ساعادات نۇرماعامبەتوۆ اتىنداعى اسكەري كوللەدجدە كەڭەس وداعىنىڭ باتىرى, تاۋەلسىز قازاقستاننىڭ تۇڭعىش قورعانىس ءمينيسترى, ارميا گەنەرالى ساعادات نۇرماعامبەتوۆ پەن حالىق قاھارمانى راقىمجان قوشقارباەۆتىڭ 100 جىلدىعىنا وراي «قازاق حالقىنىڭ باتىرلارى» اتتى دوڭگەلەك ۇستەل ءماجىلىسى ءوتتى.
ءىس-شاراعا قاتىسقان مادەنيەت جانە اقپارات مينيسترلىگىنىڭ ارحيۆ, قۇجاتتاما جانە كىتاپ ءىسى كوميتەتى ونوماستيكا باسقارماسىنىڭ باسشىسى ەلەركە تورەحان داڭقتى باتىرلارىمىزدىڭ مەرەيتويىن اتاپ ءوتۋ ارقىلى ۇلت بولمىسىن ناسيحاتتاپ, تۇلعالار تاريحىنا قۇرمەت ۇعىمىن ۇرپاق جادىندا جاڭعىرتۋدىڭ ماڭىزدىلىعىنا توقتالدى.
دوڭگەلەك ۇستەلگە قاتىسۋشىلار ساعادات نۇرماعامبەتوۆ پەن راقىمجان قوشقارباەۆتىڭ ءومىرى مەن ەڭبەك جولىن, وتان قورعاۋعا قوسقان ۇلەسىن, ەرلىك پەن جانقيارلىق ۇلگىلەرىن تالقىلادى.
