استانادا تالانتتى رەجيسسەر, قازاقستاننىڭ ەڭبەك سىڭىرگەن قايراتكەرى, ونەرتانۋ PhD, قازاق ۇلتتىق ونەر ۋنيۆەرسيتەتىنىڭ پروفەسسورى, «بولاشاق» تۇلەگى, مۋزىكالىق جاس كورەرمەن تەاترىنىڭ ديرەكتورى اسحات ماەميروۆتىڭ مەرەيلى 50 جاسىنا ارنالعان بەنەفيسى ءوزى قويعان سپەكتاكلدەرى سەكىلدى كەرەمەت انشلاگپەن ءوتتى. بۇل ءبىر جاعىنان ءومىرى ونەرمەن ورىلگەن مارتەبەلى ونەر يەسىنىڭ ەل الدىندا ەسەپ بەرۋى بولسا, ءبىر جاعىنان قۇرىلعانىنا ءۇش جىلدىڭ ءجۇزى بولعان, قالىڭ كورەرمەن جيناعان ونەر ورداسىنىڭ شىعارماشىلىق الەۋەتىن, زور مۇمكىندىگىن تانىتقان عاجايىپ كەش ەدى.
تالانتتى رەجيسسەر شاكىرتتەرىمەن ءبىر ساحنادا ءان سالىپ, ولەڭ وقىدى, ەستەلىك ايتتى, سىرلاستى, كورەرمەنگە جاڭا قىرىمەن, ەرەكشە بولمىسىمەن كورىندى. بەنەفيس بارىسىندا ءوزى قويعان سپەكتاكلدەردەگى اندەرى شىنايى ورىندالىپ, تىڭداۋشىنى تامسانتتى, اكتەرلەردىڭ شابىتتانعان ءجۇزى, جارقىراعان كوستيۋمدەرى, جاستىقتىڭ, جاڭاشىلدىقتىڭ لەبى تامسانتتى.
استانا قالاسى اكىمىنىڭ ورىنباسارى ەسەت بايكەن قالا اكىمى جەڭىس قاسىمبەكتىڭ قۇتتىقتاۋىن جەتكىزسە, سەنات دەپۋتاتى دارحان قىدىرالى اسحاتتىڭ ونەر جولىنا ساتتىلىك تىلەپ, ماۋلەن اشىمباەۆتىڭ قۇتتىقتاۋ حاتىن وقىپ بەردى. ەلوردانىڭ مادەني ومىرىندە ايرىقشا وقيعاعا اينالعان بەنەفيسكە ەلىمىزدىڭ ونەر مايتالماندارى, تەاتر ونەرىنىڭ قايراتكەرلەرى, ونەردەگى ۇستازدارى, شاكىرتتەرى, قوعام قايراتكەرلەرى, زيالى قاۋىم وكىلدەرى, جۋرناليستەر, جاستار قاتىستى. اسىرەسە قازاقتىڭ «قىز-جىبەگى» اتانعان قازاقستاننىڭ ەڭبەك سىڭىرگەن ءارتىسى, «پاراسات» وردەنىنىڭ يەگەرى مەرۋەرت وتەكەشوۆا مەن قازاقستاننىڭ حالىق ءارتىسى گۇلجان اسپەتوۆانىڭ كەلۋى, قازاقستاننىڭ حالىق ءارتىسى نۇرلان ونەرباەۆتىڭ ساحنادا ءان سالۋى كەشكە ەرەكشە كورىك بەردى. LED-ەكران ارقىلى كورسەتىلگەن 91-دەگى اناسى ءدانيا ۆاليەۆانىڭ بالاسىنا دەگەن ساعىنىشپەن ايتقان ۆيدەوقۇتتىقتاۋى, تۋعان اۋىلىنىڭ بەينەكورىنىسى ايرىقشا اسەر قالدىردى.
قازاق ونەرىندە ەرەكشە قولتاڭباسىمەن كورىنىپ, شاكىرتتەرىن شىعارماشىلىقتىڭ شىڭىنا جەتەلەگەن رەجيسسەر اسحات ماكسيمۇلى ساحنالاعان ادامي سەزىمدەرگە, شىنايى ماحابباتقا قۇرىلعان دۋلات يسابەكوۆتىڭ «گاۋhارتاس» اتتى شىعارماسى بۇگىنگە دەيىن 165 مارتە كورەرمەن نازارىنا ۇسىنىلدى. بارلىق قويىلىم انشلاگپەن ءوتتى. بيلەت ساناۋلى مينۋت ىشىندە ءوتىپ كەتەدى. وسى ارالىقتا سپەكتاكلدى مىڭداعان كورەرمەن تاماشالاپتى. وتباسى قۇندىلىعىن دارىپتەگەن دراما وتكەن جىلدىڭ ۇزدىگى دەپ تانىلىپ, مادەنيەت جانە اقپارات مينيسترلىگى ۇيىمداستىرعان ونەر سالاسىنداعى «Umai-2023» ۇلتتىق سىيلىعىن يەلەندى.
ارىپتەسىمىزدىڭ نە ءۇشىن تاڭداۋ «گاۋhارتاسقا» ءتۇستى دەگەن ساۋالىنا اسحات ماەميروۆ بىلاي جاۋاپ بەرگەنى ەستە: «ساحناعا بۇگىننىڭ قاھارماندارىن شىعارۋىم كەرەك. ولار – اۋىل ادامدارى, دارىگەر, تىنىشتىق كۇزەتشىسى, قاراپايىم ەڭبەك ادامدارى بولۋعا ءتيىس. ەسىمە دۋلات يسابەكوۆتىڭ «گاۋھارتاسى» ءتۇستى. جالما-جان قايتادان پاراقتاپ شىقتىم. بالا كەزىمنەن ساناما ءسىڭىپ قالعان وبرازدارمەن قايتا تابىستىم. كينودا كاۋكەن كەنجەتاەۆ ويناعان تۇرىمبەت اكە, ءامينا ومىرزاقوۆا سومداعان انا, ءانۋار بورانباەۆ ويناعان تاستان, دوسحان جولجاقسىنوۆ ويناعان اسكەربەكتىڭ وبرازى كوز الدىمنان ءوتتى. جاننا قۋانىشەۆانىڭ ويناعان سالتاناتى قانداي شىركىن! «گاۋھارتاس» – 25 جاستاعى جازۋشى دۋلات يسابەكوۆتىڭ ادام جانىن اياۋسىز جالاڭاشتاپ ۇسىنعان شىعارماسى. مۇندا ارتىق بوياۋ جوق. وسىعان تاعى ءبىر مارتە كوزىم جەتتى. وندا ادام بار. قازاقتىڭ بولمىسى, قۇندىلىعى بار. سونى بۇگىنگى Tik-Tok-تا وتىرعان جاس ۇرپاق ءتۇسىنۋى, ۇعۋى قاجەت. اتالارىنىڭ, اجەلەرىنىڭ باستان كەشكەن سەزىمىن سەزىنۋگە ءتيىس. «گاۋھارتاس» – ادەبي شىعارما رەتىندە قازاق ادەبيەتىندە دە, شەتەلدە دە ابدەن مويىندالعان دۇنيە. كينو رەتىندە دە كورەرمەننىڭ كوڭىلىنەن شىقتى. مەن وسى شىعارماعا قىلاۋداي دا كىربىڭ تۇسىرمەۋىم قاجەت. كەرىسىنشە, ونى تولىقتىرىپ, اجارىن اشاتىنداي دۇنيە جاساۋىم كەرەك. ول ءۇشىن اۋەلى جانرىن انىقتاپ العان ابزال. تەاترىمنىڭ باعىتى – مۋزىكالىق تەاتر, سوندىقتان دا مۋزىكالىق دراما رەتىندە ۇسىنامىز, ىشىندە حورمەن ءان ايتىلادى دەپ اۆتوردىڭ رۇقساتىن الىپ الدىم» دەگەن اسحات ماەميروۆ, شىنىندا دا, قازاق ونەرىندەگى اياۋلى تۇلعالاردى جاستاردىڭ تەاتر ساحناسىندا جارقىراتىپ كورسەتتى. قالىڭ كورەرمەننىڭ جوعارى باعاسىن الدى, اكتەرلەر شىرقاعان اندەر جاستاردى ادامي قارىم-قاتىناسقا جەتەلەگەن, شىنايى ماحابباتقا ۇندەگەن شىعارما رەتىندە كوركەم دۇنيەگە اينالدى. قازىرگىدەي تسيفرلىق زاماندا ادامي قارىم-قاتىناس, جاندى بايلانىس وزەكتى. بۇل جانە جاقسى ترەندكە اينالىپ كەلە جاتىر.
اسحات ماكسيمۇلىنىڭ شەبەرحاناسىنان شىققان تالانتتى ۇل-قىزدار ءوزى قۇرعان مۋزىكالىق جاس كورەرمەندەر تەاترىندا دا, باسقا دا ەلىمىزدىڭ ونەر وشاقتارىندا زور تابىسپەن جۇمىس ىستەپ جۇرگەنىن بىلەمىز. مۋزىكالىق جاس كورەرمەن تەاترى 2020 جىلى 14 جەلتوقساندا «اباي-توعجان» مۋزىكالىق دراماسىمەن رەسمي اشىلعانى بەلگىلى. قۇرامىندا 70 اكتەرى بار تەاتردىڭ قازاقستاندا بالاماسى جوق. ونەر ورداسى ۋاقىتتىڭ سۇرانىسىنا وراي قازىرگى جاستاردى تەاترعا تارتۋ ءۇشىن كامەرالىق وركەستر مەن ەتنو-فولكلورلىق ءانسامبلى بار ۇجىمنان قۇرالدى. وندا اكتەرلىك شەبەرلىگىمەن قاتار ۆوكالدىق مۇمكىندىگى جوعارى, ءان سالۋمەن قاتار جاقسى بيلەيتىن تالانتتى جاستار جينالدى. مۋزىكالىق جاس كورەرمەن تەاترىنىڭ اشىلۋى قازاق مادەني ونەرىندەگى تىڭ جاڭالىق, بولەك تىنىس بولاتىن.
– بالالار: «اعاي, ءبىز ءوزىمىزدىڭ لايىقتى ورنىمىز بار ەكەنىن دالەلدەۋىمىز كەرەك» دەدى. دالەلدەدىك دەپ ويلايمىن. سەنبەيتىندەر ەكى جارىم جىل ۋاقىت ىشىندە كورەرمەن كوڭىلىنەن شىققان 17 قويىلىمدى كەلىپ كورسىن, – دەيدى اسحات ماكسيمۇلى.
وسى ءۇش جىلعا جۋىق ۋاقىت ىشىندە 14 شاڭىراق بوي كوتەرگەنى دە اسحات باستاعان تاتۋ ۇجىمنىڭ بەرەكە-بىرلىگىن, ونەرمەن ورىلگەن ءومىرىن پاش ەتكەندەي.
– ءوزىم كوپبالالى اۋلەتتە تۋىپ, 10 بالانىڭ ورتاسىندا تاربيەلەنگەندىكتەن, اينالامدى باۋىر تۇتىپ, شاكىرتتەرىمدى ءوز بالامداي جاقسى كورەمىن. ءوزىمىز ىرگەسىن قالاعان مۋزىكالىق جاس كورەرمەن تەاترىنداعى ءاربىر ءارتىستىڭ تاعدىرىنا جاۋاپتىمىن, ولارعا بىلگەنىمدى ۇيرەتىپ, بىلمەگەنىن كورسەتۋگە تىرىسامىن. ويتكەنى ءوزىم قول باستاعان كوسەم, ءسوز باستاعان شەشەن سىرىم داتۇلىنىڭ تۋعان توپىراعىندا تۋىپ, سول اياداي عانا اۋىلدا, قايماعى بۇزىلماعان قازاقى اۋىلدا ءوسىپ-ءوندىم, جەتىلدىم. بالا ارمانىما قانات بايلاپ, الماتىداعى ت.جۇرگەنوۆ اتىنداعى قازاق ۇلتتىق ونەر اكادەمياسىنا رەجيسسەر ماماندىعىنا وقۋعا ءتۇستىم, «بولاشاقپەن» پاريجدە وقىدىم, رەسەيدە ءبىلىم الدىم, 2015 جىلى استانادا عىلىمي ديسسەرتاتسيامدى قورعاپ, ونەر مەن عىلىمدى بايلانىستىرۋ ارقىلى بيىك ماقساتقا جەتتىم, – دەيدى بەنەفيس يەسى تولقىپ تۇرىپ.
وسىلايشا, جەرگىلىكتى جانە الەمدىك تەاتر ماماندارىنان ءتالىم الىپ, كاسىبي ءبىلىمىن ۇشتاعان مامان وتاندىق ونەر مەن مادەنيەت سالاسىنىڭ بىلىكتى مەنەدجەرى رەتىندە دە ءوزىن تانىتا ءبىلدى. تەاتر قۇرىلعاننان باستاپ بىرگە كەلە جاتقان حالىقارالىق كانن فەستيۆالىنىڭ جەڭىمپازى سامال ەسلياموۆا, قازاقستاننىڭ ەڭبەك سىڭىرگەن قايراتكەرى بەرىك ايتجانوۆ, مەملەكەتتىك «دارىن» جاستار سىيلىعىنىڭ لاۋرەاتتارى اسىلحان تولەپوۆ پەن ايان وتەپبەرگەن دە ا.ماەميروۆقا دەمەۋ بولعان ونەر تارلاندارى.
بەنەفيستە تەاتر ساحناسىندا قويىلعان م.اۋەزوۆتىڭ «اباي-توعجان», ن.موشينانىڭ «دۇنيە-عاپىل», م.وماروۆانىڭ «ءشامشى», «Chanel №5», ە.ءولبيدىڭ «زووپارك», «كەلشى, ايىم» ءانىن لەيتموتيۆ ەتىپ العان د.يسابەكوۆتىڭ «گاۋhارتاس», ع.مۇسىرەپوۆتىڭ «قىز جىبەك», ا.ءۆولوديننىڭ «قوشتاسقىم كەلمەيدى» سپەكتاكلدەرىنەن اۋەزدى اندەر شىرقالىپ, كەي قويىلىمداردان ءۇزىندى قويىلدى. اسحاتتىڭ جاڭاشىلدىعىن, كاسىبيلىگىن, كىسىلىگىن تانىتقان, تالايلار اۋزىندا جۇرەر تاماشا كەش بولدى. تانىمال ونەر جۇلدىزدارى قانات, سۆەتلانا ايتباەۆتاردىڭ ورىنداۋىنداعى اندەر جۇرەككە جەتتى. ونەردە سۋرەتكەرلىكپەن زور تابىسقا جەتكەن ونەر يەسى ومىردە جارى نۇرگۇلمەن ەكى ۇل ءوسىرىپ, قازىر زايىبى ەكەۋى نەمەرەلەرىنىڭ باقىتتى اتا-اجەسى اتانىپ وتىرعان جاندار. ونەر ساپارىندا ءوزى ايتقان تەرەڭ ەڭبەكپەن, تالعاممەن, ەرەكشە ەستەلىكتەرمەن, جاقسى ادامدارمەن ورىلگەن عۇمىرى عيبراتقا تولى, ءالى بەرەرى دە كوپ. مەرەيتوي يەسىن جاڭا بەلەسىمەن قۇتتىقتاپ, شىعارماشىلىق تابىس, ورلەۋ تىلەيمىز!
