ءدال قازىر ءلايلا سۇلتانقىزىنىڭ قاتىسۋىمەن «ۇيلەنۋ توي ورتالىعىندا» «باقىتتى ايەل» اتتى ماستەر-كلاستىڭ وتەتىندىگى تۋرالى جارناما جاقسى ءجۇرىپ جاتىر ەكەن. وسىعان دەيىن دە «بالا تاربيەسىندەگى اتا-انا» اتتى ترەنينگتەردىڭ وتكەنىن ەستىگەن ەدىم. سوندا قالاي؟ ايەل ءوزىنىڭ باقىتىن, اتا-انا بالاسىن قالاي تاربيەلەۋ كەرەكتىگىن ترەنينگتەرگە بارىپ بىلەتىن بولعان با؟ قازاق قاشاننان بەرى وتباسىلىق ماسەلەنى كوپپەن بىرگە تالداۋعا كوشكەن؟
ستاتيستيكاعا سەنسەك, ەلىمىزدەگى ءاربىر ءتورتىنشى وتباسى اجىراسادى ەكەن. اجىراسۋدىڭ سوڭى كوبىنە بالا تاربيەسى مەن جاۋاپكەرشىلىگىنىڭ تەك ايەلدىڭ وزىندە قالۋىمەن اياقتالادى. بۇل نەنى بىلدىرەدى؟
وسىندايدا ەسىمىزگە ەرىكسىز «قىمباتتى, ءميللاتجان, ءبىر ۇيگە ءبىر ەر-ازامات كەرەك قوي» دەپ مۇرتىن سيپاپ تۇرىپ قوجانىڭ شەشەسىن اينالشىقتاپ جۇرەتىن قاراتاي ءتۇسىپ كەتە بەرەدى. شىنىندا دا, سول ايتقانداي, ءبىر ۇيگە ءبىر ازامات اۋاداي قاجەت زامان بولدى. قازىر قاراپ وتىرساق, ءبىر ءۇي عانا ەمەس, قازىر بۇكىل قوعامدا ەر-ازامات تاپشىلىعى بايقالىپ وتىر. بالاباقشادا ەر-ازامات جوق, مەكتەپتە دە وسى جاعداي. ۇستازداردىڭ اراسىنان ەر-ازاماتتاردى وتە از كەزىكتىرەسىز. دەمەك, ءبىزدىڭ بالالارىمىزدى ۇيدە دە, مەكتەپتە دە ايەلدەر تاربيەلەپ وتىر. دۇرىس, بالا تاربيەسىندە انادان اسقان ادام جوق. بىراق بۇگىنگى قوعامعا راحمانوۆتاي اعايلار ازدىق ەتىپ تۇر. «قاپ, مەن سۇلتاننىڭ شىراعىن جاعا المادىم-اۋ» دەپ شاكىرتىنىڭ كەمشىلىگىن وزىنەن ىزدەيتىن ازامات-ۇستازداردىڭ ازدىعى قوعامىمىزعا ءوز سالقىنىن تيگىزبەي تۇرعان جوق.
ءبىزدىڭ ۇلتتىق تاربيەمىز اتادان بالاعا ميراس بولىپ كەلە جاتقان ءتۇرلى قۇندىلىقتارعا يە. يبالى قىز, ارلى بالا, ۇلگىلى اكە… مىنە, وسىلاردىڭ بارلىعى – ءبىزدىڭ تاربيە ينستيتۋتىمىزدىڭ نەگىزى. ءبىز قازىر وسىنى جوعالتىپ الدىق. ۇلكەندەرىمىز شە؟ كوبى جاس كەلگەن سوڭ, ايتەۋىر, «اتا-اجە» بولادى. بىراق بۇرىنعىداي قازىنالى قارتتار نەگە ازايىپ كەتتى؟ اجەلەر اكادەمياسى قايدا؟ وتباسىندا اكە-شەشەدەن, اتا-اجەدەن الۋعا ءتيىس تاربيەنى كوشەدەن ىزدەپ, پسيحولوگتاردىڭ كومەگىنە جۇگىنىپ, جاپپاي ءتۇرلى ترەنينگتەرگە قاتىساتىن زامان بولعانى ما؟
گۇلنۇر ورالبەكوۆا,
استانا قالاسىنىڭ
تۇرعىنى
