ءتۇسىندىرۋ جۇمىستارىن جۇرگىزۋدى تاپسىردى

ەلوردادا «جۇمىسپەن قامتۋ – 2020» جول كارتاسىنىڭ ورىندالۋى باياۋ. باعدارلامانى تەجەپ تۇرعان كەدەرگىلەر بار. بۇل كەشە استانا قالاسى اكىمىنىڭ ورىنباسارى ايدا بالاەۆانىڭ توراعالىعىمەن وتكەن وتىرىستا انىقتالدى.
ناقتىلاپ ايتساق, جۇمىسقا جىبە­رۋشى مەن جۇمىسقا الۋشى تاراپتار اراسىندا تۇسىنىسپەۋشىلىك تۋىنداپ وتىر. ەكى قولىنا ءبىر كۇرەك تابا الماي جۇرگەن جۇرت تا ۇسىنىلىپ وتىرعان جۇمىسقا بارماي, تاڭداۋ جاعىنا شىققان. كوبىسى مەملەكەتتىك قىزمەتكە ورنالاسقىسى كەلەدى. ال ەڭبەك نا­رى­عىندا قازىرگى تاڭدا دانەكەرلەۋشى, سلەسار-جوندەۋشى, اۆتوبۋس جۇرگىزۋشى, ت.ب. وسىنداي باس-اياعى 20 شاقتى تەح­نيكالىق ماماندىقتار سۇرانىسقا يە. بۇل ماماندىقتاردىڭ جالاقىسى از بولعاندىقتان, ەل وعان بارا بەرمەيدى. «جۇمىسپەن قامتۋ ورتالىعى» مم باسشىسى قايرات جاقىپوۆ ءوز بايانداماسىندا وسىنداي فاكتىلەردى كەلتىردى.
بيىل استانادا قاجەت جۇمىسشى ماماندىقتار بويىنشا ءبىر جىلدىق وقۋعا 150 ادامدى جىبەرۋ جوسپار­لانعان. ول ءۇشىن جۇمىسقا جىبەرۋشى مەن جۇمىس بەرۋشى تاراپتار اراسىندا كەلىسىمشارت جاسالادى. بيۋدجەتتەن قارجى ءبولىنىپ, جۇمىس بەرۋشىنىڭ ەسەپشوتىنا اۋدارىلادى. بىراق, جو­عارىدا اتالعان سەبەپتەرمەن وقۋ­دى
بىتىرگەن كوپشىلىگى ۇسىنعان جۇ­مىسقا ورنالاسپايدى. سوندىقتان, وقىتۋعا جۇمسالعان قارجىنى جۇمىس بەرۋشى قايتارۋى شارت. ال كەيىنگى تاراپقا ول ءتيىمسىز ەكەنى بەلگىلى. سون­دىقتان, جۇمىس بەرۋشى قانشا ادامدى وقىتقانى جونىندەگى انىقتاما قاعازدارى مەن ەڭبەك شارتتارىن جۇمىسقا جىبەرۋشى – جۇمىسپەن قامتۋ جانە الەۋمەتتىك باعدارلامالار باس­قارماسىنا ۇسىنباعان. تۇيتكىل وسى جەردەن شىعىپ تۇر.
ءار مەكەمە ءبىر ادامدى جۇمىسقا قابىلداماس بۇرىن دەنساۋلىعى ءجو­نىندە انىقتامانى سۇرايتىنى انىق. ال زاڭناماعا سايكەس دەنساۋلىق ساقتاۋ نىسانىنان ول انىقتامانى الۋ ءۇشىن 2-3 مىڭ تەڭگە كولەمىندە قارجى شىعىنداۋ كەرەك. بۇل الەۋمەتتىك جاعدايى تومەن وتباسىنان شىققان ادامنىڭ قالتاسىنا اۋىر تيەدى. وتىرىستا حالىقتىڭ از قامتىلعان توبىنا بۇل انىقتامانى تەگىن بەرۋ ماسەلەسى كوتەرىلدى.
وسىنىڭ ءبارىن تىڭداعان ايدا عالىمقىزى بۇگىندەرى استانا سەكىلدى الىپ شاھاردا 60 شاقتى عانا جۇمىس بەرۋشى مەكەمە بولسا, ول ازدىق ەتە­تىنىن, سوندىقتان بۇلاردىڭ سانىن ارتتىرۋ قاجەتتىگىن قاداپ ايتتى. حالىق اراسىنا شىعىپ, بۇل ماسەلە بويىنشا ۇگىت-ناسيحات, ءتۇسىندىرۋ جۇ­مىستارىن جۇرگىزۋدى تاپسىردى. وسى ايدىڭ اياعىنا دەيىن ءىستى ءبىر جولعا قويۋ كەرەكتىگىنە نازار اۋداردى.

امانعالي قالجانوۆ