ەلوردادا ەڭ الدىمەن, قوزعالىسى قارقىندى, جاڭا الەۋمەتتىك نىساندارى (كىرمە جولدار) بار كوشەلەر مەن ورىندار جوندەلەدى. بۇل تۋرالى استانا اكىمى جەڭىس قاسىمبەك ءمالىم ەتتى.
«كوكتەم مەزگىلىنىڭ باستالۋىمەن كەيبىر كوشەلەردە اسفالت قارمەن بىرگە اعىپ كەتكەندەي اسەر قالدىرادى. جولداردىڭ ءبارى دەرلىك ساپالى سالىنباعان. تۇرعىندار تاراپىنان دا شاعىمدار ءتۇسىپ جاتىر. جاۋاپتى باسقارما جول قىزمەتكەرلەرىمەن بىرلەسە جوندەۋدەن وتەتىن جولدار مەن كوشەلەردىڭ ساپاسىن ءارى ۇزاققا شىدامدىلىعىن قامتاماسىز ەتۋى كەرەك. وتىنىشتەردى ەسكەرە وتىرىپ, كوشەلەر ءتىزىمىن جاڭارتۋ قاجەت. ەڭ الدىمەن, قوزعالىسى قارقىندى, جاڭا الەۋمەتتىك نىساندارى (كىرمە جولدار) بار ورىنداردى جوندەۋ قاجەت» دەدى قالا باسشىسى.
سونداي-اق ج.قاسىمبەك جاڭادان سالىنىپ جاتقان اۋدانداردا ينجەنەرلىك ينفراقۇرىلىمى مەن ۇيلەردىڭ قۇرىلىسى بىتكەننەن كەيىن عانا جولدارى سالىناتىنىن جەتكىزدى. «سول سياقتى ەلدى مەكەندەردە بۇرىن مۇلدەم اسفالتتالماعان كوشەلەر دە بار. ال جاڭادان سالىنىپ جاتقان اۋدانداردا ينجەنەرلىك ينفراقۇرىلىمى مەن ۇيلەردىڭ قۇرىلىسى بىتكەننەن كەيىن عانا جولدارى سالىنادى. وعان دەيىن ۋاقىتشا توسەممەن قامتاماسىز ەتۋ قاجەت. جول جۇمىسىنىڭ ماۋسىمى قىسقا. سول سەبەپتى ۋاقىت تا تىعىز. ءبىز ساپاسىز ورىندالعان جۇمىستاردى قابىلدامايمىز» دەپ ەسكەرتتى اكىم.
