استانا كۇنى اياسىندا «كۇن الەمى» اتتى قالالىق ساياباقتاردىڭ فەستيۆالى وتۋدە. وندا ەلوردا تۇرعىندارى مەن قوناقتارى «جەرۇيىق», «اراي» جانە «استانالىق» ساياباقتاردا «ەكسپو» حالىقارالىق كورمەسىنىڭ تاريحىمەن تانىسىپ, ءتۇرلى مەرەكەلىك شارالاردى قىزىقتاۋدا.
جوعارىدا اتالعان ساياباقتاردا تاۋەلسىزدىكتىڭ 25 جىلدىعىنا ارنالعان كوز تارتىمدى دەكوراتسيالار قويىلعان. سونداي-اق, ساياباقتار ءار قۇرىلىقتارعا ءبولىنىپ, ءوز ەرەكشەلىگىمەن كوپشىلىكتى تاڭقالدىردى. ماسەلەن, «استانالىق» ساياباق حالىقارالىق كورمەنى وتكىزگەن ەۋروپا مەن اۆستراليا مەملەكەتتەرىن بەينەلەدى. «جەرۇيىق» ساياباعى ازيا قۇرىلىعىن مەكەندەگەن جاپونيا, كورەي, قىتاي جانە قازاقستان مەملەكەتتەرىنىڭ باي تاريحىن باياندادى. ال «اراي» ساياباعىندا سولتۇستىك جانە وڭتۇستىك امەريكا ورنالاسىپ, «ەكسپو» كورمەسىن وتكىزگەن اقش, كانادا جانە برازيليا ەلدەرى جايىندا تاعىلىمدى دۇنيەلەر ايتىلدى.
قىزىقتى شارا اياسىندا جۇرتشىلىققا ءتۇرلى حالىقتاردىڭ بيلەرى ۇسىنىلدى.
ۇلتتىق مۋزىكا اسپاپتارىندا ويناۋ مەن سۋرەت سالۋ شەبەرلىگى بويىنشا كوپشىلىككە شەبەرلىك سىنىپتارى وتكىزىلدى. سونىمەن بىرگە قالا تۇرعىندارى مەن قوناقتارى ءتاتتى تاعامداردان ءدام تاتىپ, «روكساناكي», «كوكتۇرىكتەر», «بۋگارابۋ»جانە «ارقايىم» توپتارى ونەرپازدارىنىڭ مۋزىكالىق باعدارلامالارىن تاماشالادى.
ازامات ەسەنجول
