2024 جىلعى 15 اقپاندا كەڭەس اسكەرلەرىنىڭ اۋعانستاننان شىعارىلعانىنا 35 جىل تولدى. 1979 جىلى جەلتوقساندا كەڭەستىك سوتسياليستىك رەسپۋبليكالار وداعى ءوز اسكەرلەرىن اۋعانستان دەموكراتيالىق رەسپۋبليكاسىنىڭ اۋماعىنا ەنگىزدى. ون جىلدىق سوعىس باستالدى, ول 1979 جىلدىڭ 27 جەلتوقسانىنان 1989 جىلدىڭ 15 اقپانىنا دەيىن سوزىلدى.
اۋعان سوعىسىنداعى قايتىمسىز شىعىن 15051 ادامدى قۇرادى, 417 اسكەري قىزمەتشى تۇتقىندا بولدى, 53753 ادام جارالاندى, جاراقاتتار مەن كونتۋزيا الدى, 115308 ادام جۇقپالى گەپاتيتپەن, 31080 ادام ءىش سۇزەگىمەن, 140665 ادام باسقا جۇقپالى اۋرۋلارمەن اۋىردى.
كەڭەس اسكەرىنىڭ اۋعانستان جەرىنەن شىعارىلعانىنا 35 جىل تولۋىنا وراي استانا قالاسى مەملەكەتتىك ءارحيۆىنىڭ قىزمەتكەرلەرى اۋعان سوعىسىنىڭ ارداگەرلەرىمەن كەزدەسۋ ءىس-شاراسىن وتكىزدى. وعان م.نارىكباەۆ اتىنداعى قازاق گۋمانيتارلىق زاڭ ۋنيۆەرسيتەتى اسكەري كافەدراسىنىڭ اعا وقىتۋشىسى, وتستاۆكاداعى پولكوۆنيك, اۋعان سوعىسى ارداگەرى باۋىرجان الاينايۇلى, اۋعان سوعىسى ارداگەرى, كمG-security سەمبەك ءماجيتۇلى, قازاقستان رەسپۋبليكاسى اۋعانستان سوعىسىنىڭ ارداگەرى مەن مۇگەدەكتەرىنىڭ زاڭدى تۇلعالار بىرلەستىگىنىڭ ارداگەر-زاڭگەرى ساكەن جۇسىپبەكۇلى, ەلوردالىق №73 مەكتەپ-ليتسەيدىڭ العاشقى اسكەري جانە تەحنيكالىق دايىندىق ءپانىنىڭ وقىتۋشىسى ءاليحان ەلۋبايۇلى جانە استانا حالىقارالىق ۋنيۆەرسيتەتى تاريح جانە ارحەولوگيا ماماندىعىنىڭ 4-كۋرس ستۋدەنتتەرى مەن ارحيۆ مەكەمەسىنىڭ قىزمەتكەرلەرى قاتىستى.
ءىس-شارانى اشقان ارحيۆ باسشىسى ج.بيمولدين ەكىنشى دۇنيەجۇزىلىك سوعىستان كەيىنگى ەڭ ۇزاق سوعىسقا اينالعان اۋعانستان سوعىسى كەڭەس وداعىنا ەشبىر داڭق اكەلمەگەنىن, قۇربان بولعانداردىڭ تۋىستارى مەن جاقىندارى ءۇشىن بۇل قاسىرەتتى سوعىس 1989 جىلى اقپانداعى اسكەرلەردىڭ شىعارىلۋىمەن دە اياقتالماعانىن, قانتوگىس وقيعا ءار مەملەكەت پەن حالىق ءۇشىن ساباق بولعانىن اتاپ ءوتتى.
قاتىسۋشىلار اۋعان سوعىسى الاپاتىندا ەرلىكپەن قازا تاپقان, بەيبىت ومىردە سوعىس جاراقاتىنان ايىقپاي قايتىس بولعان ارداگەر ازاماتتاردى ەسكە الدى.
ءسوز العان ارداگەر پولكوۆنيك باۋىرجان الاينايۇلى اۋعان سوعىسىندا بولعان جانكەشتى وقيعالاردى اڭگىمەلەپ, سول كەزدە قازا بولعان دوستارىنىڭ ەرلىگىمەن ءبولىستى. شاراعا قاتىسۋشىلار ارداگەرلەرگە كوكەيىندە جۇرگەن سۇراعىن قويىپ, پىكىر الىستى. ارداگەر قازىرگى ۋاقىتتا جاستاردى ەرلىككە, ۇلتجاندىلىققا, ءوز ەلىنىڭ پاتريوتى بولۋعا, ۇلكەنگە قۇرمەت كورسەتۋگە جانە اسكەرگە بارۋدان باس تارتپاۋعا شاقىردى.
اۋعان ارداگەرى, زاڭگەر ساكەن جۇسىپبەكۇلى اۋعان سوعىسى ارداگەرلەر قوعامىنىڭ قازىرگى تاڭدا اتقارىپ جاتقان قىزمەتى مەن جۇمىسى جونىندە باياندادى.
عىلىمي-زەرتتەۋ جۇمىسى قىزمەتىنىڭ باسشىسى عازيزا تۇرماعانبەتقىزى ەلىمىزگە, سونىڭ ىشىندە قالامىزداعى اۋعان سوعىس ارداگەرلەرىنىڭ وتكەن جىلداردان سىر شەرتەتىن, قانداي دا ءبىر تاريحي فاكت نەمەسە وقيعانىڭ ماڭىزىن اشاتىن حالقىمىزدىڭ تاريحي-مادەني مۇراسىنىڭ اجىراماس بولىگى – قايتالانباس قۇجاتتاردى جيناقتاۋ, ەڭبەگى سىڭگەن قۇرمەتتى ازاماتتاردى ۇلىقتاۋ جانە قىزمەت ەتۋ بارىسىندا جيناقتالعان قۇجاتتاردان «جەكە قور» قالىپتاستىرۋ, ەلىمىزگە سىڭىرگەن ەڭبەگىن باعالاي وتىرىپ, قۇجاتتاردىڭ كەلەشەك ۇرپاققا ءمانى زور ەكەنىن جەتكىزدى.
دوڭگەلەك ۇستەل اياسىندا ارحيۆ ماماندارى مەن ارداگەرلەر تاراپىنان اۋعانستان سوعىسىنىڭ ارداگەرلەرى مەن مۇگەدەكتەرىنىڭ زاڭدى تۇلعالار بىرلەستىگى ارحيۆ قورىن قۇرىپ, بولاشاقتا جەكە تۇلعالاردىڭ قوعام مەن مەملەكەتتىڭ ومىرىندەگى ايتۋلى وقيعالاردىڭ, سونىڭ ىشىندە اۋعانستان سوعىسىنىڭ وقيعالارىنا قاتىسۋشىسى, كۋاگەرى رەتىندەگى ءرولى, سوعىستان كەيىنگى تۇلعالاردىڭ عىلىمدى, مادەنيەتتى جانە قىزمەتتىڭ باسقا دا سالالارىن دامىتۋعا قوسقان ۇلەسى, دوستىق, شىعارماشىلىق بايلانىسى, جۇمىس ورنى, جەكە تۇلعالاردىڭ اتقاراتىن لاۋازىمىن ايقىنداپ, ءتىزىمىن جاساپ, ارحيۆ قۇجاتتارىن جيناقتاۋدا بىرلەسە جۇمىس جۇرگىزۋ تۋرالى شەشىم قابىلدادى.
ءىس-شاراعا قاتىسۋشىلارعا فوتوقۇجاتتى كورمە, «اۋعان سوعىسىنان» اتتى قىسقامەتراجدى فيلم كورسەتىلدى.
قورىتىندىلاي كەلە, استانا قالاسى مەملەكەتتىك ءارحيۆىنىڭ باسشىسى بارلىق ارداگەرگە العىس ايتىپ, اۋعانستاننان وتكەندەردىڭ ءبارى ساعى سىنباعان جاندار, ازاماتتىق ومىردە اياعىنان كوتەرىلە العاندار دەدى. سوعىستىڭ اتى – سوعىس, ول ادامزاتقا تەك قاسىرەت الىپ كەلەتىنىمەن بەلگىلى. تاريح بەتىنە ءوزىنىڭ قاندى ءىزىن قالدىرعان اۋعان سوعىسى دا تالاي ەردىڭ تاعدىرىن وققا بايلادى. ءيا, ولگەندەر قايتىپ كەلمەيدى, بىراق سوعىس جۇرەگىنە وشپەس جارا سالعان ازاماتتارعا قۇرمەت كورسەتۋ – ءبىزدىڭ قاسيەتتى پارىزىمىز.
«بۇل كەزدەسۋ وقۋشىلار ءۇشىن تاربيەلىك ءمانى زور ماعىنالى ءىس-شارا بولدى دەپ ەسەپتەيمىز. بەيبىت ءومىردىڭ باعا جەتپەس باقىتتى كۇندەرىندە اماندىقپەن وسىلاي ديدارلاسايىق!» دەپ قوناقتارعا العىس ءبىلدىرىپ, ارحيۆتىك قۇجاتتار نەگىزىندە جاريالانعان جيناقتار تابىستالدى.
ارداق قايىپجانوۆا,
ارحيۆ جۇمىسى قىزمەتىنىڭ باسشىسى
