ەلوردانىڭ ءال-فارابي اتىنداعى وقۋشىلار سارايىندا «ازاماتتىق قورعانىس سالاسىنداعى بىلگىر» زياتكەرلىك سايىسى ءوتتى. ءبىلىم بەرۋ ۇيىمدارىندا توتەنشە جاعدايلار كەزىندە بالالار مەن جاسوسپىرىمدەردىڭ قاۋىپسىزدىگىن قامتاماسىز ەتۋ ماقساتىندا ۇيىمداستىرىلعان ءىس-شارانى الماتى اۋدانى اكىمدىگى مەن قالانىڭ توتەنشە جاعدايلار باسقارماسى بىرلەسە ۇيىمداستىردى.
زياتكەرلىك سايىس وقۋشىلاردىڭ ادامنىڭ كۇندەلىكتى ومىرىندەگى قاۋپى تۋرالى ءبىلىمدى ودان ءارى تەرەڭدەتۋ, توتەنشە جاعدايلار كەزىندە بالالاردىڭ ءبىلىمى مەن ماشىقتارىن قالىپتاستىرۋ, ءوزىنىڭ جانە دە وزگەلەردىڭ ومىرىنە جاۋاپكەرشىلىكپەن قاراۋ مەن قاجەتتى قاۋىپسىزدىك ەرەجەلەرىن ساقتاۋعا باعىتتالدى. سايىسقا قاتىسۋ ءۇشىن الماتى اۋدانىنىڭ مەكتەپتەرى اراسىندا «ازاماتتىق قورعانىس سالاسىنداعى ۇزدىك جادىناما» ىرىكتەۋ تۋرى وتكىزىلدى, ونىڭ ناتيجەسى بويىنشا № 22 مەكتەپ گيمنازياسى, № 30 مەكتەپ گيمنازياسى, № 72 مەكتەپ-ليتسەي, № 42 ورتا مەكتەبى» گيمنازياسى ەڭ جاقسى ناتيجە كورسەتتى.
الماتى اۋدانى توتەنشە جاعدايلار باسقارماسىنىڭ باستىعى تالعات كاەرلينوۆتىڭ ايتۋىنشا, زياتكەرلىك سايىستار قالا مەكتەپتەرىندە تۇراقتى تۇردە وتكىزىلەدى.
بيىلعى سايىستا 5 وقۋشىدان قۇرالعان 4 توپتىڭ باسىن قوستى. «تانىستىرۋ», «برەين-رينگ», «مەن قۇتقارۋشىمىن», «نە؟ قايدا؟ قاشان؟» اتتى 4 كەزەڭ بويىنشا قاتىسۋشىلار بىلىمدەرىن ورتاعا سالدى. ءار كوماندا توپ اتاۋى مەن ءوز ۇراندارىن دا دايىنداپ كەلگەن.
دوداعا ساقاداي ساي دايىندالعان قاتىسۋشىلار العاشقىدا وزدەرىن تانىستىرىپ, كەيىن ءورت قاۋىپسىزدىگى, توتەنشە جاعدايلار كەزىندە ارەكەت ەتۋ داعدىلارى, قۇتقارۋشى ماماندىعىنىڭ باعىتتارى بويىنشا سۇراقتارعا جاۋاپ بەردى. ال سوڭعى كەزەڭدەردە العاشقى كومەك كورسەتۋ بويىنشا پراكتيكالىق تاپسىرمالاردى ورىندادى.
سايىس قورىتىندىسى بويىنشا «جاس قۇتقارۋشى» اتالىمى №30 مەكتەپ-گيمنازياسىنا, «ەڭ تاپقىر» اتالىمى №22 مەكتەپ-گيمنازياسىنا بەرىلىپ, «ەڭ جىلدام» №42 ورتا مەكتەبى مەن «ەڭ بەلسەندى» №72 مەكتەپ-ليتسەيى تانىلدى. ال 3-ورىن №22 مەكتەپ-گيمنازياسىنا, 2-ورىن №30 مەكتەپ-گيمنازياسىنا جانە 1-ورىن №72 مەكتەپ-ليتسەيىنە بەرىلدى. جەڭىمپاز كوماندالار ارنايى سىيلىقتار جانە كۋبوكتارمەن ماراپاتتالدى.
«مەكتەپ وقۋشىلارى قازىرگى تاڭدا كۇندەلىكتى تۇرمىستا قانداي دا ءبىر وقىس وقيعا بولعاندا قالاي دۇرىس ارەكەت ەتۋ كەرەكتىگىن بىلمەيدى. سوندىقتان بۇل سايىس وقۋشىلار ءۇشىن قاجەت دەپ ويلايمىن. ءبىز وسى سايىستا تەوريانى تەرەڭىرەك مەڭگەرىپ, ادام ومىرىنە جاۋاپكەرشىلىكپەن قاراۋعا ۇيرەندىك. مەكتەبىمىزدە دە توتەنشە جاعدايعا قاتىستى وقىتۋلار ءجيى وتەدى» دەدى №72 مەكتەپ-ليتسەيىنىڭ «قاھارمان» توبىنىڭ كاپيتانى ءالتايىر ءابدىرايسوۆ.
