قازاقستاندا كۆازيمەملەكەتتىك سەكتور 6 مىڭعا جۋىق كاسىپورىندارىمەن ۇسىنىلعان, 300 مىڭنان استام ادامدى جۇمىسپەن قامتىعان. مەملەكەت ەكونوميكانىڭ 30 سەكتورىنىڭ 20-نا قاتىسادى, ەكونوميكالىق ىنتىماقتاستىق جانە دامۋ ۇيىمدارى (وەسر) ەلدەرىندە ورتاشا كورسەتكىش – 13 قۇرايدى. قازاقستاندا Yellow Pages قاعيداتتارى ساقتالمايدى, بۇل جەكە كاسىپكەرلىكتىڭ دامۋىنا كەرى اسەر ەتەدى, يننوۆاتسيالاردى تەجەيدى جانە ەڭبەك ونىمدىلىگىنىڭ ءوسۋىن تومەندەتەدى, ناتيجەسىندە بولاشاقتا ەكونوميكانىڭ دامۋى باسەڭدەتىلەدى.
بۇگىنگى كۇنگە دەيىن مەملەكەتتىك اۆتوبۋس پاركتەرى, ميكروقارجى ۇيىمدارى, اۋماقتاردى تازالاۋ جانە اباتتاندىرۋ ۇيىمدارى, قوناق ۇيلەر مەن ساناتوريلەر, كۇزەت اگەنتتىكتەرى بار, ولار ءوز قىزمەتىنە تىكەلەي تاپسىرىستار مەن سۋبسيديالار الادى! مىسالى, 2024 جىلى «قىزىلوردا ەلەكتر جەلىسىن تاراتۋ كومپانياسى» كوممۋنالدىق كاسىپورنى قۇرىلىس-مونتاجداۋ جۇمىستارى بويىنشا مەملەكەتتىك ساتىپ الۋ شەڭبەرىندە جەكە باسەكەلەستەر بولا تۇرا, 1 ملرد. تەڭگەدەن استام سوماعا 300 كەلىسىمشارتتى العان! «الماتىەلەكتروترانس» – الماتى قالاسى اكىمدىگىنىڭ كوممۋنالدىق كاسىپورنى 2018-2023 جىلدارى ارالىعىندا بيۋدجەتتەن 378 ملرد تەڭگە كولەمىندە سۋبسيديا جانە كومەك الدى. قارجى ليزينگى نارىعىنىڭ 95%-ى ەكى كۆازيمەملەكەتتىك ۇيىمىنا تيەسىلى. قازاقستان جاپپاي جەكە كاسىپكەرلىكتى دامىتۋ جولىمەن ءجۇرىپ جاتىر ما, الدە ءبىز مەملەكەتتىك كاپيتاليزمدى قۇرۋدى جالعاستىرا بەرەمىز بە, ناقتى شەشىم قابىلداۋ كەرەك؟ نارىقتىق ەكونوميكا مەملەكەت جەكە بيزنەسپەن باسەكەلەسۋدى توقتاتقان جاعدايدا عانا مۇمكىن بولادى. «قازاقستان رەسپۋبليكاسىنداعى كۆازيمەملەكەتتىك سەكتوردى رەفورمالاۋ جونىندەگى تالدامالىق باياندامانى جانە ونى ىسكە اسىرۋ جونىندەگى ءىس-شارالار جوسپارىن بەكىتۋ تۋرالى» قازاقستان رەسپۋبليكاسى ۇكىمەتىنىڭ 2022 جىلعى 6 قىركۇيەكتەگى № 654 قاۋلىسىمەن بەكىتىلگەن قۇجات ورىندالمادى. جوعارىدا ايتىلعاندارعا بايلانىستى: 1. قازاقستان رەسپۋبليكاسى ۇكىمەتىنىڭ 2022 جىلعى 6 قىركۇيەكتەگى № 654 قاۋلىسىمەن بەكىتىلگەن كۆازيمەملەكەتتىك سەكتوردى رەفورمالاۋ جونىندەگى ءىس-شارالار جوسپارىن ىسكە اسىرۋعا كىرىسۋدى; 2.
جۇمىس ىستەپ تۇرعان مەملەكەتتىك كاسىپورىندار مەن كۆازيمەملەكەتتىك كومپانيالارعا تولىق رەۆيزيا جانە تالداۋ جۇرگىزۋدى. ولاردىڭ ماقساتتارى مەن مىندەتتەرىن قايتا قاراۋدى. بىرتەكتى كۆازيمەملەكەتتىك كومپانيالاردى رەفورمالاۋ جانە بىرىكتىرۋ, قايتالاناتىنداردى جويۋدى; 3. مەملەكەتتىك كاسىپورىندار مەن كۆازيمەملەكەتتىك كومپانيالار ءۇشىن رۇقسات ەتىلگەن قىزمەت تۇرلەرىنىڭ تىزبەسىن قايتا قاراۋدى. جەكە بالامالار بولماعان كەزدە مەملەكەتتىڭ تەك الەۋمەتتىك وبەكتىلەرگە (دەنساۋلىق ساقتاۋ, كوممۋنالدىق قىزمەتتەر) جانە ستراتەگيالىق وبەكتىلەرگە (ينفراقۇرىلىمدىق وبەكتىلەر, ەنەرگەتيكا, كولىك) قاتىسۋ مۇمكىندىگىن قالدىرۋدى. بارلىق باسقا وبەكتىلەردى جەكەشەلەندىرۋ جوسپارىنا ەنگىزۋدى; 4. وسى قىزمەتتى تسيفرلاندىرۋ جانە ولاردى جاريالاۋ ارقىلى جەكەشەلەندىرۋ ءراسىمىنىڭ تولىق اشىقتىعىن قامتاماسىز ەتۋدى; 5. كۆازيمەملەكەتتىك كومپانيالاردىڭ قىزمەتىندە كورپوراتيۆتىك باسقارۋدىڭ ۇزدىك الەمدىك تاجىريبەسىن قولدانۋدى. كۆازيمەملەكەتتىك كومپانيالاردىڭ باسقارۋشى ورگاندارى باسشىلارىنىڭ كونكۋرستىق ىرىكتەۋىنىڭ, سىياقىسىنىڭ جانە ەسەپتىلىگىنىڭ ناقتى كريتەريلەرىن بەكىتۋدى. ءتيىستى اسسوتسياتسيا نەگىزىندە كۆازيمەملەكەتتىك كومپانيالار ءۇشىن تاۋەلسىز ديرەكتورلار ءتىزىلىمىن قۇرۋدى ۇسىنامىز.
ايتۋار قوشمامبەتوۆ,
ءماجىلىس دەپۋتاتى
