سەرگەي بەلوگلازوۆ, ەركىن كۇرەستەن وليمپيادا ويىندارىنىڭ ەكى دۇركىن جەڭىمپازى, الەم بىرىنشىلىگىنىڭ التى مارتە, ەۋروپانىڭ جانە كەڭەس وداعىنىڭ بىرنەشە دۇركىن چەمپيونى
استانا تورىندە گرەك-ريم, ەركىن جانە ايەلدەر كۇرەسىنەن ءوتىپ جاتقان قازاقستان كۋبوگى جارىسى كەزىندە ەركىن كۇرەستەن قازاقستان ۇلتتىق قۇراماسىنىڭ كەڭەسشى-باپكەرى بولىپ جۇمىسقا كىرىسكەن داڭقتى بالۋانمەن اڭگىمەلەسۋدىڭ ءساتى ءتۇستى.
– قازاقستانعا جۇمىس ىستەۋگە كەلگەنىڭىزدى ەستىدىك. ولاي بولسا, قوش كەلدىڭىز دەي وتىرىپ, ماقسات-مىندەتىڭىزدى بىلسەك دەپ ەدىك.
– الدىمەن مەنىڭ كەلگەنىمە كوڭىل بولگەندەرىڭىزگە راحمەت. مەن قازاقستاننىڭ گرەك-ريم, ەركىن جانە ايەلدەر كۇرەسى فەدەراتسياسىنىڭ شاقىرۋىمەن كەلدىم. وسىعان دەيىن ماسكەۋ قالاسىندا تسسكا-نىڭ جانە ماسكەۋ وبلىسى قۇراماسىنىڭ اعا جاتتىقتىرۋشىسى بولىپ جۇرگەن ەدىم. ارينە, باسقا ەلدەردەن دە ۇسىنىستار بولعان ەدى. دەگەنمەن, مەن قازاقستاندا جۇمىس ىستەۋگە نيەت ءبىلدىردىم. قازاقستاننىڭ قازىرگى قۇراماسىنداعى بالۋانداردىڭ ءبىرازىن ءتۇرلى جارىستاردا, وقۋ-جاتتىعۋ جيىندارىندا كورگەنىم بار ەدى. اراسىندا بىرنەشە ۇلكەن ءۇمىت ارتاتىن جىگىتتەر بار ەكەنىن بايقاعان ەدىم. مىنە, وسىنداي جاعدايلارعا بايلانىستى وسىندا كەلىپ قالدىق.
ال, ەندى نەگىزگى ماقساتىمىزعا كەلسەك, فەدەراتسيا باسشىلىعى ۇلكەن مىندەتتەر جۇكتەپ وتىر. نەسىن جاسىرايىن, كەلەسى جىلعى الەم بىرىنشىلىگىندە چەمپيون شىعارۋ كەرەك, بارلىق سالماقتار بويىنشا ليتسەنزيالار يەلەنۋ قاجەت, ال ەڭ باستىسى, ريو-دە-جانەيرو كىلەمىنەن التىن مەدال الۋدى ماقسات ەتىپ وتىرمىز.
– سپورتتىق كارەراڭىزدى اياقتاعاننان كەيىن بىرقاتار ەلدەردە باپكەرلىك قىزمەتتە بولعانىڭىزدى بىلەمىز. سول شەتەلدەردە ءجۇرىپ باپتاعان شاكىرتتەرىڭىزدەن وليمپيادا ويىندارى مەن الەم چەمپيوناتتارىندا توپ جارعان بالۋاندار بولدى ما؟
– مەن ۇلكەن سپورتپەن قوشتاسقاننان كەيىن رەسەي ۇلتتىق قۇراماسىندا اعا جاتتىقتىرۋشى بولىپ باپكەرلىك مانسابىمدى باستاعان بولاتىنمىن. ودان كەيىن اقش قۇراماسىن باپتاۋعا قاتىستىم. مەنىڭ قول استىمدا جاتتىققان حەنريك سوگادا دەگەن بالۋان پەكين وليمپياداسىندا چەمپيون اتاندى. ودان كەيىنگى تسيكلدا جاپونيا قۇراماسىمەن جۇمىس جۇرگىزدىم. بۇل ەلدىڭ بالۋاندارىنان دا وليمپيادا مەن الەم چەمپيوناتىنىڭ جۇلدەگەرلەرىن ءوسىرىپ شىعاردىم. سينگاپۋردە دە باپكەرلىك قىزمەتتە بولدىم.
ال ەڭ مىقتى شاكىرتتەرىم, ارينە, رەسەي قۇراماسىندا بولدى. قانشاما چەمپيوندار بولسا, سولاردىڭ كوپشىلىگىنە ەڭبەك ءسىڭىردىم. ماسەلەن, سوڭعى الەم چەمپيوناتىندا رەسەي قۇراماسىنان 5 چەمپيون شىقتى, سولاردىڭ 4-ءى – مەن باپتاعان تسسكا بالۋاندارى.
– سپورت الەمىنىڭ ەڭ بيىك شىڭى – وليمپيادا ويىندارىنىڭ ەكى دۇركىن چەمپيونى بولدىڭىز, الەم چەمپيوناتىن 6 مارتە ۇتىپ الدىڭىز, ەۋروپا مەن كسرو-نىڭ بىرنەشە رەت جەڭىمپازى بولدىڭىز. وسىنداي كەرەمەت جەتىستىككە جەتە تۇرىپ, سپورتتان الا الماعان نەسىبەڭىز قالدى ما نەمەسە وكىنىشىڭىز بولدى ما؟
– وكىنىشىم بولدى. ول – «84»… مەن 1980 جىلى ماسكەۋ وليمپياداسىن ۇتىپ الدىم. ەكىنشى رەت 1988 جىلى سەۋل ويىندارىندا دا التىن مەدال يەلەندىم. الايدا, وسى ەكى ورتادا وليمپيادا چەمپيونى بولاتىنداي بابىمدا بولا تۇرىپ, بولا المادىم… سول كەزدەگى ساياساتتىڭ كەسىرىنەن لوس-انجەلەس وليمپياداسىنا قاتىسپاي قالدىق. مىنە, مەنىڭ وزەگىمدى ورتەگەن ەڭ اششى وكىنىش وسى بولدى. ەندى وسىنداي جاعدايلار قايتالانباسا ەكەن دەپ تىلەيمىن. قانشاما جىلدار تەر توگىپ, وليمپيادا جۇلدەگەرى بولامىن دەپ ارمانداعان سپورتشىنىڭ جارىسقا قاتىسا الماۋى – ناعىز وبال دەر ەدىم.
قازىر مەن باپكەرلىك جولدامىن. «ۇلى سپورتشىلاردان ۇلى باپكەر شىقپايدى» دەگەن ءسوزدى ءسىز دە مۇمكىن ەستىگەن شىعارسىز. ءوز باسىم وسى قاعيدامەن كەلىسپەيمىن. ادامنىڭ ارمانى تاۋسىلمايدى عوي, شىنىمدى ايتسام, مەنىڭ قازىرگى ارمانىم تاعى دا وليمپيادا چەمپيوندارى مەن الەم چەمپيوندارىن وسىرسەم دەيمىن. سونداي تىلەكپەن قازاقستانداعى جۇمىسىمدى باستاعان جايىم بار.
– قازاقستانعا قانشا مەرزىمگە كەلدىڭىز؟
– شارتىم 2016 جىلى وتەتىن وليمپيادا ويىندارىنان كەيىن اياقتالادى. وعان دەيىن كوپ تەر توگۋگە تۋرا كەلىپ تۇر. قازاقستان كۇرەس فەدەراتسياسى باسشىلىعىنا ريزاشىلىعىمدى بىلدىرگىم كەلەدى. قاجەت دەگەن جاعدايدىڭ ءبارىن جاساپ جاتىر.
– تۋعان ەلىڭىز, وسكەن ورتاڭىز تۋرالى ايتىپ وتسەڭىز.
– ءبىز كالينينگراد قالاسىندا تۋعانبىز. جيىرما جىلداي كيەۆ قالاسىندا تۇردىق. سپورتتاعى جەتىستىكتەرىمىزگە دە وسى قالادا تۇرعاندا قول جەتكىزدىك.
مەنىڭ اعامدى دا بىلەتىن شىعارسىزدار, ءوزى مەنەن بەس مينۋت بۇرىن تۋعان. اناتولي بەلوگلازوۆ. ول دا اتاقتى بالۋانداردىڭ ءبىرى عوي. ماسكەۋ وليمپياداسىنىڭ چەمپيونى, ءۇش رەت الەم چەمپيونى اتانعان. قازىر بەلارۋس ۇلتتىق قۇراماسىنىڭ باس باپكەرى. ەكەۋمىزدىڭ دە بالا-شاعالارىمىز وسكەن.
– اڭگىمەڭىزگە كوپ راحمەت. ەڭبەگىڭىزگە ساتتىلىك تىلەيمىز.
اڭگىمەلەسكەن:
عالىم قوجابەكوۆ
