تۇڭعىش رەت ەلىمىزدە ۇلتتىق سپورت كۇنى اتالىپ ءوتتى. «ارعىماق» ات-سپورتتىق ساۋىقتىرۋ كەشەنىندە كوكپار, اۋدارىسپاق, تەڭگە ءىلۋ, قىز قۋدان كورسەتىلىمدەر جانە توعىزقۇمالاق پەن اسىق اتۋدان شەبەرلىك سىنىپتارى ۇيىمداستىرىلدى. قوناقتارعا قازاقى تازى جانە بۇركىت كورسەتىلىپ, قۇسبەگىلىك ونەر تانىستىرىلدى.
تۋريزم جانە سپورت ءمينيسترى ەرمەك مارجىقپاەۆ قۇتتىقتاۋ سوزىندە:
– ۇلتتىق ويىندار – مادەني-پاتريوتتىق تاربيە بەرۋدىڭ قۇرالى. ءارى دەنساۋلىقتى نىعايتۋعا, سالاۋاتتى ءومىر سالتىن ناسيحاتتاۋعا ەلەۋلى سەپتىگىن تيگىزەدى. بۇگىن ەل ىشىندە وتكىزىلىپ جاتقان ات جارىستار, قۇسبەگىلىك جانە اسىق اتۋ, توعىزقۇمالاق, ساداق تارتۋ سياقتى تۋرنيرلەر ازاماتتارعا شىنايى مەرەكە سالتاناتىن سەزىنۋگە مۇمكىندىك بەرۋدە, – دەدى.
ۇلتتىق سپورت تۇرلەرى قاۋىمداستىعىنىڭ پرەزيدەنتى يسلامبەك سالجانوۆ سوزىنشە, ناۋرىز مەيرامىنىڭ جاڭا تۇجىرىمداماسى دايىندالىپ, سونىڭ اياسىندا 20 ناۋرىزدى ۇلتتىق سپورتقا ارنالۋى – قۋانىشتى جاڭالىق. كۇزدە V دۇنيەجۇزىلىك كوشپەندىلەر ويىنى وتەدى. اۋقىمدى حالىقارالىق ءىس-شارا ۇلتتىق سپورتتى ودان ءارى دامىتۋعا تىڭ سەرپىن بەرەدى.
استانا قالاسى ءماسليحاتىنىڭ توراعاسى, ەلوردالىق ۇلتتىق جانە وليمپيادالىق ات سپورتى تۇرلەرى فەدەراتسياسىنىڭ پرەزيدەنتى ەرلان كاناليموۆ تەرەڭنەن تامىر تارتاتىن ۇلتتىق سپورت تۇرلەرى قارقىندى دامۋ جولىنا تۇسكەنىن ءسوز ەتتى.
استانا قالاسى اكىمىنىڭ ورىنباسارى ەسەت بايكەن مەرەكە كۇندەرى ەلوردانىڭ بارلىق اۋدانىندا ۇلتتىق سپورت تۇرلەرى بويىنشا جارىس وتەتىنىن اتاپ ءوتتى.
كوكپاردان استانا مەن اقش قۇراماسى اراسىنداعى جولداستىق كەزدەسۋ كورەرمەندەر ءۇشىن كەرەمەت توسىنسىي بولدى. كوكپار – شاباندوزدىڭ رۋحىن كوتەرىپ, كۇش-جىگەرىن, توزىمدىلىگىن, باتىلدىعى مەن ەپتىلىگىن شىڭداپ, ات ۇستىندە مىعىم وتىرۋىن قالىپتاستىراتىن سپورت ءتۇرى. ەلىمىزدە كوكپاردى سپورت رەتىندە عانا ەمەس, ونەر تۇرعىسىندا باعالاپ, دامۋىنا ۇلەس قوسىپ جۇرگەن ازاماتتار از ەمەس. وڭىرلەردە كوكپار كومانداسى قۇرىلىپ, ەلشىلىك چەمپيوناتتار تارتىستى وتەدى. قازىر كوكپاردىڭ قالىڭ جانكۇيەرى بار. مۇنداي جىلى اتموسفەرانى استانا مەن اقش-تىڭ كوكپار كوماندالارىنىڭ اراسىندا وتكەن كەزدەسۋدە سەزىندىك.
مەرەكەلىك كەشتە ۇلتتىق سپورتتى دارىپتەپ جۇرگەن ازاماتتاردىڭ ەڭبەگى اتالىپ, ولاردى ماراپات بيىگىنە شىعاردى. كوكپاردان كسرو-نىڭ توعىز دۇركىن چەمپيونى ءابىلحان داۋىلباەۆ, توعىزقۇمالاقتان قازاقستاننىڭ ەكى دۇركىن چەمپيونى مەيرامقۇل نوعايباەۆ, قازاق كسر ەڭبەك سىڭىرگەن جاتتىقتىرۋشىسى جۇمابەك مەيرامعاليەۆ, بەلگىلى سپورت ءجۋرناليسى, جازۋشى نەسىپ ءجۇنىسبايۇلى, قازاقستاننىڭ ەڭبەك سىڭىرگەن جاتتىقتىرۋشى قۇلامحان جاقىپوۆ, اسىق اتۋدان ۇلتتىق قۇرامانىڭ باس باپكەرى جومارت سابىرجانوۆ جانە اتبەگى مەيرامبەك چاكەنوۆتىڭ مەرەيى ارتتى.
ۇلتتىق سپورت قاۋىمداستىعىنىڭ قۇرامىنا 10 فەدەراتسيا: بايگە, كوكپار, اۋدارىسپاق, ساداق اتۋ, جامبى اتۋ, تەڭگە ءىلۋ, قۇسبەگىلىك, اسىق اتۋ, «Joryq» جانە تاعى باسقاسى كىرەدى.
سۋرەت اۆتورى: سۇلتان سەيىت
