ەلوردادا قار تازالاۋ جۇمىستارى قىزۋ جۇرگىزىلىپ جاتىر. وسى ماقساتقا كۇن سايىن مىڭنان استام تەحنيكا مەن جۇمىسشىلار جۇمىلدىرىلادى.
بيىلعى قىس الدىڭعى جىلدارمەن سالىستىرعاندا ەداۋىر جىلى بولعانمەن, قارلى. اراگىدىك جاۋىپ جاتقان اق ۇلپا قالا تۇرعىندارى مەن كولىك قوزعالىسىنا كەدەرگى كەلتىرمەس ءۇشىن كوممۋنالدىق شارۋاشىلىق قىزمەتكەرلەرى قار تازالاۋ جۇمىسىن ىركىلىسسىز اتقارۋدا. وسىلايشا ءبىرىنشى كەزەكتە ورتالىق كوشەلەر, جاياۋ جۇرگىنشىلەر جولى مەن ايالدامالاردىڭ ماڭى تازالانىپ جاتىر.
ءيا, سوڭعى كەزدەرى قالانىڭ كوممۋنالدىق قىزمەت مەكەمەلەرىنىڭ جۇمىسشىلارىنا تىنىم جوق. وزدەرىنە جۇكتەلگەن جۇمىستى ۋاقىتىندا اتقارۋ ءۇشىن ولار ۋاقىتپەن ساناسپاي ەڭبەك ەتۋدە. ويتكەنى جاۋعان قار جەردە جاتا بەرسە تاپتالىپ, كەيىن ونى جيناۋ دا وڭايعا سوقپايتىنى بەلگىلى. قار قالىڭداعان سايىن جۇمىس تا اۋىرلاي تۇسەدى. ال بۇل تەحنيكانىڭ بۇزىلۋىنا, كەيدە ءتىپتى ىستەن شىعۋىنا اكەلىپ سوعۋى مۇمكىن. سوندىقتان قاي جۇمىستى بولسىن ۋاقىتىندا اتقارعان جاقسى.
الماتى اۋدانى اكىمدىگىنىڭ وندىرىستىك-تەحنيكالىق ءبولىم باسشىسى اسلان بيسەعۇلوۆتىڭ ايتۋىنشا, اتالمىش اۋدان اۋماعىندا قار تازالاۋ جۇمىسى, ادەتتەگىدەي, قارقىندى جۇرگىزىلىپ جاتىر. كەشە اۋدان بويىنشا بارلىعى 177 تەحنيكا جۇمىلدىرىلىپ, 448 ادامنىڭ كۇشىمەن پوليگونعا 4308 شارشى مەتر جەردىڭ قارى شىعارىلدى. اۋدان اۋماعىنداعى تەحنيكا وتكەن تۇندە – 221, ال كۇندىز 350 رەيس جاساعان.
– قازىر جولداردى تازارتۋ – ماڭىزدى مىندەتتىڭ ءبىرى. تۇندە تەمپەراتۋرا تومەندەگەن كەزدە جولعا قابىرشىق مۇز قاتىپ, تاڭەرتەڭ قالا تۇرعىندارىنا كوپتەگەن قيىندىق تۋعىزۋى مۇمكىن. وسىنداي كەلەڭسىزدىكتەردىڭ الدىن الۋ ءۇشىن جۇمىسشىلار كۇن-ءتۇن دەمەي اۋىسىممەن جۇمىس ىستەيدى. جولدى تازارتۋ جۇمىستارى كەشىكتىرىلسە, بۇل قالاداعى جول قوزعالىسىنا كەدەرگى كەلتىرەدى. سوندىقتان ءبىز جۇمىستىڭ ساپاسىن ەرەكشە قاداعالايمىز, – دەدى ا.بيسەعۇلوۆ.
قالا اۋماعىن قالىڭ قاردان تازالاۋ جۇمىستارىنا ەسىل اۋدانى بويىنشا 308 تەحنيكا مەن 596 جول جۇمىسكەرى جۇمىلدىرىلىپ, ولار بارلىعى 4850 شارشى مەتر جەردىڭ قارىن تازالادى.
بايقوڭىر اۋدانىندا سوڭعى كۇندەرى بارلىعى 309 جۇمىسشى مەن 245 ماشينانىڭ كۇشىمەن 4842 شارشى مەتر جەردىڭ قارى شىعارىلدى.
سارىارقا اۋدانىنىڭ جۇمىسشىلارى بولسا ءبىر كۇندە تەحنيكامەن 492 رەيس جاساپ, 6972 تەكشە مەتر جەردىڭ قارىن تازالادى. بۇل جۇمىستاردى اتقارۋعا اۋدان بويىنشا 88 ارنايى تەحنيكا جانە 444 جۇمىسشى جۇمىلدىرىلدى.
قالا اۋماعىنان قار شىعارۋ بارىسىندا كوشە قاپتالدارىندا كەپتەلىستى بولدىرماۋ باستى نازارعا الىنىپ وتىر.
مامانداردىڭ ايتۋىنشا, قار تازالاۋ جۇمىستارىندا كۇندىزگى ۋاقىتتا كەدەرگىلەر كوپ كەزدەسەدى ەكەن. ال تۇنگى ۋاقىتتا جۇمىس ىستەۋدىڭ ءوز ارتىقشىلىقتارى بار: ماشينالار از, تيىسىنشە قوزعالىس تا كوپ ەمەس.
بارلىق اۋدانداردا جانار-جاعارمايدىڭ قورى جەتكىلىكتى, اۆتوكولىكتىڭ ۇزدىكسىز جۇمىسى جانە قوزعالىس قاۋىپسىزدىگىن قامتاماسىز ەتۋ بويىنشا جەدەل شارالار قابىلداۋ ءۇشىن ديسپەتچەرلىك قىزمەتتەر قۇرىلعان, مەحانيكتەر بريگاداسى تۇراقتى جۇمىس ىستەيدى.
جالپى قار تازالاۋ جۇمىستارى بويىنشا قالا تۇرعىندارى تاۋلىك بويى «109» ءنومىرى ارقىلى iKomek مونيتورينگ جانە جەدەل ارەكەت ەتۋ ورتالىعىنا قوڭىراۋ شالىپ, حابارلاسا الادى.
گۇلبارشىن وكەشقىزى
