ەلىمىزدىڭ قاجىلارى بيىل استانا, الماتى, شىمكەنت قالالارىنان جيددا (ياعني, مەككە قالاسىنا) باعىتى بويىنشا تىكەلەي رەيس ارقىلى ۇشادى, دەپ حابارلادى قر ءدىني باسقارماسىنىڭ ءباسپاسوز قىزمەتىنەن.
«قازاقستان مۇسىلماندارى ءدىني باسقارماسى 2016 جىلدىڭ باسىندا ساۋد ارابيا كورولدىگى (ساك) قاجىلىق مينيسترلىگىنىڭ جاڭا تالاپتارىنا وراي, ەلىمىزدەگى قاجىلىقپەن اينالىسۋعا ۇمىتكەر تۋريستىك فيرمالار اراسىندا العاش رەت اشىق بايقاۋ جاريالاعان بولاتىن. اشىق كونكۋرستى جاريالاۋداعى نەگىزگى ماقساتىمىز – قاجىلىق ساپارىنىڭ ساپاسى مەن قىزمەتىن جاقسارتىپ, جەرلەستەرىمىزدىڭ قاۋىپسىزدىگىن جان-جاقتى قامتاماسىز ەتۋ», – دەلىنگەن حابارلامادا.
قمدب جاريالاعان كونكۋرس ناتيجەسىندە 10 تۋرفيرما ىرىكتەۋدەن ءوتتى. ونىڭ ءتىزىمى تومەندەگىدەي: «حيدايات نۇر», «ياسساۋي», «اتلاس تۋريزم», «حيكمەت ترەۆەل», «دەلتا ترەۆەل», «قىزمەت ساياحات», «ءال-مارۋا», «سانابل», «اڭسار كرۋيز» جانە «نۇر-قازاقستان».
بيىلعى قاجىلىق ماۋسىمى تامىز ايىنىڭ 30-ىنان باستالىپ قىركۇيەك ايىنىڭ 22-سىندە اياقتالادى. جەرلەستەرىمىزدىڭ تاڭداۋىنا وراي, بيىلعى قاجىلىق ماۋسىمىنىڭ ەڭ قىسقا مەرزىمى – 14 كۇن. بۇدان دا ۇزاق مەرزىمدى تاڭدايتىن ازاماتتار ءۇشىن 25 كۇنگە جوسپارلانعان ارنايى رەيستەر اشىلعان. بيىل ەلىمىزدىڭ قاجىلارىنا 3000 كۆوتا ءبولىنىپ وتىر.
