قامقورلىق جاساپ, قايىرىمدىلىق كورسەتتى
جاڭا جىل مەرەكەسى قارساڭىندا ەسىل اۋدانى اكىمىنىڭ اپپاراتى «كونسوليدەيتەد كونتراكتينگ ينجيرينگ ەند پروكيۋرمەنت س.ا.ل.-وفشور» كومپانياسىنىڭ فيليالىمەن بىرلەسىپ, قايىرىمدىلىق شارا ۇيىمداستىردى.
الدىمەن ەسىل اۋدانى اكىمىنىڭ اپپارات باسشىسى بەرىك تورەبەكوۆ اۋدان اكىمىنىڭ اتىنان جينالعانداردى كەلە جاتقان جاڭا جىل مەرەكەسىمەن قۇتتىقتاپ, وتباسىلارىنا اماندىق, ەلىمىزگە تىنىشتىق تىلەدى. استاناداعى «ابۋ دابي پلازا» كەشەنىنىڭ قۇرىلىس جۇمىستارىن جۇرگىزىپ جاتقان اتالمىش كومپانيانىڭ اتقارۋشى ديرەكتورى مۇرات جۇمانوۆ ەلىمىزدىڭ ۇكىمەتى مەن بىرىككەن اراب ءامىرلىكتەرى اراسىنداعى كەلىسىم بويىنشا باس قالادا اتقارىلىپ جاتقان جۇمىستارعا توقتالدى. ونىڭ ايتۋىنشا, بۇگىنگى تاڭدا كەشەندە بەس عيماراتتىڭ قۇرىلىسى جۇرگىزىلىپ
جاتىر. سولاردىڭ ءبىرى ازياداعى ەڭ بيىك, ەڭ ۇلكەن 88 قاباتتى عيمارات بولادى. قازىر كاسىپورىندا ەلىمىزدىڭ تۇكپىر-تۇكپىرىنەن, اتاپ ايتساق, اتىراۋ, باتىس قازاقستان وبلىسىنان, سولتۇستىك جانە وڭتۇستىك وڭىرلەردەن جانە وسى اقمولا ماڭىنان كەلگەن قانداستارىمىزبەن بىرگە شەتەل ازاماتتارى, بارلىعى 750 ادام ەڭبەك ەتۋدە. كەلەشەكتە ولاردىڭ سانى 7 مىڭعا جەتەدى دەپ جوسپارلانۋدا.
اۋدان اۋماعىندا تۇراتىن جالعىزىلىكتى زەينەتكەرلەر مەن كوپبالالى, تۇرمىسى ناشار وتباسىلار از ەمەس. مەرەكە كۇندەرى جانى جومارت, پەيىلى كەڭ ازاماتتاردىڭ قولداۋىمەن ولارعا قايىرىمدىلىق كورسەتىلۋدە. بۇل جولى اتالمىش كومپانيانىڭ اتقارۋشى ديرەكتورى مەن اكىمشىسى جامال جاافار اۋدان اۋماعىندا تۇراتىن وسىنداي 50 ادامعا ماتەريالدىق كومەك كورسەتتى.
وسىلايشا, ءىس-شارا بارىسىندا قامقورلىققا ءزارۋ ازاماتتارعا 20 كەلىدەن ازىق-تۇلىك قورجىنى ۇلەستىرىلدى. ۇيىمداستىرۋشىلار قايىرىمدىلىق شارانىڭ الداعى ۋاقىتتا جالعاسىن تاباتىنىن جەتكىزدى.
گۇلبارشىن وكەشقىزى