سىبايلاستىق بار جەردە, ساپالى قۇرىلىس جوق
ەلوردا اكىمدىگىندە قۇرىلىس سالاسىنداعى سىبايلاس جەمقورلىقتىڭ الدىن الۋ ماسەلەسىنە قاتىستى «دوڭگەلەك ۇستەل» ءوتتى. استانا قالاسى بويىنشا مەملەكەتتىك ساۋلەت-قۇرىلىس باقىلاۋ جانە ليتسەنزيالاۋ دەپارتامەنتىنىڭ ۇيىمداستىرۋىمەن وتكەن شاراعا قالانىڭ بىرقاتار باسقارمالارى مەن قۇرىلىس جانە جوبالاۋ كومپانيالارىنىڭ وكىلدەرى قاتىستى.
استانا قالاسى بويىنشا مەملەكەتتىك ساۋلەت-قۇرىلىس باقىلاۋ جانە ليتسەنزيالاۋ دەپارتامەنتىنىڭ ديرەكتورى قايرات بيسەمباەۆ قۇرىلىس سالاسىنداعى سىبايلاس جەمقورلىققا جول بەرمەس ءۇشىن مەملەكەتتىك قىزمەتكەرلەر اراسىندا ءتۇسىندىرۋ جۇمىستارىن جەتىلدىرۋ قاجەتتىگىنە نازار اۋداردى. ماسەلەن, جىل باسىنان بەرى ەلوردالىق قارجى پوليتسەيلەرى 64 جەمقورلىق قىلمىستى انىقتاعان. زاڭبۇزۋشىلىققا جول بەرگەن استانا قالاسى بويىنشا توتەنشە جاعدايلار دەپارتامەنتىنىڭ 75 قىزمەتكەرى جانە قىلمىستىق اتقارۋ جۇيەسى دەپارتامەنتىنىڭ ەكى مامانى جۇمىستان شىعارىلعان. ەكونوميكالىق جانە سىبايلاس جەمقورلىققا قارسى كۇرەس دەپارتامەنتىنىڭ وكىلى ناۋان ءجۇنىسوۆتىڭ ايتۋىنشا, جىل باسىنان بەرى ىشكى ىستەر ورگاندارىنىڭ بىرنەشە قىزمەتكەرى قىلمىستىق جاۋاپقا تارتىلعان. «ونىڭ ىشىندە ءتۇرلى قۇرىلىمداردىڭ جەتەكشىلەرى كەزدەسەدى. ماسەلەن, استانا قالاسى بويىنشا قىلمىستىق اتقارۋ جۇيەسى دەپارتامەنتى باسشىسىنىڭ ورىنباسارى مەيرامبەكوۆ, شورتاندى قالاسى ىشكى ىستەر ءبولىمى باسشىسىنىڭ ورىنباسارى بيگاحمەتوۆ, كولىكتەگى ىشكى ىستەر دەپارتامەنتى تىل باسشىسىنىڭ ورىنباسارى وسپانوۆ جانە الماتى جانە سارىارقا اۋداندىق ىشكى ىستەر ورگاندارىنىڭ قىزمەتكەرلەرى دە بار» – دەيدى ول.
جيىندا مەملەكەتتىك قىزمەت ىستەرى اگەنتتىگىنىڭ استانا قالاسى بويىنشا دەپارتامەنتىنىڭ باسشىسى تىلەگەن قاسكين تارتىپتىك كەڭەس وتىرىستارىندا قارالعان ماسەلەلەردى اتاپ ءوتتى. ەلباسىنىڭ سىبايلاس جەمقورلىقپەن ىمىراسىز كۇرەس ماسەلەسى جايلى تاپسىرمالارىن ورىنداۋدا اۋماقتىق جانە جەرگىلىكتى اتقارۋشى مەملەكەتتىك ورگانداردىڭ جۇمىسىنا كەڭىنەن توقتالدى.
سوڭعى التى ايدىڭ ىشىندە تارتىپتىك كەڭەس وتكىزگەن ءتورت وتىرىستا بارلىعى 15 ءىس قارالعان ەكەن. كەڭەس وتىرىسىنىڭ قورىتىندىسى بويىنشا توعىز لاۋازىمدى تۇلعا جاۋاپكەرشىلىككە تارتىلعان. ونىڭ ىشىندە 5 قىزمەتكەرگە قاتاڭ سوگىس بەرىلگەن. ءبىر ادام قىزمەتىنە تولىق سايكەس ەمەستىگى تۋرالى ەسكەرتۋ السا, ءۇش قىزمەتكەر اتقاراتىن لاۋازىمىنان بوساتىلعان كورىنەدى.
جيىن سوڭىندا قۇرىلىس كومپانيالارىنىڭ وكىلدەرى دە ءوز ويلارىمەن ءبولىستى. سىبايلاس جەمقورلىق بولعان جەردە ساپالى قۇرىلىس جۇرگىزىلمەيتىنىن العا تارتقان ولار بۇل ماسەلەگە بيلىك تاراپىنان قاداعالاۋ جۇمىستارىن بارىنشا كۇشەيتۋ كەرەكتىگىن ايتتى.
گۇلميرا ايماعانبەت