«نۇر وتان» حدپ استانا قالالىق فيليالى «ادىلەت كەڭەس بەرەدى» رەسپۋبليكالىق اكتسياسى اياسىندا اشىق ەسىك كۇنىن وتكىزدى. ازاماتتاردىڭ مۇددەسىن قورعاۋدىڭ ءتيىمدى ۇلگىسى رەتىندە قالىپتاسقان قوعامدىق قابىلداۋدىڭ ەڭ باستى ماقساتى – بيلىك پەن قوعام اراسىنداعى پىكىر الماسۋ الاڭىن كەڭەيتۋ, پارتيانىڭ تۇرعىندارمەن ءوزارا بايلانىسىن نىعايتۋ جانە مەملەكەتتىك قۇرىلىمداردىڭ ءىس-ارەكەتىنە قوعامدىق باقىلاۋدى جەتىلدىرۋ.
«بۇل قوعام ومىرىندە پارتيانىڭ باسىمدىلىعىن ايقىنداپ قانا قويماي, الداعى ونجىلدىقتا اتقارىلاتىن بارلىق ستراتەگيالىق شارالاردىڭ نەگىزىن قالاماق. مەملەكەتتىك ورگاندار باسشىلارىنىڭ قاتىسۋىمەن ازاماتتاردى قابىلداۋدى جۇرگىزۋدىڭ تاعى ءبىر وڭتايلى تۇسى قاراپايىم ازاماتتاردىڭ قۇزىرەتتى ورگاندارعا قولجەتىمدىگىن ارتتىرادى» دەدى «نۇر وتان» حدپ استانا قالالىق فيليالى توراعاسىنىڭ ورىنباسارى مەيرامباي ورالوۆ.
اتاۋلى كۇنى استانا تۇرعىندارىنىڭ ءتۇيىندى ماسەلەلەرى تىڭدالىپ, ارنايى شاقىرىلعان استانا قالاسى ادىلەت دەپارتامەنتىنىڭ جاۋاپتى قىزمەتكەرلەرى, زاڭگەرلەر, ادۆوكاتتار مەن سوت ورىنداۋشىلارى قۇقىقتىق كومەك كورسەتتى.
ايگۇل ۋايسوۆا
