ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ عىلىمي كىتاپحاناسىندا «ساپالى ۇلت: ءبىلىم, عىلىم جانە مادەنيەت» تاقىرىبىندا بەلگىلى عالىمداردىڭ ستۋدەنتتەرمەن كەزدەسۋى ءوتتى.
مەملەكەتىمىزدى باسەكەگە قابىلەتتى ەلگە اينالدىرۋدا ساپالى ۇلت قالىپتاستىرۋ – ماڭىزدى مىندەتتىڭ ءبىرى. ەڭبەكقورلىق, بىلىمپازدىق جانە ادامي قاسيەتتەر سەكىلدى جالپىۇلتتىق قۇندىلىقتاردى ۇلىقتايتىن سانالى ۇلت تۇتاس ەلدىڭ دامۋ كۇشىنە اينالادى. جاستارمەن جۇزدەسۋدىڭ وزەگى رەتىندە وسى تاقىرىپ تاڭدالىپ, تاعىلىمدى ءىس-شارا ۇيىمداستىرىلدى.
كەزدەسۋگە ۇلتتىق عىلىم اكادەمياسىنىڭ اكادەميگى ءۋاليحان قاليجان, الاشتانۋشى-عالىم, پروفەسسور تۇرسىن جۇرتباي, ۇلتتىق عىلىم اكادەمياسىنىڭ اكادەميگى, فيلولوگيا عىلىمدارىنىڭ دوكتورى كارىمبەك قۇرماناليەۆ, «قازاق گازەتتەرى» جشس باس ديرەكتورى ديحان قامزابەكۇلى جانە ۇلتتىق عىلىم اكادەمياسىنىڭ كوررەسپوندەنت-مۇشەسى امانتاي ءشارىپ قاتىستى. جيىندى ۋنيۆەرسيتەتتىڭ باسقارما توراعاسى – رەكتور مىندەتىن اتقارۋشى, اكادەميالىق ماسەلەلەر جونىندەگى پرورەكتور سەرىك ماقىش اشىپ, ءوز سوزىندە عالىمدارعا العىس بىلدىرە وتىرا, وقۋ ورداسىندا ساپالى ۇلت قالىپتاستىرۋ جولىندا ەڭبەك ەتىپ جۇرگەن قوعام قايراتكەرلەرى, عالىمدار جانە بەلدى تۇلعالارمەن جۇزدەسۋ داستۇرگە اينالعانىن, سول سەكىلدى بۇل كەزدەسۋ دە سونىڭ جالعاسى ەكەنىن اتاپ ءوتتى. ءىس-شارانى عىلىمي كىتاپحانا ديرەكتورى باقىتجان ورازاليەۆ جۇرگىزدى.
اكادەميك ءۋاليحان قاليجان «ادام بويىندا ەڭ ىزگى قاسيەت ماحاببات بولسا, مۇنداي ۇلت كەز كەلگەن سالادا كوش باستايدى» دەپ, ستۋدەنتتەرگە ءوزىنىڭ ماقالاسىن وقىپ, ءىس-شارانى اسەرلى باستادى. جازۋشى-عالىم تۇرسىن جۇرتباي ابايتانۋ توڭىرەگىندە ءسوز باستاپ, بۇگىندە دانىشپان ەڭبەكتەرىنىڭ بۇرمالانعان, ءالى تولىق زەردەلەنبەي جاتقان تۇستارىن باسا ايتتى. وسىلايشا پروفەسسور اباي شىعارماشىلىعى ارقىلى كەلەشەك ۇرپاقتىڭ ادامدىق كەلبەتىن, كىسىلىك ساپاسىن قالاي ارتتىرۋعا بولاتىنىنا تەرەڭ توقتالدى. اكادەميك كارىمبەك قۇرماناليەۆ ستۋدەنتتەرمەن كەزدەسۋدىڭ عىلىمي كىتاپحانادا ۇيىمداستىرىلۋىنىڭ سيمۆوليكالىق ءمانى بارىن ايتتى.
«ءبىلىم – كىتاپتا. شەتەلدىك عالىمداردىڭ پايىمىنشا, كەلەشەكتە گادجەت ۇستاعانداردى كىتاپ وقيتىندار باسادى. عىلىم مەن ءبىلىمدى ەكىنشى ورىنعا قويعان مەملەكەت ەشۋاقىتتا كوش باستامايدى. ەكونوميكا دا, شارۋاشىلىق تا, بارلىعى عىلىمعا نەگىزدەلۋى قاجەت. سوندىقتان ۇلكەن عىلىم جولىنىڭ نەگىزى ىزدەنىستە جاتىر» دەدى عالىم.
ال اكادەميك ديحان قامزابەكۇلى جاستارعا دامىعان مەملەكەتتەردىڭ دامۋ جولىن مىسالعا كەلتىرىپ, ەل بولاشاعىن ىلگەرىلەتەتىن باعىتتار تۋرالى ويىن جەتكىزدى.
«ساپالى ۇلت قالاي قالىپتاسادى؟ ونى قالىپتاستىرۋدىڭ جولى – عىلىم مەن تەحنولوگيادا. قازىر جاستارعا جان-جاقتى مۇمكىندىك بار. شەتەلدىك عالىمداردىڭ دارىستەرى اشىق جۇيەدە تۇر. ونىڭ ارتىق-كەم تۇستارى دا بار. كوپ اقپارات اداستىرىپ جىبەرۋى مۇمكىن. بىراق جاستار وسىنىڭ اراسىنان اداسپاي جول تابۋى قاجەت. بۇگىنگى ءبىلىمنىڭ استارىن ءبىلۋ كەرەك. بىراق قانشا ءبىلىمدى بولساڭىزدار دا, ءبارىبىر رۋحاني ءداستۇر ماسەلەسى الدىڭىزدان شىعادى. ءبىلىم داستۇرمەن بايلانىستى. ساپالى ۇلت – تابىستى ۇلت. تابىستى ۇلت بولۋ ءۇشىن ءبىلىمدى ۇلت بولۋ كەرەك» دەدى د.قامزابەكۇلى.
عالىم امانتاي ءشارىپ قۇندىلىقتار اۋىسىپ جاتقان زاماندا جاس بۋىننىڭ جارقىن بولاشاققا باستايتىنىنا سەنىم ءبىلدىردى.
«اقىن ەسەنعالي راۋشانوۆتىڭ «ۇستىندە تۇرىپ التىننىڭ, وزگەنىڭ كۇمىسىنە تاڭعالدىق» دەگەن ءسوزى بار. جەرىمىزدىڭ استى دا, ءۇستى دە التىن. سوندىقتان التىنىمىزدى باعالاپ, كەلەشەككە جول اشاتىن جاستار ساپالى ۇلتتى قالىپتاستىرادى» دەدى پروفەسسور.
كەزدەسۋ سوڭىندا عالىمدارعا TURKSOY حالىقارالىق ۇيىمىنىڭ اتاۋلى مەدالدارى تاپسىرىلىپ, ستۋدەنتتەر عالىمدارمەن جەكە كەزدەسۋ وتكىزۋ جونىندە ۇسىنىسىن ايتتى.
