الەۋمەتتىك سالادا 33 جىل قىزمەت اتقارىپ كەلە جاتقان, بۇگىنگى تاڭدا استانا قالاسىنداعى «بەلسەندى ۇزاق ءومىر ءسۇرۋ ورتالىعى» مەكەمەسىنىڭ بايقوڭىر اۋدانى بويىنشا ءبولىمىنىڭ باسشىسى روزا بايسالباەۆا – اسىل جار, اياۋلى انا عانا ەمەس, ماماندىعىن جاقسى مەڭگەرگەن, الەۋمەتتىك سالانىڭ قيىندىعىن, ىستىعى مەن سۋىعىن قاتار كورگەن تاجىريبەلى مامان.
روزا قارابەكقىزى استانا قالاسىندا تۋعان, كوپبالالى وتباسىندا تاربيەلەنگەن. ءبىر باسىندا ءۇش ماماندىعى بار – ينجەنەر, پەداگوگ, ەكونوميست. قاراعاندى ەكونوميكا ۋنيۆەرسيتەتى مەن تسەلينوگراد اۋىلشارۋاشىلىق ينستيتۋتىن بىتىرگەن. ەڭبەك جولىن 1996 جىلى اقمولا قالاسىنىڭ جۇمىسپەن قامتۋ ورتالىعىندا جەتەكشى مامان بولىپ باستاعان.
قىز بالاعا ءتان بارلىق ءتالىم-تاربيەنى, ۇلتتىق قۇندىلىقتاردى بالا جاستان بويىنا سىڭىرگەن. وتباسىنداعى قازاقي تاربيە ونى الەۋمەتتىك قىزمەت كورسەتۋ سالاسىندا جەتىستىككە جەتەلەدى. بىلىكتى باسشى الەۋمەتتىك قىزمەتتە جۇرگەن ايەلدەردىڭ ادامي قاسيەتتەرىن ەرەكشە باعالايدى.
«الەۋمەتتىك سالانىڭ مامانى قىزمەت الۋشىلاردىڭ پسيحولوگيالىق تۇرعىدا قارىم-قاتىناس جاساۋىنا كوپ كوڭىل ءبولۋ, كەيبىر ەگدە جاستاعى زەينەتكەرمەن جەكە سويلەسىپ, قولداۋ كورسەتۋ قاجەت. جاس ماماندارعا كوپپەن جۇمىس جاساۋ بارىسىندا اقىل-كەڭەس بەرۋ, پىكىرلەسىپ وتىرۋ ماڭىزدى دەپ ەسەپتەيمىن. الەۋمەتتىك قىزمەت الۋشىلارمەن ءتيىمدى جۇمىس ىستەۋ ءۇشىن سترەسكە ءتوزىمدى, كوپپەن ءتىل تابىسا ءبىلۋ, جۇمىسىن شەكسىز ءسۇيۋ قاجەت دەپ سانايمىن» دەيدى روزا قارابەكقىزى.
روزا بايسالباەۆا باسشىلىق ەتەتىن بايقوڭىر اۋدانى بويىنشا «بەلسەندى ۇزاق ءومىر ءسۇرۋ ورتالىعىنا» 2 مىڭنان استام قىزمەت الۋشى كەلەدى. قالا زەينەتكەرلەرى ءۇشىن ساۋىقتىرۋ, مەديتسينالىق, الەۋمەتتىك-ەكونوميكالىق, ەڭبەك تەراپياسى, تىلدىك جانە كومپيۋتەرلىك كۋرستار, شاحمات, توعىزقۇمالاق, مادەني ۇيىرمەلەر تەگىن جۇمىس ىستەيدى. ورتالىقتىڭ ماقساتى – قالا زەينەتكەرلەرىنىڭ بەلسەندى ءومىر سالتىن ۇزارتۋ جانە بوس ۋاقىتتارىن ءتيىمدى ۇيىمداستىرۋ.
«قانداي مەكەمەدە قىزمەت اتقارسام دا, ادال بولۋعا تىرىستىم. ىسكە ادال بولۋ ءاردايىم ابىروي اكەلەتىنىن بىلەمىن. ايەل ادام جەتىستىككە جەتۋ ءۇشىن بارىنشا ءبىلىمدى, بىلىكتى, ۇلكەنگە قۇرمەتپەن قاراۋ كەرەك دەپ ويلايمىن» دەيدى بىلىكتى باسشى روزا بايسالباەۆا.
مەرۋەرت قايىرتاسقىزى
