تاۋەلسىزدىگىمىزدىڭ تۇمارى

4 ماۋسىم – مەملەكەتتىك رامىزدەر مەرەكەسى. ەلدىك نىشاندارىمىزدىڭ زاڭمەن بەكىتىلگەنىنە 20 جىل تولۋىنا وراي, ەلوردادا جاستار پاتريوتتىق اكتسياسى ءوتتى.

اكتسيانى ۇيىمداستىرۋشى استانا قالاسى جاستار ساياساتىن قولداۋ مەملەكەتتىك قورىنىڭ وكىلدەرى مەرەكەلىك شارانى تاڭ اتىسىمەن باستادى. الدىمەن قالاداعى بارلىق قوعامدىق كولىكتەردىڭ قىزمەتكەرلەرىنە ەلتاڭبا مەن تۋ بەينەلەنگەن جەيدەلەر, باس كيىمدەر تاراتىلدى. كولىكتەردىڭ ماڭدايشاسىنا كوك بايراعىمىز ىلىندى.

سوڭىنان 2 مىڭعا جۋىق ەلوردالىق كونگرەسس-حولل سارايىنداعى اكتسياعا قاتىستى.

«اكتسيا جاستاردىڭ مەملەكەتتىك رامىزدەرگە دەگەن قۇرمەتىن ارتتىرادى, ەرلىك پەن وتانسۇيگىشتىككە باۋليدى». شارانىڭ باسى قاسىندا جۇرگەن قور وكىلدەرىنىڭ پىكىرى وسىنداي.

جاپوندىقتار ءاربىر تاڭىن ءانۇرانىن ايتۋدان, ءاربىر جاڭا جۇمىسىن ەل بايراعىن بيىككە كوتەرۋدەن باستايدى دەگەن اڭگىمە بار. بۇل كۇنشىعىس ەلىنىڭ مەملەكەتتىك رامىزدەرگە دەگەن قۇرمەتىن بىلدىرسە كەرەك. ال, تۇرىك باۋىرلارىمىزدا قادام سايىن قىزىل جالاۋىن جەلبىرەتىپ ءىلىپ قوياتىن ۇلتتىق ۇستانىمدارى بار ەكەنىن بىلەمىز.

جاسىراتىنى جوق, بۇل تۇرعىدان كەلگەندە ۇيرەنەتىن ۇردىستەرىمىز ءالى دە كوپ. تاۋەلسىزدىگىمىزدىڭ تۇمارى سانالاتىن ءتول بەلگىلەرىمىزگە دەگەن قۇرمەت مۇنداي مەرەكەلىك شارالارمەن عانا ولشەنبەسە كەرەك. تەك, جيىنعا قاتىسقان ءاربىر جاس مەملەكەتتىك نىشاندارىمىزدى ءاردايىم قاستەرلەپ, ماقتانىش تۇتۋىمىز كەرەكتىگىن ۇعىنىپ شىقسا بولعانى.

 شىنار دوسان