جاڭا وقۋ جىلى قارساڭىندا قالالىق الاڭدا مەكتەپ جابدىقتارىن ساتۋعا ارنالعان جارمەڭكە ءوتتى
ەكى كۇنگە سوزىلعان شاراعا 10 مىڭداي ادام قاتىسىپ, 17 ملن 900 مىڭ تەڭگەنىڭ تاۋارى ساتىلدى.
جىل سايىن داستۇرگە اينالعان جوبا مەكتەپكە كەرەك جابدىقتاردى حالىققا تومەندەتىلگەن باعامەن ۇسىنۋدى كوزدەيدى. مەكتەپ جارمەڭكەسىندە استانا, الماتى, قاراعاندى جانە شىمكەنت قالالارىنىڭ وندىرۋشىلەرى ءوز تاۋارلارىن ۇسىندى. 21 ساۋدا ورنى قۇرىلىپ, وندا مەكتەپ فورماسى, سپورتتىق كوستيۋمدەر مەن اياق كيىمدەر جانە كەڭسە زاتتارى مەن كىتاپتار 10-50% جەڭىلدىكپەن ساتىلدى.
– بيىلعى جارمەڭكەگە 13 وتاندىق جانە 1 شەتەلدىك كاسىپورىن قاتىستى. تۇرمىسى تومەن جانە كوپبالالى وتباسىلارعا كومەكتەسۋگە باعىتتالعان شارادا مەكتەپ قۇرالدارى مەن كيىمدەر نارىقتاعى باعادان ارزان ساتىلدى. ءجارمەڭكە كەزىندە حالىققا كەڭەس بەرەتىن قوعامدىق قابىلداۋ ءبولىمى جۇمىس ىستەيدى. ونداعى ماماندار مەكتەپكە قابىلداۋ, وقۋلىق, كيىم ماسەلەسىنە قاتىستى كوپشىلىكتىڭ ساۋالدارىنا جاۋاپ بەردى, – دەيدى قالالىق ءبىلىم باسقارماسىنىڭ كامەلەت جاسقا تولماعانداردىڭ قۇقىقتارىن قورعاۋ ءبولىمىنىڭ باسشىسى ءلاززات ورىنباساروۆا.
گۇلميرا شارحانقىزى
