رەسپۋبليكالىق بايقاۋدا توپ جاردى
استانالىق پەداگوگتار الماتى قالاسىندا باستاۋىش سىنىپ پەداگوگتارى اراسىندا وتكەن «ادىستەمەلەر» بايقاۋىنىڭ رەسپۋبليكالىق كەزەڭىندە جەڭىمپاز اتاندى.
«دۇرىس تاماقتانۋ تۋرالى اڭگىمە» باعدارلاماسىنىڭ ادىستەمەلىك كومپونەنتىن جەتىلدىرۋ جانە ۇلتتىق مادەنيەت پەن ادەت-عۇرىپقا قىزىعۋشىلىقتى قالىپتاستىرىپ, ۇزدىك پەداگوگيكالىق تاجىريبەلەردى ناسيحاتتاۋ ماقساتىندا ۇيىمداستىرىلدى. بۇل بايقاۋعا استانا, الماتى قالالارىنىڭ جەڭىمپازدارى قاتىسىپ, ءوز جۇمىستارىمەن تانىستىردى.
بايقاۋعا ۇسىنىلعان جۇمىستار «دۇرىس تاماقتانۋ تۋرالى اڭگىمە» باعدارلاماسىنا تاقىرىپتىق سايكەستىگى, جاڭاشىلدىق جانە وزىندىك ەرەكشەلىگى, مەتودولوگيالىعى, تەحنولوگيالىعى, تيىمدىلىگى بويىنشا باعالاندى. بايقاۋ ناتيجەسىندە استانا قالاسىنداعى ش.قۇدايبەردى اتىنداعى №56 مەكتەپ-ليتسەيىنىڭ پەداگوگى ايدانا سەرىكباەۆا باس جۇلدەنى يەلەندى. ال №44 ر.قوشقارباەۆ اتىنداعى ورتا مەكتەبىنىڭ پەداگوگى سالتانات جاكىشەۆا جانە №64 مەكتەپ-ليتسەيىنىڭ پەداگوگى كامشات تاجىباەۆا III ورىن الدى.
ودان بولەك, وقۋشىلاردىڭ تاماقتانۋ مادەنيەتىنىڭ نەگىزدەرىن قالىپتاستىرۋ ماقساتىندا «سالاۋاتتى تاماقتانۋ مەكتەبى» جوباسى اياسىندا «جاس اسپازشىلار» ونلاين رەسپۋبليكالىق بايقاۋى ءوتتى. «مەنىڭ ەلىمنىڭ اسپازدىق داستۇرلەرى» مەن «بۇكىل الەم بويىنشا اسپازدىق ساياحات» اتتى ەكى كەزەڭنەن تۇراتىن بايقاۋعا استانا قالاسى بويىنشا ون ءبىر پەداگوگ قاتىسىپ, جۇمىستارىن جولدادى. بايقاۋدىڭ ناتيجەسى بويىنشا ج.تاشەنوۆ اتىنداعى №10 مەكتەپ-گيمنازياسىنىڭ ەلۆيرا وتەشوۆا مەن م.شوقاي اتىنداعى №51 مەكتەپ-گيمنازياسىنىڭ پەداگوگى اياۋلىم كەمەلوۆا جەڭىمپاز دەپ تانىلدى.