوتتى.
سونداي-اق, ۇزاق جول ءجۇرىپ, قازاقستاندىق ارداگەرلەرگە توسبەلگى تاپسىرۋعا ارنايى كەلگەن مارتەبەلى مەيماننىڭ ىزگى نيەتىنە العىسىن ءبىلدىردى.
ءسوز كەزەگىن العان الەكساندر ميحايلوۆ كۋرسك شايقاسىنىڭ تاريحىنا توقتالا كەلە, بۇل – ۇلى وتان سوعىسىنداعى جەڭىستى جاقىنداتقان شەشۋشى ۇرىستاردىڭ ءبىرى بولعانىن, وعان قازاقستاندىقتار دا بەلسەنە قاتىسىپ, ەرەن ەرلىك كورسەتكەنىن جەتكىزدى. گۋبەرناتوردىڭ ايتۋىنشا, كۋرسك شايقاسى كەزىندە ەلىمىزدە 70-تەن استام اسكەري بولىمدەر قۇرىلعان. ءار بەسىنشى قازاقستاندىق مايدانعا اتتانعان. بۇگىندە رەسپۋبليكامىزدا وسى «تانك شايقاسىنا» قاتىسقان 355 ارداگەر تۇرادى, سونىڭ 31-ءى – استانادا.
گۋبەرناتوردىڭ قولىنان ەستەلىك توسبەلگى العان قاريالار وزدەرىنە قۇرمەت كورسەتكەن مەيماندارعا ريزاشىلىعىن ءبىلدىردى.
قۇرامىندا مەملەكەتتىك ورگاندار مەن ءىرى كاسىپورىندار جانە اۋىل شارۋاشىلىعى مەكەمەلەرىنىڭ باسشىلارى, مادەنيەت, ءبىلىم بەرۋ سالالارىنىڭ قايراتكەرلەرى بار كۋرسك وبلىسى دەلەگاتسياسىنىڭ استاناعا ساپارى 17 قىركۇيەك كۇنى باستالعان. ءىس ساپار بارىسىندا ەلوردا اكىمدىگى مەن كۋرسك گۋبەرناتورى وبلىسى اراسىندا كەلىسسوزدەر جۇرگىزىلىپ, ىنتىماقتاستىق تۋرالى حاتتاماعا قول قويىلدى. اتالعان قۇجات تەڭ ءدارەجەلى ارىپتەستىك, ءوزارا سەنىم مەن ءتيىمدىلىك نەگىزىندە ساۋدا ساتتىق-ەكونوميكالىق, عىلىمي-تەحنيكالىق ءجانە گۋمانيتارلىق-مادەني بايلانىس سالاسىنداعى ىنتىماقتاستىقتى دامىتىپ, كەڭەيتە تۇسۋگە باعىتتالعان. اسىرەسە, قوس تاراپ كاسىپكەرلىك قىزمەت سۋبەكتىلەرى اراسىندا تىكەلەي بايلانىستار ورناتۋعا جاردەمدەسىپ, كۋرسك وبلىسى مەن استانادا بيزنەس-كەزدەسۋلەر, تۇساۋكەسەرلەر, كورمەلەر مەن جارمەڭكەلەر ۇيىمداستىرىپ, وتكىزۋگە قولايلى جاعدايلار جاساۋ تۋرالى كەلىسىم جاسادى.
سونداي-اق, حاتتاما قاتىسۋشىلارى ەكى ءوڭىردىڭ وقۋ ورىندارى اراسىنداعى ارىپتەستىك بايلانىستى كەڭەيتىپ, شىعارماشىلىق ۇجىمداردىڭ بارىس-كەلىسىن ۇيىمداستىرۋ, ءارتۇرلى ءىس-شارالاردى وتكىزۋ ارقىلى مادەنيەت, سپورت, تۋريزم مەن جاستار ساياساتى سالاسىندا ىنتىماقتاستى دامىتۋعا مۇددەلىلىك تانىتتى.
ساپار بارىسىندا دەلەگاتسيا استانا قالاسىنىڭ «بايتەرەك» مونۋمەنتى, تاۋەلسىزدىك سارايى, بەيبىتشىلىك جانە كەلىسىم سارايى, سونداي-اق, وپەرا جانە بالەت تەاترى, «حازىرەت سۇلتان» مەشىتى, ۇلتتىق انا مەن بالا ورتالىعى, «وقۋشىلار سارايى», «الاۋ» مۇز ايدىنى سارايى مەن «سارىارقا» ۆەلوترەگى سياقتى كورنەكتى ورىنداردى ارالادى.
قىمبات نۇرعالي
كۋرسك شايقاسىنىڭ قاھارماندارى
ەكىنشى دۇنيەجۇزىلىك سوعىستا كەڭەس وداعى اسكەرىنىڭ جەڭىستى جولىن باستاعان كۋرسك يىنىندەگى شايقاسقا بيىل 70 جىل تولىپ وتىر. استانا قالاسى قورعانىس ىستەرى جونىندەگى دەپارتامەنتتىڭ قۇجاتتارى نەگىزىندە 1994 جىلى جارىق كورگەن «ەسكە الۋ كىتابىندا» جان الىسىپ, جان بەرىسكەن بۇل ايقاستا 213 اقمولالىق جاۋىنگەر قازا تاۋىپ, ءىز-ءتۇسسىز جوعالعانى جازىلعان.
وسى كۇندەرى سول شايقاسقا قاتىسىپ, امان-ەسەن ورالعان 31 مايدانگەر ەلوردامىزدا تۇرادى.
وسىعان وراي بۇرناعى كۇنى بالالار جانە جاسوسپىرىمدەردىڭ ورتالىق كىتاپحاناسىندا «دوڭگەلەك ۇستەل» ءوتتى. ونى قالالىق ارداگەرلەر كەڭەسى, قورعانىس ىستەرى جونىندەگى دەپارتامەنت جانە ورتالىقتاندىرىلعان كىتاپحانالار جۇيەسى ۇيىمداستىردى. ءمانى مەن ماڭىزى جوعارى شارانى قالالىق ارداگەرلەر كەڭەسى توراعاسىنىڭ ورىنباسارى قىدىرباي بەيسەنوۆ اشىپ, جۇرگىزىپ وتىردى.
شارا بارىسىندا قورعانىس ىستەرى جونىندەگى دەپارتامەنت باستىعىنىڭ ورىنباسارى, پولكوۆنيك باقتيار پەرنەبەكوۆ كۋرسك يىنىندەگى شايقاس تاريحىنا شولۋ جاسادى. قازاقستانداعى رەسەي ەلشىلىگىنىڭ وكىلى نيكولاي مالتسەۆ كەڭەس وداعىنىڭ قۇرامىندا بولعان ەلدەردىڭ بارىنە ورتاق تاريحتى قاستەرلەۋ ماسەلەسىن قوزعادى. ءتورت جىلعى قىرعىن ىشىندە جۇرگەن مايدانگەرلەر وزدەرىنىڭ ەستەلىكتەرىمەن ءبولىستى. ولاردىڭ اراسىندا كۋرسك يىنىندەگى ۇرىستارعا قاتىسقان احات بەكمادياۇلى, قاماتاي توقاباەۆ, ميحايل كۋليكوۆ, ەكاتەرينا پلۋجنيكوۆا جاس ۇرپاققا ونەگە بولاتىن اڭگىمەلەردى ايتتى.
س. نۇرماعامبەتوۆ اتىنداعى «جاسۇلان» رەسپۋبليكالىق مەكتەبىنىڭ ونەرلى ۇلاندارى وتاندى قورعاۋ, تۋعان جەر تاقىرىبىنداعى اندەردى شىرقادى. سونداي-اق, №25 ورتا مەكتەپتىڭ كادەت كلاسى وقۋشىلارى دا سوعىس تاقىرىبىنداعى ولەڭدەر وقىدى.
امانعالي قالجانوۆ
