ۇنەمدەپ ۇيرەنگەن ءجون
«جارىق پەن جىلۋدى ۇنەمدەۋ كەرەك. ۇنەمدەي ءبىلمەسەك, ونى دا ۇيرەنۋ كەرەك». ءماسليحات حاتشىسى سانسىزباي ەسىلوۆتىڭ ءتوراعالىعىمەن وتكەن «ەنەرگيا تيىمدىلىگىن ارتتىرۋ ءجانە ەنەرگيانى ۇنەمدەۋ ماسەلەلەرى» اتتى دوڭگەلەك ۇستەل ءماجىلىسىنىڭ ءتۇيىنى وسىعان سايادى.
جيىندى اشقان س.ەسىلوۆ قر «ەنەرگيانى ۇنەمدەۋ جانە ەنەرگيا تيىمدىلىگىن ارتتىرۋ تۋرالى» زاڭىن جۇزەگە اسىرۋ ماقساتىندا ەلوردا اكىمدىگى قالا تىرشىلىگىن قامتاماسىز ەتۋ وبەكتىلەرىنىڭ ءتيىمدى, ءۇزىلىسسىز قىزمەت كورسەتۋىن قامتاماسىز ەتۋ بويىنشا بىرقاتار كۇردەلى جوبالاردى جۇزەگە اسىرىپ جاتقاندىعىن اتاپ ءوتتى. «بۇگىنگى تاڭدا ەنەرگيانى ۇنەمدەۋ الەمدىك قاۋىمداستىق ءۇشىن ماڭىزدى بولىپ وتىر. بۇل ورايدا ءبىزدىڭ مىندەتىمىز – بيلىكتىڭ ءتۇرلى دەڭگەيىندە وسى جاڭاشىلدىق باستامالارعا مەملەكەتتىك قولداۋ كورسەتىپ, زامان تالابىنا ساي تەحنولوگيالاردى تاجىريبەگە ەنگىزۋىمىز كەرەك» دەدى ول.
دوڭگەلەك ۇستەلگە قاتىسۋشىلار ەنەرگيا تيىمدىلىگىن ارتتىرۋ ماسەلەلەرىن عانا ەمەس, سونىمەن قاتار كوممۋنالدىق جىلۋمەن جابدىقتاۋ, قالا كاسىپورىندارىندا ەنەرگيا اۋديتتەرىن جۇرگىزۋ, تۇتىنىلعان ەلەكتر ەنەرگياسىنا قولدانىستاعى تاريفتەر, حالىقارالىق ستاندارتتارعا سايكەس ەنەرگومەنەدجمەنت جۇيەسىن قۇرۋ قاجەتتىگىن ايتتى. سونداي-اق, سالا ماماندارىن الاڭداتقان ماسەلە – كادرلاردى دايارلاۋ جانە قايتا دايارلاۋ. بۇگىندە ەنەرگەتيكا مەنەدجەرلەرى مەن اۋديتورلارى مەن تۇرعىن ءۇي-كوممۋنالدىق شارۋاشىلىق سالاسىنىڭ بىلىكتى ماماندارى جەتىسپەيدى. دەپۋتاتتار بۇل پروبلەمانى شەشۋدە «جۇمىسپەن قامتۋ-2020» باعدارلاماسى شەڭبەرىندە مامانداردى قايتا دايارلاۋ جوباسىن ءتيىمدى پايدالانۋ قاجەت دەيدى.
جيىن بارىسىندا دەپۋتاتتارعا قالا مەكتەپتەرىندەگى جىلۋ توراپتارىن جاڭارتۋ جۇمىسىنىڭ ءناتيجەلەرى تانىستىرىلدى.
ءبىر توپ دەپۋتات, اتاپ ايتساق, زەينوللا شيبكەنوۆ, مەيرامباي ورالوۆ, تيمۋر ورازاقوۆ ەلوردادا ەنەرگيانى ۇنەمدەۋ تەحنولوگيالارىن ەنگىزۋ بويىنشا كاسىپورىنداردىڭ قىزمەتىن ءۇيلەستىرەتىن قۇرىلىم قاجەت ەكەندىگىن العا تارتتى. ال دەپۋتات ميراس شەكەنوۆ ەنەرگيانى ۇنەمدى پايدالانۋ قۇرىلىس وبەكتىلەرىن ساراپتاۋدى جوبالاپ, سالۋ كەزەڭىندە قاراستىرۋ قاجەت ەكەندىگىن ايتتى.