قاجەتتى مامانداردى قايتا دايارلايدى
سەيسەنبىدە «جاستار» سارايىندا جۇمىسپەن قامتۋ جانە الەۋمەتتىك باعدارلامالار باسقارماسىنىڭ ۇيىمداستىرۋىمەن بوس جۇمىس ورىندار جارمەڭكەسى ءوتتى.
اتالمىش شارادا ەلوردانىڭ مەكەمەلەرى مەن كاسىپورىندارى ءتورت جۇزدەن اسا بوس جۇمىس ورنىن ۇسىندى. جارمەڭكە بارىسىندا قالاداعى قات ماماندىقتار – مونتاجداۋشىلار, قۇراستىرۋشىلار, ەلەكتريكتەر, دانەكەرلەۋشى, جيناۋشىلار ەكەنىنە تاعى دا كوزىمىز جەتتى.
سونىمەن قاتار, جۇمىسپەن قامتۋ ورتالىعىنىڭ ماماندارى قايتا دايارلاۋ جانە جاڭا ماماندىق الۋدىڭ مۇمكىندىكتەرى تۋرالى كەڭەس بەردى. تىگىنشى, اسپاز, ءتاربيەشى, كىشى مەيىربيكە, ساتۋشى-كاسسير ماماندىقتارىنا وقىتاتىن كۋرستارعا ءوتىنىش بەرۋشىلەردى تىركەپ, ۇمىتكەرلەرمەن سۇحبات جۇرگىزدى. ال, بيىلعى جوعارى جانە ورتا وقۋ ورىندارىنىڭ تۇلەكتەرىنە «جۇمىسپەن قامتۋ 2020 جول كارتاسى» باعدارلاماسى بويىنشا جاستار ءتاجىريبەسىنەن وتۋگە قاتىستى جانە حالىقتىڭ نىسانالى توپتاعى وكىلدەرىنە الەۋمەتتىك جۇمىس ورىندارىنا قىزمەتكە ورنالاستىرۋ تۇرعىسىندا مالىمەتتەر بەرىلدى.
سوڭعى كەزدە تۇراقتى تۇردە وتكىزىلىپ تۇراتىن جۇمىس جارمەڭكەسى الەۋمەتتىك قولداۋ جۇيەسىنە تارتىلماعان ازاماتتاردى قامتۋداعى يگىلىكتى شارا رەتىندە تۇرعىندار اراسىندا كەڭىنەن قولداۋ تاۋىپ كەلەدى.
ايگۇل ۋايسوۆا