نۇرسۇلتان نازارباەۆ پولشا رەسپۋبليكاسىنىڭ پرەزيدەنتى اندجەي دۋدامەن كەلىسسوز وتكىزدى
سالتاناتتى كەزدەسۋ راسىمىنەن سوڭ ەكى ەلدىڭ كوشباسشىلارى پولشا پرەزيدەنتىنىڭ رەزيدەنتسياسىندا شاعىن جانە كەڭەيتىلگەن قۇرامدا كەلىسسوزدەر وتكىزدى. وندا ساۋدا-ەكونوميكا, ينۆەستيتسيا, اۋىل شارۋاشىلىعى, ترانزيت-كولىك جانە مادەني-گۋمانيتارلىق سالالارداعى ءوزارا ءىس-قيمىلدى نىعايتۋ ماسەلەلەرى تالقىلاندى.
مەملەكەتتەر باسشىلارى ءوزارا مۇددەلىلىك قالىپتاسقان بىرقاتار باعىتتار بويىنشا پەرسپەكتيۆالى جوبالاردىڭ ىسكە اسىرىلۋ ماسەلەلەرىن قاراستىردى.
بۇدان بولەك, تاراپتار حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى.
قازاقستان پرەزيدەنتى پولشا كوشباسشىسىنا ەلىنە شاقىرعانى جانە قوناقجايلىق كورسەتكەنى ءۇشىن العىس ايتىپ, ەكىجاقتى قارىم-قاتىناستىڭ دامۋىندا ىلگەرىلەۋشىلىك, سونداي-اق ونىڭ اياسىن كەڭەيتە ءتۇسۋ ءۇشىن زور الەۋەت بار ەكەنىن اتاپ ءوتتى.
ا.دۋدا نۇرسۇلتان نازارباەۆتىڭ پولشاعا بۇل ساپارى ەلدەر اراسىنداعى سەرىكتەستىكتىڭ جاندانا تۇسكەنىن كورسەتىپ وتىرعانىن ايتتى. پولشا پرەزيدەنتى ەكى ەلدىڭ مۇددەلەرى ورتاقتىعىنا جانە ەكىجاقتى ءىس-قيمىلدى, سونىڭ ىشىندە كولىك-لوگيستيكا جانە مۇناي-گاز سالالارىنداعى ىنتىماقتاستىقتى نىعايتۋدىڭ اۋقىمدى پەرسپەكتيۆالارى بار ەكەنىنە نازار اۋداردى.
سونداي-اق, ا.دۋدا پولشانىڭ الداعى «ەكسپو-2017» حالىقارالىق كورمەسىنە بەلسەنە قاتىساتىنىن جانە بۇل ءىس-شاراعا جەكە ءوزىنىڭ كەلۋگە ءازىر ەكەنىن جەتكىزدى.
***
كەلىسسوزدەر قورىتىندىسى بويىنشا تومەندەگىدەي قۇجاتتارعا قول قويىلدى:
– قازاقستان رەسپۋبليكاسى مەن پولشا رەسپۋبليكاسى اراسىنداعى ەكونوميكالىق ىنتىماقتاستىق تۋرالى دەكلاراتسيا;
– قازاقستان رەسپۋبليكاسىنىڭ ۇكىمەتى مەن پولشا رەسپۋبليكاسىنىڭ ۇكىمەتى اراسىنداعى تۇلعالاردى رەادميسسيالاۋ تۋرالى كەلىسىم;
– قازاقستان رەسپۋبليكاسىنىڭ ۇكىمەتى مەن پولشا رەسپۋبليكاسىنىڭ ۇكىمەتى اراسىنداعى اۋىل شارۋاشىلىعى سالاسىنداعى ىنتىماقتاستىق تۋرالى كەلىسىم;
– «قازاقستان دامۋ بانكى» اق مەن پولشانىڭ ۇلتتىق ەكونوميكا بانكى اراسىنداعى نەگىزدەمەلىك كەلىسىم.
