بەرليندە «ەكسپو-2017» كوميسسارى – قر سىرتقى ىستەر ءمينيسترىنىڭ ءبىرىنشى ورىنباسارى ر.جوشىباەۆ باستاعان قازاقستاندىق دەلەگاتسيا 49- «ITB-2015» حالىقارالىق تۋريستىك كورمەسىنىڭ جۇمىسىنا قاتىستى. دەلەگاتسيانىڭ قۇرامىنا سىرتقى ىستەر, ينۆيستيتسيالار مەن دامۋ مينيسترلىكتەرىنىڭ, قالالىق جانە وبلىستىق اكىمشىلىكتەردىڭ, «استانا ەكسپو-2017» ۇلتتىق كومپانياسىنىڭ, تۋريستىك اگەنتتىكتەردىڭ, سەرۆيستىك سەكتورلاردىڭ, قازاقستاننىڭ قولونەر مەن زەرگەرلىك ونەرىنىڭ وكىلدەرى كىردى. بيىلعى جىلى اتالمىش كورمەدە 180 ەلدەن 10 مىڭعا جۋىق ستەندتەر ورناتىلدى.
كورمە شەڭبەرىندە ەكسپو-2017 كوميسسارى بۇۇ بۇكىلالەمدىك تۋريستىك ۇيىمى جىبەك جولى ەلدەرىنىڭ تۋريزم مينيسترلەرىنىڭ 5-ءشى وتىرىسىنا قاتىسىپ, قازاقستانداعى ءتۋريزمنىڭ دامۋى, جىبەك جولى الەۋەتىن ىسكە اسىرۋ بويىنشا قازاقستاننىڭ ءرولى جانە ەلباسىنىڭ «نۇرلى جول» جولداۋىنىڭ نەگىزگى باعىتتارى تۋرالى ءسوز سويلەدى.
ر.جوشىباەۆ الداعى ۋاقىتتا استانا قالاسىندا وتەتىن حالىقارالىق ەكسپو-2017 كورمەسىنىڭ دايىندىق جۇمىستارى تۋرالى حابارلاپ, اتالعان شارا قازاقستان جانە بۇكىل ءوڭىر ءۇشىن تۋريزم دامۋىنىڭ قوزعاۋشى كۇشى بولاتىنىن اتاپ ءوتتى.
«ITB-2015» بارىسىندا قازاقساندىق دەلەگاتسيانىڭ باسشىسى بۇكىلالەمدىك تۋريستىك ۇيىمنىڭ باس حاتشىسى تالەب ريفايمەن بىرگە قازاقستاندىق ستەندتىڭ اشىلۋ راسىمىنە قاتىستى. بۇۇ بتۇ باس حاتشىسى ءوز سوزىندە قازاقستان ەلىنە تۋريستەردىڭ كوپتەپ كەلۋى اياسىندا استانا قالاسىندا وتكىزىلەتىن ەكسپو-2017 كورمەسىنىڭ ماڭىزدىلىعىن, قالانىڭ ينفوقۇرىلىمدىق دامۋىن جانە بتۇ تاراپىنان اتالعان ماسەلە بويىنشا ءبىزدىڭ ەلگە قولداۋ كورسەتەتىنىن جەتكىزدى. سونداي-اق, ريفاي مىرزا قازاقستانعا اسا نازار اۋدارىلاتىن بتۇ جىبەك جولى باعدارلاماسىنىڭ جۇزەگە اسىرىلۋ ماڭىزدىلىعىن اتاپ ءوتتى. جىبەك جولى باعدارلاماسى بتۇ-نىڭ 31 مۇشە-مەملەكەتتەرىنىڭ ءوزارا ىقپالداستىق تۇعىرناماسى بولىپ سانالادى.
كورمە قاتىسۋشىلارى قازاقستاندىق پاۆيلونعا اسا قىزىعۋشىلىق بىلدىرۋدە. ولار قازاق ۇلتتىق تاعامىنان ءدام تاتىپ, ءداستۇرلى بيلەردى تاماشالاپ, ۇلتتىق اسپاپتا ناقىشىنا كەلتىرىلىپ ورىندالعان ادەمى اۋەندەردى ەستىپ, سونىمەن قاتار قولدان جاسالعان كيىز كيىمدەردىڭ جانە كۇمىس بۇيىمداردىڭ دايىنداۋ بارىسىن كورۋگە مۇمكىندىكتەرى بولدى. شەتەلدىك سەرىكتەستەرمەن ىنتىماقتاستىقتى ارى قاراي دامىتۋ ماقساتىندا قازاقستاندىق دەلەگاتسيا ەكىجاقتى كەلىسسوزدەر جۇرگىزدى, ونىڭ ىشىندە گفر ەكونوميكا جانە ەنەرگەتيكا مينيسترلىگىنىڭ تۋريزم ديرەكتسياسىنىڭ جەتەكشىسى م. ۆەبەرمەن, كورمەنىڭ باسشىلىعىمەن جانە شەتەلدىك باق وكىلدەرىمەن كەزدەسۋلەر وتكىزدى.
