قازاق كينوسىنىڭ ساڭلاعى

بيىل ەلىمىزدە قازاق كينوسىنىڭ ساڭلاعى شاكەن ايمانوۆتىڭ 110 جىلدىق مەرەيتويى كەڭىنەن اتالىپ وتۋدە. جولداستارى مەن قىزمەتتەس ارىپتەستەرىنىڭ ايتۋىنشا, شاكەن كەنجەتايۇلى جايدارلى مىنەزدى, اينالاسىنا شاراپاتىن تيگىزىپ جۇرەتىن, دۇنيە-بايلىققا قىزىقپايتىن, جومارت, كەڭپەيىلدى, ءمارت, ونەرلى, سەگىز قىرلى, ءبىر سىرلى ادام بولىپتى. وسى قاسيەتتەرى ءۇشىن «ءبىزدىڭ زامانىمىزدىڭ سەرىسى» اتانعان ەكەن.

اتىنا زاتى ساي كينەماتوگراف كوريفەيىنىڭ مەرەيتويىنا وراي جۋىردا قازاق ۇلتتىق ونەر ۋنيۆەرسيتەتىنىڭ «كينو, ارت-مەنەدجمەنت جانە وپەراتورلىق ونەر» فاكۋلتەتىندە شاكەن ايمانوۆتىڭ شىعارماشىلىعىنا ارنالعان «زاماناۋي ۇلتتىق كينونىڭ دامۋ ەرەكشەلىكتەرى» دەگەن تاقىرىپتا عىلىمي-پراكتيكالىق كونفەرەنتسيا ءوتتى. باسقوسۋ بارىسىندا كينو ونەرىنىڭ مايتالماندارى, جەتەكشى ۇستاز-ماماندار وزدەرىنىڭ تاجىريبەلەرىمەن ءبولىسىپ, جاس پەداگوگتار مەن ستۋدەنتتەرگە, ماگيسترانتتار مەن دوكتورانتتارعا ءدارىس جۇرگىزدى.

ماسەلەن, كينورەجيسسەر, پروديۋسەر, قازاقستاننىڭ ەڭبەك سىڭىرگەن قايراتكەرى تاۋەكەل سلامبەك پەن كينووپەراتور, كسرو كينەماتوگرافيستەر وداعىنىڭ مۇشەسى اۋباكىر سۇلەەۆ شاكەن ايمانوۆپەن العاشقى تانىسۋى تۋرالى قىزىقتى ەتىپ اڭگىمەلەپ بەردى. ال تاجىريبەلى ۇستاز ورالبەك سارىباسوۆ ۇلى رەجيسسەردىڭ شىعارماشىلىق فەنومەنى مەن مىنەزىنىڭ ەرەكشەلىگىنە توقتالدى. اڭگىمە بارىسىندا شاكەننىڭ سوڭعى جىلدارى قويىلعان «الدار كوسە» (1965 ج.), «اتامەكەن» (1966 ج.), «تاقيالى پەرىشتە» (1969 ج.), «اتاماننىڭ اقىرى» (1973 ج.) كينوفيلمدەرىنىڭ شىعۋ تاريحى مەن كەيبىر ەپيزودتارىنىڭ قويىلۋى جونىندە قاتىسۋشىلارعا قىزىقتى دەرەكتەر كورسەتىلدى.

كونفەرەنتسياعا «شاكەن ايمانوۆتىڭ قازاق ۇلتتىق كينوسىنداعى ورنى», «ۇلى دالا رەجيسسيورى», «قازاقستاندىق كينەماتوگرافتاعى شاكەن ايمانوۆتىڭ مۋزىكالىق مۇراسى: ۇلتتىق مادەنيەتكە جانە الەمدىك كينويندۋسترياعا اسەرى», «كينويندۋستريا ەكونوميكا سالاسى رەتىندە: وزەكتى ماسەلەلەر مەن ۇردىستەر», «كەلەشەك انيماتسياسى: زاماناۋي انيماتسيالىق كينوداعى اعىمدىق تەندەنتسيالار مەن پەرسپەكتيۆالار», «كينوجوبالاردى ۇيىمداستىرۋداعى ارت-مەنەدجمەنت: زاماناۋي كينەماتوگرافياداعى ونەر», «ارت-مەنەدجمەنتتەگى جوبالاۋ مەن كوممۋنيكاتيۆتىك ساياسات», «قازاقستاندىق كينوداعى مۋزىكا زەرتتەۋ ماسەلەلەرى» دەگەن تاقىرىپتارعا باياندامالاردى تىڭدادى.

كونفەرەنتسياعا قاتىسقان ستۋدەنتتەر, ماگيسترانتتار مەن دوكتورانتتار كينەماتوگرافيا سالاسىنا قاتىستى قىزىقتى, تىڭ اقپاراتتاردى يگەرىپ, ءوزىنىڭ ءبىلىم كوكجيەگىن بايىتتى. ۇلى رەجيسسەردىڭ رۋحاني الەمىنە ساياحات جاساپ, اسا پايدالى ءدارىس تىڭدادى. راسىندا دا, ۇلى ادامداردىڭ باسقالاردان ءبىر ەرەكشەلىگى, ارامىزدان الىستاعان سايىن تۇلعاسى بيىكتەي بەرەدى.

گۇلناحيا ءبىرجانوۆا,

قازاق ۇلتتىق ونەر

ۋنيۆەرسيتەتىنىڭ ءباسپاسوز حاتشىسى