استانا قالاسى ءماسليحاتىنىڭ ءبىر توپ دەپۋتاتى ەلوردادا مەملەكەتتىك سپورتتىق جانە شىعارماشىلىق تاپسىرىس قالاي ىسكە اسىرىلىپ جاتقانىن تەكسەرىپ, بىرقاتار نىسانداردى ارالادى. سونىڭ بارىسىندا بۇل باعىتتاعى كەيبىر ماسەلەلەردى انىقتادى. اتالمىش جۇمىس ەندى قالالىق ءماسليحاتتىڭ الدا وتەتىن سەسسياسىندا تالقىلانادى.
ق.ساتباەۆ اتىنداعى №61 مەكتەپ-ليتسەيدە «ارتسپورت» باعدارلاماسى بويىنشا «Santos Astana» اتتى فۋتبول مەكتەبى جۇمىس ىستەيدى. وعان 160 بالا بارادى. ياعني, 8 توپقا 20 بالادان بولىنگەن. باس قالا تۇرعىندارىنىڭ قارقىندى ارتۋىنا, سوعان سايكەس وقۋشىلاردىڭ شامادان تىس كوبەيۋىنە بايلانىستى كوپتەگەن مەكتەپتىڭ سپورتزالى كۇنى بويى بوسامايدى. وسىنى اتاپ وتكەن قالالىق ءماسليحات دەپۋتاتى التىنشاش تابۋلدينا فۋتبول مەكتەبى مەكتەپىشىلىك ۇيىرمەلەر جۇمىسىنا كەدەرگى كەلتىرىپ تۇرعان جوق پا دەپ سۇرادى.
فۋتبول مەكتەبىنىڭ باس باپكەرى فايزوللا جاباەۆتىڭ ايتۋىنشا, اتالمىش مەكتەپتىڭ ۇيىرمەلەرى ساعات 15.00-دەن 18.00-گە دەيىن جۇمىس ىستەيدى. ال فۋتبول مەكتەبىنىڭ ءار توبىنا اپتاسىنا ءۇش رەت ۇزاقتىعى 1,5 ساعاتتان ساباق وتكىزىلەدى. ساباقتار 18.00-دەن كەيىن باستالادى. ال سەنبى-جەكسەنبى كۇندەرى فۋتبول مەكتەبى كۇنى بويى بالالاردى جاتتىقتىرادى.
كەيبىر سپورت سەكتسيالار مەن شىعارماشىلىق ۇيىرمەلەر كوپپاتەرلى ۇيلەردىڭ ءبىرىنشى قاباتىندا نەمەسە جەرتولەلەردە ورنالاسقان. كوپشىلىگى ءتيىستى تالاپتارعا سايكەس كەلمەيدى. ماسەلەن, قارتالى 18/1 مەكەنجايىندا شاحمات پەن گرەك-ريم كۇرەسى ۇيىرمەلەرى ءبىر عيماراتتا ورنالاسقان. ءماسليحات دەپۋتاتتارى بارعاندا بالالارعا شاحماتتان ساباق بەرىلىپ جاتتى, ال كۇرەس زالىندا ەشكىم بولمادى. ونىڭ سەبەبى رەتىندە جوعارعى قاباتتا قۇبىر جارىلىپ, زالدى سۋ باسقانى ايتىلدى. دەپۋتاتتار مۇندا كۇرەسپەن اينالىساتىن بالالار جاتتىعۋدان كەيىن جۋىنۋ كەرەكتىگىن, بىراق دۋش بولمەسىنىڭ جوقتىعىنا نازار اۋداردى. ۇيىرمە يەسى دۋش ورناتۋدى ەندى جوسپارلاعانىن جەتكىزدى.
سونداي-اق دەپۋتاتتار كوركەم گيمناستيكا, قازاق كۇرەسى, بوكس, دزيۋدو, سپورتتىق بي, شايبالى حوككەي, مانەرلەپ سىرعاناۋ, جەڭىل اتلەتيكا سەكتسيالارىن تەكسەردى.
«استانانىڭ بىرقاتار سپورت سەكتسيالارى مەن نىساندارى سپورتپەن شۇعىلدانۋ ءۇشىن مەملەكەتتىك تاپسىرىستى ورنالاستىرۋ نورمالارىنا سايكەس كەلمەيدى. تۇرعىن ءۇي كەشەندەرىندەگى سپورت زالداردىڭ جاعدايى, مەن بۇل سەكتسيالارعا باراتىن بالالار سانى كوپتەگەن سۇراقتار تۋعىزادى» دەيدى استانا قالاسى ءماسليحاتىنىڭ توراعاسى ەرلان كاناليموۆ.
قالالىق ءماسليحات دەپۋتاتى التىنشاش تابۋلدينانىڭ مالىمەتىنشە, قازىر ەلوردادا مەملەكەتتىك سپورتتىق جانە شىعارماشىلىق تاپسىرىستى 203 ۇيىم ىسكە اسىرىپ وتىر.
«نىسانداردى ارالاپ وتكەننەن كەيىن ءبىز قوسىمشا زەرتتەۋدى قاجەت ەتەتىن بىرنەشە ماسەلەنى انىقتادىق. قىزمەت كورسەتۋ ساپاسى, عيماراتتار مەن جابدىقتاردىڭ ستاندارتتارعا سايكەستىگى, سەكتسيالارعا ناقتى قاتىسۋ ماسەلەلەرى – مۇنىڭ ءبارى نازار اۋدارۋدى جانە ودان ءارى تالداۋدى قاجەت ەتەدى.
ءبىز وسى سالادا كورسەتىلەتىن قىزمەتتەردىڭ تيىمدىلىگى مەن وزەكتىلىگىن قامتاماسىز ەتۋ ءۇشىن ەگجەي-تەگجەيلى زەرتتەۋ جۇرگىزۋگە مىندەتتىمىز» دەدى التىنشاش تابۋلدينا.
