مەملەكەتتىڭ وتباسى ساياساتى – قازاقستاننىڭ الەۋمەتتىك ساياساتىنىڭ اجىراماس بولىگى. ءارى ول وتباسىنىڭ ءومىر ءسۇرۋ ساپاسىن, جاعدايدى جاقسارتۋعا باعىتتالعان ۇيىمداستىرۋشىلىق, ەكونوميكالىق, قۇقىقتىق, عىلىمي, اقپاراتتىق جانە كادرلىق قامتاماسىز ەتۋ ۇستانىمدارى, باعالارى مەن شارالارى جۇيەسىن بىلدىرەدى.
مەملەكەتتىك ساياساتتىڭ ماقساتى – وتباسىن قولداۋ, نىعايتۋ جانە قورعاۋ, وتباسى مۇشەلەرىنىڭ فيزيكالىق, ينتەللەكتۋالدىق, رۋحاني, ادامگەرشىلىك دامۋىنا قولايلى جاعداي جاساۋ, انا بولۋدى, اكەلىكتى جانە بالالىق شاقتى قورعاۋ. قازاقستان 1979 جىلى 18 جەلتوقساندا ايەلدەرگە قاتىستى كەمسىتۋشىلىكتىڭ بارلىق ءتۇرىن جويۋ تۋرالى كونۆەنتسياعا قوسىلدى. وسى حالىقارالىق قۇقىقتىق اكتىنىڭ 3-بابىندا: «ايەلدەرگە ادام قۇقىقتارى مەن نەگىزگى بوستاندىقتارىن ەرلەرمەن تەڭدىك نەگىزىندە ىسكە اسىرۋىنا جانە پايدالانۋىنا كەپىلدىك بەرۋ ءۇشىن قاتىسۋشى مەملەكەتتەر بارلىق سالالاردا, جانە ءىشىنارا العاندا ساياسي, الەۋمەتتىك, ەكونوميكالىق جانە مادەني سالالاردا ايەلدەردىڭ جان-جاقتى دامۋى مەن پروگرەسىن قامتاماسىز ەتۋ ءۇشىن بارلىق ءتيىستى زاڭنامالىق شارالاردى قوسا قابىلدايدى» دەپ كورسەتىلەدى.
2012-2022 جىلدارعا ارنالعان گەندەرلىك تەڭدىك ستراتەگياسىنىڭ قابىلدانۋى مەن جۇزەگە اسىرىلۋى ايەلدەردىڭ عانا ەمەس, ەرلەردىڭ دە قۇقىقتارى مەن مۇمكىندىكتەرى ماسەلەلەرىنە تەڭ دارەجەدە قاراۋعا مۇمكىندىك بەردى. گەندەرلىك ستراتەگيانى ىسكە اسىرۋدىڭ اياقتالۋى مەملەكەتتىك گەندەرلىك ساياساتتىڭ جاڭا كەزەڭىن تۇراقتى دامۋدىڭ حالىقارالىق تەندەنتسيالارىمەن, ۇلتتىق ستراتەگيالىق باسىمدىقتارىمەن جانە الەۋمەتتىك ساياساتتىڭ جاڭا پرينتسيپتەرىمەن بايلانىستىرۋعا مۇمكىندىك تۋعىزدى. وسىلايشا, قازىرگى زامانعى تۇراقتى وتباسىنىڭ قالىپتاسۋى مەن گەندەرلىك تەڭدىككە قول جەتكىزۋ جاعدايىن قالىپتاستىرۋ بۇل قوعامدى الەۋمەتتىك جاڭعىرتۋدىڭ اجىراماس پروتسەسى ەكەندىگى ايقىن بولىپ وتىر. 2016 جىلعى 6 جەلتوقساندا قازاقستاندا 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسى بەكىتىلدى. تۇجىرىمداما قر كونستيتۋتسياسى, «قازاقستان-2050» ستراتەگياسى, «100 ناقتى قادام» ۇلت جوسپارى, قازاقستاننىڭ الەمدەگى ەڭ دامىعان 30 ەلدىڭ قاتارىنا كىرۋ تۇجىرىمداماسى, ايەلدەرگە قاتىستى ديسكريميناتسيانىڭ بارلىق ءتۇرىن جويۋ تۋرالى بىرىككەن ۇلتتار ۇيىمىنىڭ كونۆەنتسيالارى جانە باسقا دا راتيفيكاتسيالانعان حالىقارالىق شارتتار مەن كەلىسىمدەر نەگىزىندە ازىرلەندى. ءبىزدىڭ ەلىمىزدە وتباسى, ايەلدەر مەن بالالار ماسەلەلەرى, قوعامداعى وتباسىنىڭ ماڭىزىن ءتۇسىنۋ, ونىڭ جاڭا ۇرپاقتى تاربيەلەۋدەگى ءرولى, الەۋمەتتىك تۇراقتىلىق پەن پروگرەستى قامتاماسىز ەتۋ, وتباسى مەن بالالاردىڭ مۇددەسىن ەسكەرۋ قاجەتىن مويىنداۋ, سونداي-اق, ولاردى الەۋمەتتىك قولداۋدىڭ ارنايى شارالارىن قابىلداۋ ماسەلەلەرى بويىنشا جەتكىلىكتى زاڭنامالىق بازا قۇرىلدى.
استانا قالاسىنىڭ الماتى اۋداندىق سوتى گەندەرلىك ساياسات ماسەلەلەرى بويىنشا تانىستىرۋ جانە ءتۇسىندىرۋ سيپاتىنداعى راسىمدەردى بەلسەندى تۇردە جۇزەگە اسىرادى, وسى جۇمىسقا بۇقارالىق اقپارات قۇرالدارى تارتىلادى, سۋديالار ماقالالار مەن ماتەريالدار جاريالايدى, قوعامنىڭ, ونىڭ ىشىندە قۇقىقتىق قوعامداستىقتىڭ قاتىسۋىمەن ءارتۇرلى ءىس-شارا (سەمينار, دوڭگەلەك ۇستەل, ءدارىس جانە ت. ب.) وتكىزەدى.
ايزادا سەردالى, ل.گۋميلەۆ اتىنداعى ەۋرازيا ۇلتتىق
ۋنيۆەرسيتەتىنىڭ ستۋدەنتى
