زاۋرە ءجۇسىپوۆا: اقىلى تۇراقتار قاراستىرىلۋدا
ءبىلىم بەرۋ سالاسىنىڭ وكىلى رەتىندە, كوبىنە ءبىلىم سالاسىنداعى ماسەلەلەرگە نازار اۋدارعاندى ءجون سانايمىن. ماسەلەن, قىزمەتكەرلەردىڭ ەڭبەكاقىسىن كوتەرۋ, ءبىلىم بەرۋ ساپاسىن ارتتىرۋ كۇن تارتىبىنەن تۇسكەن ەمەس. بۇگىندە بالاباقشاعا كەزەككە تۇرۋ سانى دا ءوسىپ كەلەدى. سايكەسىنشە, مەملەكەتتىك جانە مەملەكەتتىك تاپسىرىسپەن بەرىلىپ جاتقان جاڭا بالاباقشالار سانى ارتىپ كەلەدى.
ءوزىم سايلانعان سارىارقا اۋدانى №2 سايلاۋ وكرۋگىندە 16 مىڭنان استام تۇرعىن بار. ياعني, 70-تەن اسا كوپپاتەرلى ۇيلەر مەن جەكە ۇيلەر ورنالاسقان.
حالىقتى ءجيى تولعاندىراتىن ءماسەلە – تۇرعىن ءۇي-كوممۋنالدىق شارۋاشىلىعى. وسىعان بايلانىستى شاتىرلار, قاسبەتتەر, كىرە بەرىستەر مەن قۇبىرلار جوندەلدى. جەكە مەنشىككە تيەسىلى ءۇيلەردىڭ بۇزىلۋى بويىنشا تۇرعىندارعا كومەك رەتىندە مەملەكەتتىك باعدارلامالار قاراستىرىلعان.
بۇگىندە تكش ماسەلەسى, اتاپ ايتقاندا وكرۋگتەگى تۇرعىن ۇيلەردىڭ جاعدايىن جاقسارتۋ ماقساتىندا جاڭارتۋ باعدارلامالارى نەگىزىندە كۇردەلى جوندەۋدى قاجەت ەتەتىن نىساندارعا باقىلاۋ ءجۇرگىزۋدەمىز.
تۇرعىن ءۇي-كوممۋنالدىق شارۋاشىلىعىن مودەرنيزاتسيالاۋ جۇمىستارى قايتارىمدى جانە باسقا دا بيۋدجەتتىك قارجىلاندىرۋ ەسەبىنەن وندىرىلەدى. بۇل ماسەلەلەر سارىارقا اۋدانى اكىمدىك اپپاراتىنىڭ پيك جانە باسقا دا وكىلەتتى ورگانداردىڭ ارەكەت ەتۋىمەن قاراستىرىلۋدا. وسىعان بايلانىستى تۇرعىنداردىڭ تالاپ-تىلەگى رەسپۋبليكا داڭعىلى, 48/1 مەكەنجايدا قابىلدانادى. سونداي-اق, جۋىردا عانا زەينەتكەرلىك جاستاعى وكرۋگ تۇرعىنىنىڭ ماسەلەسىن شەشۋگە كومەكتەستىك. كوپ جىلدار بويى تىل ەڭبەككەرى ستاتۋسىنا قول جەتكىزە الماعاندىقتان زەينەتاقىسىنا قوسىمشا اقى تولەنبەگەن ەكەن. ءبىزدىڭ كومەگىمىزدىڭ ارقاسىندا بۇل ماسەلە وڭ شەشىمىن تاپتى.
قالانىڭ ينفراقۇرىلىمىن دامىتۋ بويىنشا ايتاتىن بولسام, جانگەلدين جانە اۋەزوۆ كوشەلەرىن قايتا جوندەۋ حالىقتىڭ قوزعالىسىن جەڭىلدەتتى. ەندىگى ماسەلە – اۋلاداعى اۆتوتۇراقتار. تۇرعىندار جەدەل جاردەم ماشيناسى مەن قوقىس تاسيتىن ارنايى تەحنيكالاردىڭ ءوتۋىنە قيىندىق تۋعانىن ايتىپ, دابىل قاعۋدا. كەيبىر كوپپاتەرلى ۇيلەردىڭ اۋلاسىنا ارناۋلى كولىك تۇراعىنىڭ قاراستىرىلماعانى بەلگىلى. اۋلادا ورنالاسقان بالالار ويىن الاڭىنداعى قاۋىپسىزدىكتى ساقتاۋ ءۇشىن اقىلى تۇراقتار جۇيەسى قارالۋدا.
شىنىن ايتقاندا, ءاربىر ەكىنشى تۇرعىن جول جوندەۋ ماسەلەسىن العا تارتادى. كوپتەگەن ماسەلەلەردى سارىارقا اۋدانى اكىمدىگىمەن, «نۇر وتان» پارتياسىنىڭ استانا قالالىق فيليالىمەن بىرلەسە شەشەمىز.
ارينە, اۋماقتاعى كەيبىر ماسەلەنى بىردەن شەشۋ مۇمكىن ەمەس, كوپشىلىگى قارجىلاندىرۋ ماسەلەسىنە تىرەلەدى ءارى كوپ ۋاقىتتى تالاپ ەتەتىنىن دە ايتۋىمىز كەرەك.