استانا قالاسىنىڭ ىشكى ساياسات باسقارماسى جانە «مەيىرىم-دەمەۋ» ورتالىعى «ورالمانداردى الەۋمەتتىك بەيىمدەۋ جانە قولداۋ قىزمەتىن ۇيىمداستىرۋ» اتتى الەۋمەتتىك جوباسىن دەمالىس كۇنى دە جالعاستىردى.
ورالمانداردىڭ قاتىسۋىمەن وتكەن ترەنينگتى جۇمىسپەن قامتۋ جانە الەۋمەتتىك باعدارلامالار باسقارماسىنىڭ الماتى اۋدانى بويىنشا ءبولىم باسشىسى ايات ورىنبەكوۆا جۇرگىزدى. ول جينالعاندارعا حالىقتى الەۋمەتتىك قورعاۋ جۇيەسىندە اتقارىلىپ جاتقان جۇيەلى جۇمىستار, ونىڭ ىشىندە ەڭبەك نارىعى, حالىقتى جۇمىسپەن قامتۋ ماسەلەسى, سونداي-اق, تۇرمىس جاعدايى تومەن ازاماتتارعا, مۇگەدەكتەرگە, جۇمىسسىزدارعا, زەينەتكەرلەرگە بەرىلەتىن الەۋمەتتىك كومەك پەن قولداۋ تۋرالى ءتۇسىندىردى. ماسەلەن, «مەملەكەتتىك اتاۋلى الەۋمەتتىك كومەك» تۋرالى زاڭعا سايكەس وتباسىنىڭ جان باسىنا شاققانداعى ورتاشا ايلىق تابىسى بەلگىلەنگەن كەدەيلىك شەگىنەن تومەن وتباسىلارعا اتاۋلى الەۋمەتتىك كومەك تاعايىندالادى. سونىمەن قاتار, 18 جاسقا دەيىنگى بالالارى بار وتباسىلارعا بەرىلەتىن مەملەكەتتىك جاردەماقى مەن تۇرعىن ءۇي الۋ ءتارتىبىن ءتۇسىندىرىپ بەردى.
گۇلميرا شارحانقىزى
