«استانا تاڭداۋى» بايقاۋىنا ۇسىنىلىپ وتىرعان ازاماتتاردىڭ ءبىرى – №1 اۆتوبۋس پاركىنىڭ جۇرگىزۋشىسى قانات كۇلتاەۆ.
كۇننەن-كۇنگە حالقىنىڭ سانى ارتقان سايىن استانادا جولاۋشىلار دا, كولىك تە كوپ. كولىك سالاسىنىڭ قىزمەتكەرلەرى جۇرتشىلىقپەن تىكەلەي جۇمىس ىستەگەننەن كەيىن ارىز-شاعىمدار دا از بولماي جاتادى كەيدە. اسىرەسە, اۆتوبۋس جۇرگىزۋشىلەردىڭ «جىن قۋعانداي» جۇرىسىنە, مادەنيەتىنە نارازىلىق بىلدىرۋشىلەر جەتكىلىكتى. ءتىپتى, بۇگىندە جول ءجۇرۋ ەرەجەسىن قاتاڭ ساقتايتىن ماماندار جوقتاي كورىنەتىن بولدى. سويتسەك, بۇنىمىز اعاتتىق ەكەن. جۇرگىزۋشىلەردىڭ ىشىندە دە قانشا جىل جۇمىس ىستەسە دە ارتىنا بىردە-ءبىر رەت ءسوز ەرتپەگەن, تەك جولاۋشىلاردىڭ العىسىن ارقالاپ كەلگەن ازاماتتار بار كورىنەدى. سونىڭ ءبىرى – №10 اۆتوبۋستىڭ جۇرگىزۋشىسى قانات كۇلتاەۆ.
ول 1968 جىلى اقمولا وبلىسى, قورعالجىن اۋدانىنىڭ جانتەكە اۋىلىندا دۇنيەگە كەلگەن. سول جەردەگى قىزىلتۋ ورتا مەكتەبىنەن ءبىلىم نارىمەن سۋسىنداعان قانات حامزەۇلى 1986 جىلى وقۋىن ءتامامداپ, وتان الدىنداعى ازاماتتىق بورىشىن وتەۋگە اتتانادى. تۋعان ەلىنە ورالعاننان كەيىن № 1 اۆتوبۋس پاركىنىڭ جانىنداعى ءجۇرگىزۋشىلەر كۋرسىنا قابىلدانادى. سوناۋ 1989 جىلدان بەرى وسى اۆتوبۋس پاركىندە قىزمەت اتقارىپ كەلەدى. بۇگىنگە دەيىنگى 24 جىل ىشىندە ول ءوزىنىڭ ماماندىعىنا كىر كەلتىرمەگەن ەكەن.
بىلە بىلگەنگە اۆتوبۋس جۇرگىزۋشىسى – قيىندىعى كوپ ماماندىق. تاڭمەن تالاسا تۇرىپ, كەش قارايعانعا دەيىن تەحنيكامەن الىسۋ – تەمىردەي جۇيكەنى, اسقان توزىمدىلىكتى قاجەت ەتەدى. ۋاقىتتىڭ قادىرىن ۇعىناتىنداردىڭ ءبىرى وسى جۇرگىزۋشىلەر مە دەپ قالدىق. قانات حامزەۇلىنىڭ ۋاقىتى ساناۋلى, ولشەۋلى. بىزبەن جولىعۋعا جارتى ساعاتتى ارەڭ تاپتى. كۇنى بويى اۆتوبۋستا جۇرەتىن ول تۇسكى اس مەزگىلىندە عانا ءسال دامىلدايدى ەكەن. بىراق, وعان كەيىپ جۇرگەن قانات كۇلتاەۆ جوق. اۆتوبۋس جۇرگىزۋشىسى بولىپ, استانالىق جولاۋشىلاردى تاسىمالداعانىنا ەش وكىنبەيدى. ءاردايىم كولىگىنە مىنۋشىلەرگە جايدارى, جارقىن, جىلى قاباق تانىتادى. جاۋاپكەرشىلىكتى بارىنەن دە بيىك قوياتىن ول جول ءجۇرۋ ەرەجەلەرىن قاتاڭ ساقتايدى. «مەن ءۇشىن ەڭ باستىسى – جولاۋشىلاردى امان-ەسەن دىتتەگەن جەرىنە جەتكىزۋ», – دەيدى جۇرگىزۋشى. قانات حامزەۇلى جۇمىستان سەبەپسىز قالىپ نەمەسە كەشىگىپ كورگەن ەمەس. ۇجىم مۇشەلەرى اراسىندا دا ەرەكشە قۇرمەتكە يە. ادال قىزمەتىنىڭ وتەۋى رەتىندە كوپتەگەن ماراپاتتاۋلارعا دا يە بولدى.
قانات كۇلتاەۆ وتباسىندا ەكى بالا تاربيەلەپ وتىرعان ارداقتى اكە. قولى قالت ەتسە, ۆولەيبول مەن حوككەي ويناعاندى جاقسى كورەدى. ول №1 اۆتوبۋس پاركىندە جانە قالا اۋماعىندا وتەتىن مادەني-رۋحاني شارالارعا بەلسەنە اتسالىسادى.
جاس كەزىنەن جۇرگىزۋشى بولۋدى ارمانداعان قانات حامزەۇلى ماماندىعىن ەرەكشە جاقسى كورەدى. كاسىبىنە دەگەن وسى ماحابباتى ونى شەبەر جۇرگىزۋشى اتاندىردى. «ءوز ءىسىن شەبەر مەڭگەرگەن مامان يەسى – وسكەلەڭ ۇرپاققا ۇلگى. سوندىقتان, ول «استانا بايقاۋىنا» جەڭىمپاز بولۋعا ابدەن لايىق», – دەيدى ارىپتەستەرى.
اينۇر نۇرماعانبەت,
قوستاناي مەملەكەتتىك ۋنيۆەرسيتەتىنىڭ 2-كۋرس ستۋدەنتى
