«استانا – تۇركى الەمىنىڭ مادەني استاناسى 2012» جىلى اياسىندا كوپتەگەن ءىس-شارالار ۇيىمداستىرىلۋدا. ەكى جىلدا ءبىر بولاتىن «ۇلى دالا سازى» ءداستۇرلى ورىنداۋشىلاردىڭ حالىقارالىق فەستيۆالى دە بيىل وسىناۋ اتاۋلى مادەني شارانىڭ شەڭبەرىندە وتكىزىلدى.
كەشە ك.بايسەيىتوۆا اتىنداعى ۇلتتىق وپەرا جانە بالەت تەاترىندا شىمىلدىعى تۇرىلگەن فەستيۆالگە قاتىسۋعا قىزىعۋشىلىق تانىتقاندار قاراسى مول. ەكى جىل سايىن ءان مەن كۇي سالتانات قۇراتىن وسىنداي اۋەزدى مەيرامنىڭ ەلگە بەرەر مەرەيى مول, ۇلاعاتى وراسان. ءداستۇرلى ورىنداۋشىلىقتى قولداپ, قۇدىرەتتى اۋەن فەستيۆالىن ۇيىمداستىرۋمەن شۇعىلدانىپ جۇرگەن قازاقستانرەسپۋبليكاسىنىڭ مادەنيەت جانە اقپارات مينيسترلىگىنىڭ بۇل سالاعا سىڭىرگەن ەڭبەگى ەرەن. سونداي-اق كومەك قولىن سوزۋشىلاردىڭ تاعى ءبىرى – «قازاقستان حالقىنىڭ رۋحاني دامۋ قورى» اق.
اتالمىش ساز مەرەكەسىنە ات تەرلەتىپ ءار وڭىردەن بۇلبۇل كومەي, جەزتاڭداي انشىلەر مەن داۋلەسكەر كۇيشىلەر كوپ جينالىپتى. استانانىڭ ابىرويىن اسقاقتاتىپ بۇگىنگىنىڭ ءبىرجانى اتانىپ جۇرگەن قايرات بايبوسىنوۆ «ون ساۋساقتى» اۋەلەتسە, باتىس ءداستۇرلى مەكتەبىنىڭ كورنەكتى ءانشىسى ايگۇل قوسانوۆا «جەلكىلدەكتى» سىڭعىرلاتتى. سۇگىردىڭ «نازقوڭىرىن» كۇمبىرلەتكەن جانعالي جۇزباەۆتار قاتارىن ەربول ايتباەۆ, اسحات ورازوۆ, سەرجان شاكىرات, ايگۇل ۇلكەنباەۆا, التاي ەپوسى «قوزيۋكە-باياندى» ورىنداعان نوگون شۋماروۆ, نوعاي كۇيى «يورعا سازبەن» تامساندىرعان فايزۋللا مۋساەۆ جانە كوپتەگەن باسقا دا جىرشى- كۇيشىلەر لەك-لەگىمەن ورتا تولتىردى.
«ناعىز قازاق قازاق ەمەس, ناعىز قازاق – دومبىرا» دەيتىن قادىر اعامىزدىڭ اتالى ءسوزىن ءىس جۇزىندە, تەاتر ساحناسىندا دومبىرا ۇستاعان ناعىز قازاقتاردىڭ ونەر دۋمانىندا كوزبەن كورىپ ماسايراپ, كوڭىلگە تەرەڭ ءتۇيىپ, ءسۇيسىنىپ, قۇلاق قۇرىشىن قاندىرىپ, دالا سازىنا ەلىتىپ قايتتى ەلوردالىقتار. كەش قوناعى بولعان قر مادەنيەت جانە اقپارات ءمينيسترى دارحان مىڭباي جينالعان قاۋىمدى وسى ءبىر كاۋسار بۇلاقتاي سىڭعىرلاعان دالا سازىنىڭ مەرەكەسىمەن قۇتتىقتادى. «استانا – تۇركى مادەنيەتىنىڭ باس قالاسى بولىپ جاريالانعانىن بىلەسىزدەر. ەلباسىمىز قازاق ونەرىن, اسىرەسە ءداستۇرلى ونەردى دامىتۋعا كوپ كوڭىل ءبولىپ كەلە جاتىر. تۇركى جۇرتىن بىرىكتىرىپ وتىرعان وسىنداي ونەردى دامىتۋىمىز كەرەك. تۇركى مادەنيەتىنىڭ ءاربىر جانرى ءبىر-ءبىر عىلىم, ءبىر-ءبىر تاريح, ونى
ءبىز كوزدىڭ قاراشىعىنداي ساقتاپ, ۇرپاقتارىمىزعا جەتكىزەتىن بولساق, بۇل دا ءبىزدىڭ ازامات رەتىندە, تۇركى جۇرتىنىڭ پاتريوتى رەتىندەگى ابىرويلى ءىسىمىز بولار ەدى» دەگەن دارحان مىڭباي سوزدەرىنە كورەرمەن دۋ قول شاپالاقپەن ريزاشىلىعىن ءبىلدىردى.
كونتسەرتكە تۇركسوي-دىڭ, تۇركى تىلدەس ەلدەردىڭ يۋنەسكو ىستەرى جونىندەگى ۇلتتىق كوميسسيانىڭ, حالىقارالىق ءداستۇرلى مۋزىكا ۇيىمىنىڭ باسشىلىعى جانە كوپتەگەن شەتەلدىك مۋزىكاتانۋشىلار كەلدى.
ماريا ايدارباەۆا
