قالا كوشەلەرىن قاردان تازارتۋ جۇمىسى ەلوردادا تاۋلىك بويى جۇرگىزىلىپ جاتىر. اسىرەسە كوممۋنالدىق سالا قىزمەتكەرلەرى كۇشەيتىلگەن رەجيمدە ەڭبەك ەتۋدە.
كەشە استانا اۋماعىنان 9,4 مىڭ تەكشە مەتر قار شىعارىلدى. تاڭەرتەڭنەن بەرى قار كۇرەۋ جۇمىسىنا 2,1 مىڭ جول جۇمىسشىسى جانە مىڭعا جۋىق ارنايى تەحنيكا جۇمىلدىرىلدى.
قار تازالاۋ جۇمىسى الماتى اۋدانىندا قارقىندى جۇرگىزىلۋدە. بۇگىنگى تاڭدا بۇل ىسكە كۇن سايىن 600-گە جۋىق ادام جانە 400 تەحنيكا تارتىلادى.
اۋدان اۋماعىنداعى قار پوليگونىنىڭ شەبەرى قايرات جۇمانوۆ مۇندا كەلگەن كاماز-دار الدىمەن باعدارشامعا توقتايتىنىن, جاسىل جارىق جانعاننان كەيىن ولار ارنايى تىركەۋدەن وتەتىنىن جەتكىزدى. ودان كەيىن كولىك جۇرگىزۋشىسى پوستتا وتىرعان تىركەۋشىگە باقىلاۋ قاعازىن تاپسىرادى. ول ءمور باسىپ, جۇرگىزۋشىنىڭ پوليگونعا كىرگەن ۋاقىتىن جازادى. ونىڭ ءبارى جۋرنالعا تۇسەدى. جۇرگىزۋشى سودان كەيىن عانا قار قويماسىنا بارىپ, اكەلگەن قارىن توگەدى ەكەن.
الماتى اۋدانى تابيعاتتى قورعاۋ پوليتسيا بولىمشەسىنىڭ باستىعى, پوليتسيا پودپولكوۆنيگى اسان قادىروۆ استانا قالاسى ءماسليحاتىنىڭ 2017 جىلعى 17 شىلدەدەگى اباتتاندىرۋ ەرەجەسىنە سايكەس, جەكە جانە زاڭدى تۇلعالار ىرگەلەس جاتقان اۋماقتى قاردان, مۇزدان, قۇرىلىس قالدىقتارىنان, قوقىستاردان تازالاۋعا مىندەتتەلەتىنىن ايتتى.
– اباتتاندىرۋ ەرەجەسى بۇزىلعان جاعدايدا, قر اكىمشىلىك قۇقىق بۇزۋشىلىق تۋرالى كودەكسىنىڭ 505-بابىندا كورسەتىلگەندەي, جەكە تۇلعاعا 20 ايلىق ەسەپتىك كورسەتكىشتەن جانە زاڭدى تۇلعاعا 30 اەك-تەن 100 اەك-كە دەيىن ايىپپۇل سالىنادى, – دەدى ا.قادىروۆ.
«استانا تازالىق» جشس-ءتىڭ ۋچاسكە باستىعى ءمادي ابدراەۆتىڭ ايتۋىنشا, الماتى اۋدانىنىڭ اۋماعىنداعى قاردى تازالاۋ جۇمىسىنا 6 اۆتوگرەيدەر, 4 جۇك ارتقىش تەحنيكا جانە جۇكتى ءوزى تۇسىرەتىن 20 تەحنيكا جۇمىلدىرىلدى. 18 قاڭتاردان باستاپ 11851 تەكشە مەتر اۋماقتان قار شىعارىلدى.
«Elorda eco system» شجق مكك شەبەرى عازيز تويجانوۆ الماتى اۋدانى بويىنشا ناۋالاردى تازالاۋ جۇمىسى جۇرگىزىلىپ جاتقانىن اتاپ ءوتتى.
– الماتى اۋدانى بويىنشا ناۋانىڭ ۇزىندىعى – 8200 شاقىرىم. بۇگىنگە دەيىن ونىڭ 147 مىڭ شاقىرىمى تازالاندى. بۇعان 16 جۇمىسكەر, 8 تەحنيكا جۇمىلدىرىلدى.
قالانى قاردان تازارتۋ جۇمىسىنا «استانا كوگالداندىرۋ قۇرىلىسى» جشس-ءتىڭ جۇمىسشىلارى دا اتسالىسۋدا. مەكەمە بريگاديرى التىنگۇل ساديحان ەلوردادا تۇرعىنداردىڭ ءجۇرىپ-تۇرۋىنا قولايلى بولۋى ءۇشىن جولداردى ارشىپ, اسىرەسە ادام كوپ جۇرەتىن نەگىزگى كوشەلەردى قاردان تازارتىپ جاتقانىن ايتتى.
– اۋدانىمىزدا 30 سكۆەر, 7 پارك, 2 بۋلۆار بار. ءبىزدىڭ بريگادا قىس بويى سولاردىڭ اۋماعىنداعى قاردى شىعارىپ, تازالاۋدا, – دەدى بريگادير.
جالپى, قىس مەزگىلىنىڭ باسىنان بەرى ەلوردادان 3 ملن تەكشە مەترگە جۋىق قار شىعارىلدى. قالا بويىنشا كوشەلەر مەن جاياۋ جۇرگىنشىلەر جۇرەتىن جولدارعا جانە ادام كوپ جينالاتىن ورىندارعا قۇم-تۇز قوسپاسىن سەبۋ جۇمىسى دا جالعاسىپ جاتىر.
