(باسى 1-بەتتە)
تورقالى تويدىڭ العاشقى كۇنى, ياعني, بەيسەنبىدە تاراز قالاسىنداعى وبلىستىق قازاق دراما تەاترىندا جازۋشى-دراماتۋرگ ەلەن ءالىمجاننىڭ «تولە بي» دراماسىنىڭ تۇساۋكەسەرى ءوتتى. ەلىمىزدىڭ تۇكپىر-تۇكپىرىنەن جيىلعان زيالىلار, ونەر سۇيەر قاۋىم قويىلىمعا جوعارى باعا بەردى. مەرەيتويدىڭ ءمان-ماڭىزى تولە بي ەسكەرتكىشىنىڭ اشىلۋىمەن ارتا ءتۇستى. قالانىڭ قاق ورتاسىنان, تۋرا تولە بي داڭعىلىنىڭ بويىنان بوي كوتەرگەن ەسكەرتكىش ايرىقشا كەسكىن-كەلبەتىمەن الىستان كوز تارتادى.
ءدال وسى كۇنى بالاساعۇن اتىنداعى ورتالىق كونتسەرت زالىندا «تولە ءبيدىڭ قاسيەتتەرى مەن وسيەتتەرى» اتتى رەسپۋبليكالىق جىر ءمۇشايراسىنىڭ قورىتىندىسى شىعارىلىپ, جەڭىمپازدار مەن جۇلدەگەر اقىندار ماراپاتتالدى. جىر بايگەسىنىڭ باس جۇلدەسىن قازاقتىڭ ارقالى اقىنى مارالتاي رايىمبەكۇلى قانجىعاعا بايلاعانىن ايتا كەتكەن ءجون. مۇنان سوڭ وسى ءزاۋلىم سارايدا «تولە بي جانە ونىڭ ۇلاعاتتى مۇرالارى» تاقىرىبىندا رەسپۋبليكالىق عىلىمي-تاجىريبەلىك كونفەرەنتسيا ءوز جۇمىسىن باستادى. كونفەرەنتسيانى پارلامەنت سەناتىنىڭ دەپۋتاتى, قازاقستان جازۋشىلار وداعى باسقارماسىنىڭ توراعاسى نۇرلان ورازالين جۇرگىزىپ وتىردى. القالى باسقوسۋدا مادەنيەت جانە اقپارات ءمينيسترى مۇحتار قۇل-مۇحاممەد ەلباسى ن.نازارباەۆتىڭ قۇتتىقتاۋ حاتىن وقىپ بەردى.
توي بۇدان ءارى ورتالىق ستاديونداعى سالتاناتتى مەرەكە مەن گالا-كونتسەرتپەن جالعاستى. ال, سەنبى كۇنى ب.مومىشۇلى اتىنداعى اتشاباردا قان قىزدىرىپ, دەلەبە قوزدىرعان ۇلتتىق ات سپورتى ويىندارى بايراعىن كوتەردى.
تولە بي الىبەكۇلىنىڭ 350 جىلدىق تورقالى تويىنان دايىندالعان مەرەكەلىك رەپورتاجدى گازەتىمىزدىڭ كەلەسى سانىنان وقي الاسىزدار.
تۇرسىنبەك سۇلتانبەك, قازاقستان جۋرناليستەر وداعىنىڭ مۇشەسى
