بيىلعى قاڭتار-اقپان ايلارىندا رەسپۋبليكادا 438 سىبايلاس جەمقورلىق قىلمىس تىركەلدى. بۇل وتكەن جىلدىڭ سالىستىرمالى ۋاقىتىنا قاراعاندا 0,7 پايىزعا ارتىق كورسەتكىش دەپ جاريالاندى finprom.kz پورتالىندا.
سىبايلاس جەمقورلىق قىلمىستاردىڭ باسىم بولىگى الماتى مەن استانادا ارقايسىسىندا 51 جاعدايدان تىركەلگەن.
انتيليدەرلەر قاتارىندا قوستاناي (40 جاعداي) جانە تۇركىستان (37 جاعداي) وبلىستارى, شىمكەنت (36 جاعداي) قالاسى بار.
سەكتورداعى قىلمىستاردىڭ ەڭ از سانى شىعىس قازاقستان, اباي جانە ۇلىتاۋ وبلىستارىندا بايقالعان.
سىبايلاس جەمقورلىق قىلمىستاردىڭ 37,4%-ى پارا بەرۋمەن بايلانىستى بولدى. جىل باسىنان بەرى 164 جاعداي تىركەلدى. بۇل وتكەن جىلعى كورسەتكىشكە قاراعاندا 45,1%-عا ارتىق.
بۇدان باسقا پارا الۋ (141 جاعداي), سىبايلاس جەمقورلىق سالاسىنداعى الاياقتىق (39 جاعداي), سەنىپ تاپسىرىلعان بوتەن مۇلىكتى يەمدەنۋ نەمەسە جىمقىرۋ (24 جاعداي) جانە پاراقورلىققا دەلدال بولۋ (22 جاعداي) جاعدايلارى دا بار.
كۇدىكتى دەپ تانۋ تۋرالى قاۋلى شىعارىلعان ادامداردىڭ سانى 301-ءدى قۇرادى. بۇل وتكەن جىلعا قاراعاندا 25,4%-عا كوپ. ونىڭ ىشىندە قىلمىس جاساعان 243 ادام انىقتالىپ, 159 ادامنىڭ ءىسى سوتقا بەرىلدى.
رەسۋرستىڭ جازۋىنشا, مەملەكەتتىك ورگانداردىڭ قىزمەتشىلەرى اراسىندا سىبايلاس جەمقورلىق قىلمىستارىن ىشكى ىستەر ورگاندارىنىڭ قىزمەتكەرلەرى ءجيى جاساعان: 43 ادام. اكىمدىكتەر مەن ولاردىڭ قۇرىلىمدىق بولىمشەلەرىنىڭ قىزمەتكەرلەرى (26 ادام), ءىىم قىلمىستىق-اتقارۋ جۇيەسى كوميتەتى (3 ادام), قارجى مونيتورينگى اگەنتتىگى (3 ادام), دەنساۋلىق ساقتاۋ مينيسترلىگى (3 ادام) جانە يدم (3 ادام) قىزمەتكەرلەرى دە بار.
