بۇگىن اقوردادا قازاقستان رەسپۋبليكاسىنىڭ مەملەكەتتىك حاتشىسى, قر پرەزيدەنتىنىڭ جانىنداعى ايەلدەر ءىسى جانە وتباسى-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى گ.ابدىقالىقوۆا بۇۇ بالالار قورىنىڭ (يۋنيسەف) قازاقستانداعى وكىلى يۋ.وكساميتنىيمەن كەزدەستى.
مەملەكەتتىك حاتشى يۋري وكساميتنىيدى لاۋازىمعا تاعايىندالۋىمەن قۇتتىقتاپ, قازاقستان مەن يۋنيسەف اراسىنداعى تابىستى ىنتىماقتاستىقتىڭ جالعاساتىنىنا سەنىم ءبىلدىردى. گ. ابدىقالىقوۆا الەمدەگى جانە قازاقستانداعى بالالاردىڭ جاعدايىن جاقسارتۋداعى يۋنيسەف-ءتىڭ ماڭىزدى ءرولىن, سونداي-اق بۇۇ-نىڭ دامۋ ماقساتىنداعى كومەك كورسەتۋ جونىندەگى نەگىزدەمەلىك باعدارلاماسىن (يۋنداف) ورىنداۋ بويىنشا ەلىمىزدەگى مەملەكەتتىك ورگانداردىڭ بەلسەندى جۇمىسىن اتاپ ءوتتى.
يۋنيسەف-پەن ءوزارا بايلانىس ارقىلى جانە 2010-2015 جىلدارعا ارنالعان ەلدىك باعدارلامانىڭ اياسىندا وتباسى مەن قوعامنىڭ الەۋەتىن نىعايتۋ, الەۋمەتتىك جانە باسقارۋ ساياساتىن ازىرلەۋ, الەۋمەتتىك قورعاۋ جۇيەسىن جەتىلدىرۋ بويىنشا ءىس-شارالار تابىستى جۇزەگە اسىرىلۋدا. باعدارلاما باسىمدىقتارىنىڭ ءبىرى وڭتۇستىك قازاقستان جانە شىعىس قازاقستان وبلىستارىنىڭ, بۇعان قوسا سەمەي سىناق الاڭى مەن ارال ايماعىنداعى بالالاردىڭ جاعدايىن جاقسارتۋ بولىپ تابىلادى.
بۇۇ-نىڭ بالالار قۇقىقتارى بويىنشا كوميتەتىنىڭ ۇسىنىمدارىن ورىنداۋ بويىنشا ۇكىمەت تاراپىنان يۋۆەنالدىق يۋستيتسيا جۇيەسىن دامىتۋ, بالالار ەڭبەگىن قاناۋدىڭ الدىن الۋ, جەتىم قالعان بالالاردى وتباسى تاربيەسىنىڭ بالامالى تۇرلەرىن ەنگىزۋ, مۇگەدەك بالالارعا ايرىقشا قاجەتتى زاتتارمەن قامتاماسىز ەتۋگە باعىتتالعان شارالار قابىلدانۋدا.
كەزدەسۋگە قاتىسۋشىلار بالالاردى قورعاۋدىڭ وزەكتى ماسەلەلەرىن, ءبىلىم, دەنساۋلىق ساقتاۋ جانە الەۋمەتتىك دامۋ سالالارىنداعى ىنتىماقتاستىقتىڭ الداعى كەلەشەگىن تالقىلادى.
