«نۇر وتان» پارتياسىنىڭ استانا قالالىق فيليالى دەپۋتاتتارمەن جانە مەملەكەتتىك ورگان وكىلدەرىمەن بىرلەسىپ, «كەدەرگىسىز كەلەشەك» جوباسى اياسىندا بىرقاتار نىسانداردى تەكسەردى.
قوعامدىق مەكەمەلەردىڭ ينفراقۇرىلىمى مۇگەدەكتەرگە قانشالىقتى بەيىمدەلگەنىن كورۋدى جوسپارلاعان تەكسەرۋشى توپ الدىمەن №65 مەكتەپكە باردى. بۇل – ينكليۋزيۆتى ءبىلىم بەرەتىن قالاداعى ءۇش مەكتەپتىڭ ءبىرى. مۇندا مۇمكىندىگى شەكتەۋلى جەتكىنشەكتەر ساۋ بالالارمەن قاتار وقيدى.
«ءبىز جۇرگىزگەن مونيتورينگتىڭ قورىتىندىسىنا سۇيەنسەك, ينكليۋزيۆتى ءبىلىم بەرۋ مۇگەدەك بالالاردىڭ ورتاعا تەزىرەك بەيىمدەلۋىنە مۇمكىندىك بەرەدى.
ال دەنى ساۋ بالالار ولارعا قامقورلىق جاساۋ ارقىلى ادامگەرشىلىك پەن مەيىرىمدىلىكتى سەزىنە ءتۇستى. دەمەك, مۇنداي ءبىلىم وشاقتارى بىزگە قاجەت» دەيدى
«نۇر وتان» پارتياسى استانا قالالىق فيليالى توراعاسىنىڭ ءبىرىنشى ورىنباسارى ساپار احمەتوۆ.
№65 مەكتەپتىڭ مۇمكىندىگى شەكتەۋلى جاندارعا جاساعان جاعدايىن دەپۋتاتتار كوڭىل كونشىتەرلىك دەپ باعالادى. تەك ءبىر كەمشىلىگى, مۇگەدەك ارباسى كوتەرىلەتىن پاندۋستاردا تايانىشتار تەك ءبىر جاعىندا عانا ورناتىلعان. اسىلىندە, ول قوس قاپتالىندا دا بولۋى كەرەك. سونداي-اق, اربا بۇرىلاتىن الاڭدار تەگىس بولۋ كەرەكتىگى دە ەسكەرتىلدى.
كەلەسى كەزەكتە «نۇر وتان» پارتياسى باستاعان توپ تەمىرجول ۆوكزالىنا كەلدى.
ۆوكزالدا مۇگەدەكتەر كولىگىن قويۋعا ارنالعان ءۇش ورىن بەلگىلەنىپتى. بىراق, بۇل ورىندار تالاپقا ساي بولماي شىقتى. استانا قالاسى بويىنشا مەملەكەتتىك ساۋلەت-قۇرىلىستى باقىلاۋ جانە ليتسەنزيالاۋ دەپارتامەنتىنىڭ ديرەكتورى قايرات بەيسەنباەۆتىڭ ايتۋىنشا, مۇگەدەكتەردىڭ كەدەرگىسىز ءتۇسىپ-شىعۋى ءۇشىن ءار ورىننىڭ ەنى 3,5 مەتردەن كەم بولماۋى كەرەك. دەپارتامەنت ديرەكتورى ءوزى باسقاراتىن مەكەمە سالىنىپ جاتقان نىسانداردىڭ جوباعا سايكەستىگىن تەكسەرەتىنىن ايتا كەلىپ, ەگەر قۇرىلىس جوباسىندا مۇگەدەكتەرگە ارنالعان پاندۋستار قاراستىرىلىپ, ول نىساندا ءىس جۇزىندە بولماي شىقسا, وندا عيماراتتى مەملەكەتتىك كوميسسيا قابىلدامايتىنىن جەتكىزدى. ال, ەرتەرەكتە ىرگەسى قالانعان قوعامدىق عيماراتتار مۇگەدەكتەرگە جاعداي جاساۋ ءۇشىن قايتا جاڭعىرتىلماق.
«نۇر وتان» فراكتسياسىنىڭ پارلامەنت ماجىلىسىندەگى وكىلى, پارتيانىڭ پارتيالىق باقىلاۋ كوميتەتىنىڭ مۇشەسى يرينا ارونوۆانىڭ سوزىنە قاراعاندا, بۇگىندە 700-گە جۋىق نىسان مۇمكىندىگى شەكتەۋلى جاندارعا بەيىمدەلىپ قايتا جاسالعان ەكەن. سونىڭ ىشىندە 30 نىسان استانا قالاسىندا ورنالاسقان.
ەندى «نۇر وتان» جۇرگىزگەن مونيتورينگ قورىتىندىسى بويىنشا ۇسىنىمدار ازىرلەنىپ, ۇكىمەت جانە جەرگىلىكتى اتقارۋشى ورگاندارعا جولداناتىن بولادى.
قىمبات توقتامۇرات
